सेबा, दाउद चो बिरुद होतोर
20
एदांय हुता गोटोक बिनयामीनी बिकरी चो बेटा सेबा नाव चो उबागरी रये। हुन तोड़ी फूकुन चिचियाउक मुरियालो,“दाउद चो राज ने आमचो काई बाटा नीआय।
जिसय चो बेटा ने बले आमचो काई बाटा नीआय।
ए इसराएलिमन! आपलो डेरामन ने जाहा!”
2 एईकाजे सपाय इसराएलिमन दाउद चो पाटकुती हिंडुक छांडुन, बिकरी चो बेटा सेबा बाटे गेला। मानतर सपाय जहूदीमन जरदन नंदी ले धरुन जरूसलेम ले आपलो राजा संगे रला।
3 दाउद राजा, जरूसलेम ने आपलो माहाल ने ईलो। राजा आपलो दस झन राकलो बायलेमन के राज-माहाल चो दखा-राखा करतो काजे छांडुन रये, हुनमन के दखा-राखा करु चो हक ने अलगे गोटोक घरे पोसते रये। मानतर राजा, हुनमन लगे नी जाते रये। एईकाजे हुनमन आपलो जीवना भर रांडी बायले असन जीवते रला।
अमासा के मारतोर
4 तेबे राजा अमासा के बललो, “जहूदीमन के तीन दिन चो भीतरे मोचो लगे हागदेउन आन, आउर तुय बले हुताय रा।” 5 तेबे अमासा, जहूदीमन के हागदेउक गेलो। मानतर हुनके, कबूल धरालो समया ले आगर दिन लागली। 6 तेबे दाउद, अबीसे के बललो, “एदांय बिकरी चो बेटा सेबा, अबसालोम ले बले आगर आमचो नोकसान करेदे। एईकाजे तुय आपलो परभु चो बीरमन के धरुन हुनचो पाट-पाट जा, नोहले हुन भाड़ा बिती सहर ने जाउन लुकेदे आउर आमचो ले बाचेदे।” 7 तेबे जोआब चो लोग आउर करेतीमन, पलेतीमन आउर सपाय बीरमन बिकरी चो बेटा सेबा के खेदुन नेतो काजे जरूसलेम ले निकरला। 8 हुनमन गिबोन चो बड़े पकना लगे अमरुन ची रला, आउर अमासा हुनमन के भेटुक ईलो। जोआब आपलो पलटन कुड़ता पींदुन रये। हुन करांडे पटा बांदुन रये आउर खांडा के सोलका ने भोरुन करांड-पटा ने खोचुन रये। जेबे जोआब पुरे गेलो तेबे हुनचो खांडा भुंये घसरली। 9 तेबे जोआब, अमासा के पुछलो, ए मोचो भाई काय तुय, अस्तिर ने आसीस? आउर हुन आपलो उजा हाथ लमाउन अमासा के चूमतो काजे हुनचो दाड़ी के धरलो। 10 मानतर जोआब चो डेबरी हाथे रलो खांडा चो अमासा धियान नी करलो आउर जोआब, हुनके पेट ने भूसलो। जेचोले हुनचो ओंडकी-पोटी भुंये घसरली, जोआब हुनके गोटकीचे हार भूसुन मोरालो।
तेबे जोआब आउर हुनचो भाई अबीसे, बिकरी चो बेटा सेबा चो पाट-पाट गेला।
11 जोआब बाटे चो गोटोक बीर, अमासा चो मोड़ी लगे उबा होउन बललो, “जोआब आउर दाउद बाट चो लोग, जोआब चो पाट-पाट होआ।” 12 अमासा, सड़क चो मंजी आपलो लोउ ने घोंडरते रये। लोगमन अमासा के दखुन कुड़ा होला। हुन बीर, लोग कुड़ा होतोके दखुन अमासा के सड़क ले बेड़ा बाटे नीलो, आउर हुन, हुनचो उपरे गोटोक फटई ढाकलो। 13 हुनके सड़क ले गुचालोके सपाय लोग बिकरी चो बेटा सेबा के खेदुन नेतो काजे जोआब चो पाट-पाट गेला।
सेबा चो मोरतोर
14 सेबा सपाय इसराएली बंस चो भुंय बाटले जाते-जाते बिकरीमन चो देस् बेत-माका चो आबेल सहर लगे अमरलो। हुताय बिकरी बंस चो सपाय लोगमन रूंडा होउन सेबा चो पाट-पाट गेला। 15 तेबे जोआब संग चो लोग ईला आउर सेबा रलो बेत-माका चो आबेल सहर चो भाड़ा चो भोंवरक छेकला। हुनमन सहर चो भाड़ा रेटे ले खुबे डेंग ने ढेला कुड़ाला आउर जोआब चो लोग भाड़ा के भोसड़ातो काजे ठेगलुक मुरियाला। 16 तेबे गोटोक बुदंती बायले सहर ले चिचियाउन बलली, “सुना, सुना, जोआब के एथा एउक बला, मय हुनचो संगे गोटेयायंदे।” 17 जोआब हुनचो लगे गेलो, तेबे बायले पूछली, “काय तुय जोआब आस?” हुन बललो, “हव मय, हुनी आय।” फेर हुन बलली, “आपलो कमेयीन चो गोट सुन।” हुन बललो, “मय सुनेंसे।” 18 हुन बलली, “आगे-जुग चो लोगमन बलते रला, ‘सला धरतोर होले आबेल ने जाउन पूछोत’, असने करुन झगड़ा के बुताते रओत। 19 मय तो मिलुन-मिसुन रतो आउर पतेयातो लाईक इसराएलिमन ले आय। मानतर तुय, इसराएल चो गोटोक माई-सहर के खातो काजे होयसीस। तुय जहोवा चो बाटा के काय काजे सत्यानास करसीस?” 20 जोआब बललो, “मय काई के खाउक नोहले सत्यानास करुक नी ईलेसे। 21 गोट असन आय, एपरेम डोंगरी परघन चो मनुक बिकरी चो बेटा सेबा, दाउद राजा चो बिरुद हाथ उठालोसे। एईकाजे तुमी हुनके ची आमके सोपुन दियास। फेर मय सहर के छांडुन जायंदे।” बायले जोआब के बलली, “हुनचो मुंड के भाड़ा उपर ले तुचो लगे पकाउन देयंदे।” 22 तेबे बायले आपलो बुद ले सपाय लोग संगे सोर होली, फेर हुनमन बिकरी चो बेटा सेबा चो मुंड के काटुन जोआब लगे पकाउन दिला। तेबे जोआब तोड़ी फूकलो आउर सपाय लोग सहर लग ले आपलाहान डेरामन ने गेला। जोआब जरूसलेम ने राजा लगे बोहड़ुन गेलो।
दाउद चो मुखियामन
23 जोआब, सपाय इसराएली पाईकमन चो मुखिया रलो आउर जहोयादा चो बेटा बनायाह, पलेतीमन आउर करेतीमन चो मुखिया रलो। 24 आउर अदोराम, बांदुन नीलो लोगमन चो मुखिया रलो। अहीलूद चो बेटा जहोसापात घटलो गोटमन के लिखु बीता रलो। 25 आउर सवा, लिखियार आउर सादोक आउर एबयातर पुजारीमन रला। 26 आउर जाईर बंस चो ईरा बले दाउद चो पुजारी रये।