एजरा
जहूदीमन, बेबिलोन ले जरूसलेम ने बोहड़तोर
1
फारस राज ने कुसरू राजा राज करते रये। हुनचो राजपाट चो पईल बरक ने जहोवा, राजा चो मन के उकसालो कि जरमियाह बाटले जहोवा दिलो बचन पूरा होओ। एईकाजे कुसरू राजा आपलो सपाय राजमन ने, डारा बुलाउक आउर ए गोट के लिखुन पठातो काजे बललो:2 “फारस चो राजा कुसरू असन बलेसे; सरग चो महापरभु जहोवा, मंजपुर चो सपाय राजमन के मोके दिलोसे, आउर जहूदा परघन चो जरूसलेम ने हुनचो काजे गोटोक मंदिर बनातो काजे हुकुम दिलोसे। 3 एईकाजे हुनचो रयत ले कोनी बले तुमचो मंजी आसे जाले, हुनचो महापरभु हुनचो संगे रओ। हुन जहूदा परघन चो जरूसलेम ने जाउन इसराएल चो महापरभु जहोवा चो मंदिर जतनाओ। कसनबलले जोन महापरभु जरूसलेम ने आसे हुनी महापरभु आय। 4 बाचलो जहूदीमन जोन थाने बले आसोत हुनमन के, हुनी थाने रतो जात-जात चो लोगमन, जरूसलेम ने महापरभु चो मंदिर बनातो काजे सोन-रूप, जाय-जमक आउर पसुमन के देओत आउर आपलो मन-इछा असन धन-धन भेंट देओत।”
5 तेबे जहूदा आउर बिन्यामीन बंस चो कुटुम-मुखियामन, पुजारीमन आउर लेवीमन के महापरभु, हुनचो मंदिर बनातो काजे जरूसलेम ने जाउक उकसालो आउर हुनमन जातो काजे तियार होला। 6 तेबे हुनमन चो लगे रतो लोगमन, आपलाहान मन-इछा ले दिलो भेंटमन संगे रूपा चो नकी-भंडवा, सोन, धन, पसुमन आउर खुबे मोल चो तीजमन दिला। 7-8 नबूकदनेसर राजा, जरूसलेम चो महापरभु चो मंदिर ले नकी-भंडवा के निकराउन आपलो देव-गुड़ी ने संगाउन रये। फारस चो कुसरू राजा हुन नकी-भंडवामन के हुताले निकराउन मितरदात भंडारी चो हक ने दिलो। मितरदात भंडारी हुन नकी-भंडवामन के गनुन जहूदी सेसबस्सर नाव चो मुखिया के सोपुन दिलो। 9 हुनमन चो गनती इतलो रली, एक कोड़ी दस सोन चो परात आउर रूपा चो एक हजार परात आउर एक कोड़ी नव ठन कडरी। 10 सोन चो एक कोड़ी दस बटका, रूपा चो बटकामन चार सव दस, आउर नकी-भंडवामन एक हजार। 11 सोन आउर रूपा चो नकी-भंडवामन के जोड़ुन पांच हजार चार सव रली।
जिदलदांय कयदीमन बेबीलोन ले जरूसलेम ने ईला, तेबे सेसबस्सर ए सपाय के जरूसलेम ने आनलो।