जोआब, दाउद के खीजतोर
19
फेर जोआब के असन खबर मिरली, राजा, अबसालोम काजे करलाउन गागेसे। 2 सपाय सेना बले सुनला, “राजा आपलो बेटा काजे करलानी होयसे।” तेबे जुद ने जीतले बले दुख चो गोट होली। 3 जसन लोग जुद ले पराउन ईलोने लाज होउन थमना ढाकुआत उसने हुन दिने लोग थमना ढाकुन सहर ने ओलला। 4 आउर राजा थमना ढाकुन किरकिरुन-किरकिरुन बलते रये। “हाय, मोचो बेटा अबसालोम, हाय अबसालोम मोचो बेटा, ए मोचो बेटा।” 5 तेबे जोआब, राज-माहाल ने राजा लगे जाउन बलुक मुरियालो, “तुचो कमेयामन आजी तुचो आउर तुचो बेटा-बेटीमन चो आउर तुचो बायलेमन चो आउर राकलो बायलेमन चो जीव के बचाला। मानतर तुय आजी हुनमन सपाय के लाज पड़ालीस। 6 तुय आपलो बयरीमन के मया आउर आपनेके मया करतो लोग के बईर करुआस। तुय आजी एई दखायसीस कि तुके, तुचो मुखियामन आउर कमेयामन चो काई फिकिर नी आय। आजी मय सत जानले, आमी सपाय आजी मोरुन जातु आउर अबसालोम जीव रतो तो तुय खुबे हरिक होतीस। 7 एईकाजे एदांय उठुन बाहरी जा आउर आपलो कमेयामन के अस्तिर कर। नोहले मय जहोवा चो किरिया खाउन बलेसे तुय बाहरी नी गेलोने गोटोक मनुक बले तुचो संगे नी रदे। तुचो जुवान बेरा ले धरुन एबतले जितलो बिपती तुचो उपरे पड़लीसे, हुन सपाय बिपती ले आगर नोकसान ए बिपती ले होयदे।” 8 तेबे राजा उठुन देवड़ी लगे जाउन बसलो। जिदलदांय सपाय लोगमन के असन सांगला, राजा देवड़ी लगे बसलोसे, तेबे सपाय लोग राजा चो पुरे ईला। एई समया, इसराएलिमन आपलाहान घरे पराला।दाउद, जरूसलेम ने बोहड़तोर
9 इसराएल बंस चो सपाय लोग आपने-आपने झगड़ा होला आउर बला-बली होउन बलला, “राजा आमके आमचो बयरीमन चो हाथ ले बचालोसे, आउर पलिस्तीमन चो हाथ ले आमके छंडालोसे। एदांय हुनके अबसालोम चो डर किरता ए देस के छांडुक पड़ली। 10 मानतर अबसालोम जेके आमी आपलो राजा होतो काजे अबिसेक करलु, हुन तो जुद ने मोरलो। एदांय तुमी काय काजे ओगाय रउआस? दाउद राजा के बोहड़ाउन आनतो बिचार काय काजे नी करास?”
11 तेबे दाउद राजा, सादोक आउर एबयातर पुजारी के असन खबर पठालो, “जहूदा चो धरम-सियानमन के बला, ‘राजा के, आपलो राज-माहाल ने बोहड़ाउन आनतो काजे तुमी काय काजे झीकी होयसास? इसराएल चो गोट-बात राजा लगे अमरलीसे। 12 तुमी मोचेई भाई आस, आउर मोचेई हाड़-मास आहास, तेबे फेर राजा के बोहड़ाउन आनतो काजे काय काजे झीकी होयसास?’ 13 फेर अमासा के असन बला, ‘काय तुय मोचेई हाड़ा-मास नोआस? एदांय मय, तुके जोआब चो पलटा सेना मुखिया नी बनाले, महापरभु मोचो ले उसनेची नोहले हुनचोले बले आगर करो’।” 14 असन बलुन हुन सपाय जहूदीमन चो मन आपलो बाटे करलो। हुनमन गोटकी सोर होउन राजा लगे खबर पठाला, “तुय आउर तुचो सपाय कमेयामन बोहड़ुन इआ।” 15 तेबे दाउद बोहड़ुन जरदन नंदी खंडे अमरलो। जहूदा चो लोगमन राजा के भेटुक आउर हुनके जरदन नंदी चो ए पाट आनतो काजे गिलगाल ने ईला।
दाउद, सिमी के खेमा करतोर
16 बहूरीम ने रतो गेरा चो बेटा बिनयामीनी सिमी, जहूदा चो लोगमन संगे दाउद राजा के भेट होतो काजे झटके गेलो। 17 हुनचो संगे हजार बिनयामीनी मनुकमन रला आउर साउल चो कुटुम चो कमेया सीबा आपलो पंदरा झन बेटामन आउर बीस झन कमेयामन संगे रलो। हुनमन राजा ले आगे, जरदन चो हुन पाट अमरला। 18 हुनमन राजा चो कुटुम के नाहकाउन आनुक लागला आउर राजा चो सेवा करते रओत। जेबे राजा जरदन नंदी नाहकतो काजे नंदी खंडे ईलो, तेबे गेरा चो बेटा सिमी, राजा के डंडासरन करलो।
19 सिमी, राजा के बललो, ए मोचो परभु राजा, तुय जरूसलेम के छांडुन गेलो दिन ने, तुचो कमेया करलो अडरा बुता के सूरता नी कर आउर मोके दोखी नी मान। 20 कसनबलले तुचो कमेया जाने, मय पाप करले। दख! आपलो परभु राजा के भेट होतो काजे जूसुफ चो कुटुम ले आजी सबुले आगे मय ची ईलेसे। 21 तेबे सरूयाह चो बेटा अबीसे बललो, “सिमी जहोवा चो अबिसेक होलो मनुक के सरापलो किरता काय, हुनके मोरते मारतोर नी रली?” 22 मानतर दाउद बललो, “ए सरूयाह चो बेटामन, मोके तुमचोले काय आय? तुमी, काय काजे आजी मोचो बयरी होयसाहास? काय आजी इसराएल ने कोकेई मोरते मारतोर आय? काय, मय नी जाने, आजी मय इसराएल चो राजा होलेसे?” 23 फेर राजा सिमी के बललो, “तुके कोनी नी मारदे।” आउर राजा हुनचो संगे किरिया खादलो।
दाउद, मपीबोसेत उपरे दया दखातोर
24 फेर साउल चो पुती मपीबोसेत, राजा के भेट होउक ईलो। राजा गेलो दिन ले धरुन हुन अस्तिर ले एओतले मपीबोसेत खिसियाउन आपनेके नी जतनालो बललोने, आपलो पांय चो नक नी काटलो, आपलो दाड़ी नी बनालो, आउर आपलो फटई के बले नी धोआलो। 25 जिदलदांय हुन जरूसलेम ले राजा के भेटुक ईलो, तेबे राजा हुनके पूछलो, “ए मपीबोसेत, तुय मोचो संगे काय काजे नी गेलीस?” 26 हुन बललो, “ए मोचो परभु, ए राजा, मोचो कमेया मोके ठगलो। मय हुनके बलले, ‘मोचो गदाहा ने काटी बांध, मय हुता बसुन राजा संगे जायंदे’। तुय तो जानीस, मय तुचो कमेया खोड़ेया आय। 27 हुन, मोचो परभु राजा चो पुरे मोचो खुद खादलोसे। मानतर मोचो परभु राजा, महापरभु चो दूत असन आय। एईकाजे जसन तुके भायसे, उसने कर। 28 मोचो बुआ चो सपाय कुटुम-लोग मोचो परभु राजा चो हाथ ले मोरना डंड पावतो लाईक रला। मानतर तुय आपलो कमेया के आपलेई संगे बसुन खातो मान दिलो। फेर मोके एचोले आगर गुहारतोर काय हक आसे?” 29 राजा हुनके फेर बललो, “तुय ए गोटमन काय काजे बलसीस? मय पक्का मन बनालेसे, हुन भुंय-बाड़ी के तुय आउर सीबा बाटा करा।” 30 मानतर मपीबोसेत बललो, “सपाय भुंय-बाड़ी के सीबा ची धरो, कसनबलले मोचो परभु राजा आपलो राज-माहाल ने अस्तिर ने बोहड़लोसे।”
दाउद, बरजिलय के दया दखातोर
31 तेबे गिलादेया बरजिलय, रोगलीम सहर ले ईलो आउर राजा संगे जरदन नंदी चो हुन पाट गेलो। 32 बरजिलय तो अस्सी बरक चो डोकरा रये। जितलो दिन राजा, नानी सहर महनेम सहर ने रलो, हुतलो दिन हुन, राजा काजे खादी-पीदी अमराते रये। कसनबलले हुन खुबे सवकार रये। 33 तेबे राजा, बरजिलय के बललो, “मोचो संगे जरूसलेम ने जो, आउर मय तुके आपलो संगे संगाउन तुचो दखा-रखा करेंदे।” 34 मानतर बरजिलय, राजा के बललो, “मय आउर कितलो दिन जीउआंय ता कि मय राजा संगे जरूसलेम ने जायंदे? 35 एबे मय अस्सी बरक चो आसे, काय, मय नंगत-अडरा के समजुक सकें? काय, तुचो कमेया जोन बले खाउ-पीउं आय, हुनचो सुवाद चिताउक सकें? काय, गावतो मनुक आउर बायलेमन चो राग एदांय सुनुक होयंदे? तेबे फेर काय काजे मोचो परभु राजा काजे, तुचो कमेया बोजा बनुआय? 36 तुचो कमेया, राजा संगे जरदन चो हुन पाट खिंडिक ची लापी जायदे, राजा मोके एचो बड़े पलटा काय काजे देयदे? 37 मय आपलो ए नानी सहर ने ची मोरेंदे जोन थाने आपलो आया-बुआ चो मोठ आसे। एईकाजे आपलो कमेया के बोहड़ुक देस, मानतर तुचो कमेया किमहाम एई लगे आसे, हुनके मोचो परभु राजा संगे जाउक देस आउर जसन तुके भायसे उसनेची हुनचो संगे कर।” 38 राजा बललो, “हव, किमहाम मोचो संगे जायदे आउर जसन तुय मन करसीस उसनेची मय हुनचो संगे करेंदे, आउर तुय जोन बले मोचोले मन करसीस हुनके मय तुचो काजे करेंदे।” 39 फेर सपाय लोग जरदन चो हुन पाट नाहकला, तेबे राजा बरजिलय के चूमुन बर दिलो, आउर हुन आपलो घरे बोहड़ुन गेलो।
राजा चो बारे ने जहूदी आउर इसराएलिमन चो मंजी बला-बली
40 तेबे राजा गिलगाल बाटे गेलो आउर हुनचो संगे किमहाम बले गेलो। सपाय जहूदीमन आउर आदो इसराएलिमन बले राजा संगे गेला।
41 तेबे आदो इसराएलिमन, दाउद राजा लगे ईला आउर राजा के बलला, “काय काजे आमचो जहूदी भाईमन, तुके लुकाउन नीला आउर तुके, आपलो राज-कुटुम के आउर तुचो सपाय लोग के जरदन नाहकाउन आनलासोत?” 42 सपाय जहूदा चो लोगमन, इसराएलिमन के बलला, “राजा तो आमचो बंस चो आय, तुमी एई गोट किरता काय काजे रीसालासाहास? काय आमी राजा चो काई लागा खादलुसे, नोहले हुन आमके काई दिलोसे?” 43 मानतर इसराएलिमन, जहूदीमन के बलला, “राज ने आमचो दस बाटा आसे, आउर आमके दाउद राजा ले बलतो हक बले तुमचोले दस गुना आगर आसे। फेर काय काजे तुमी आमके हेला समजलासाहास? राजा के बोहड़ातो गोट सबुले आगे काय आमी नी बललु?” मानतर जहूदीमन चो बलतोर इसराएलिमन चो बलतो ले आगर होली।