दाउद, जहूदा चो राजा बनतोर
2
एचो पाछे दाउद, जहोवा के पूछलो, “काय, मय जहूदा देस् चो कोनी सहर ने जायंदे?” जहोवा हुनके बललो, “हव, जा।” दाउद फेर पूछलो, “कोन सहर ने जायंदे?” हुन बललो, “हेबरोन ने जा!” 2 तेबे दाउद आपलो दुनो बायले, जिजरेलीन अहीनोअम आउर करमेलीया नाबाल चो रांडी बायले अबीगेल संगे हुता गेलो। 3 दाउद आपलो संग चो लोग के आपलो-आपलो घर-लोग संगे हुता नीलो; आउर हुनमन हेबरोन चो सहरमन ने रउक मुरियाला। 4 तेबे जहूदा चो लोग हुता जाउन, जहूदा बंस चो राजा होतो काजे दाउद चो अबिसेक करला।जिदलदांय हुनमन, दाउद के बलला, “साउल के माटी दिलो लोग गिलाद चो जाबेस सहर चो आत।” 5 तेबे दाउद, दूतमन के पठाउन गिलाद चो जाबेस सहर चो लोगमन के बललो, “जहोवा तुमके बर देओ, कसनबलले तुमी आपलो राजा साउल उपरे दया करुन हुनके माटी दिलास! 6 एदांय जहोवा तुमचोले सत-मया आउर पतेयातो लाईक रओ; तुमी ए बुता करलो किरता मय बले तुमचो भलई करेंदे। 7 एईकाजे तुमी ढाढ़ुस करा, कसनबलले तुमचो राजा साउल मोरलो आउर एबे जहूदा बंस चो लोग मोके आपलो राजा बनातो काजे अबिसेक करलासे।”
ईसबोसेत के इसराएल चो राजा बनातोर
8 मानतर नेर चो बेटा अबनेर, साउल चो सेना-मुखिया रये, हुन, साउल चो बेटा ईसबोसेत के महनेम ने नीलो; 9 आउर हुनके गिलादीमन, असूरीमन, जिजरेलीमन, एपरेमीमन, बिनयामीनीमन आउर सपाय इसराएलिमन उपरे राजा बनालो। 10 साउल चो बेटा ईसबोसेत चालीस बरक चो रलो बेरा, इसराएल ने राज करुक मुरियालो आउर हुन दुय बरक राज करलो, मानतर जहूदा चो बंस, दाउद के राजा मानला। 11 दाउद, हेबरोन ने जहूदा बंस चो लोग उपरे सात बरक छय मयना राज करलो।
जहूदा आउर इसराएल चो मंजी जुद
12 नेर चो बेटा अबनेर संगे साउल चो बेटा ईसबोसेत चो कमेयामन बले महनेम ले गिबोन ने गेला। 13 तेबे सरूयाह चो बेटा जोआब आउर दाउद संग चो लोग हुनमन के गिबोन चो मुंडा लगे भेटला; आउर दुनो लोग गोहड़ी मुंडा चो ए पाट-हुन पाट बसला। 14 अबनेर, जोआब के बललो, “जुवानमन उठुन आमचो पुरे लड़ई करोत।” तेबे जोआब बललो, “हव, हुनमन उठोत।” 15 हुनमन उठतोदांय, बिनयामीन बंस ले साउल चो बेटा ईसबोसेत बाटले बारा झन के आउर दाउद संग चो लोगमन ले बारा झन के गनला। 16 हुनमन गोटोक-दुसर चो मुंडी धरुन आपलाहान खांडा ले गोटोक-दुसर चो पंजरा ने भूसला; आउर हुनमन गोटकी संगे मोरला। एईकाजे हुन ठान चो नाव हेलकत-हसुरीम* पड़ली, ए ठान गिबोन ने आसे। 17 हुनी दिने खुबे बड़े जुद होली; दाउद आउर हुनचो संग चो लोगमन, अबनेर आउर इसराएल चो मनुकमन के हराला।
18 हुता सरूयाह चो तीन झन बेटामन, जोआब, अबीसे आउर असाहेल रला। असाहेल रान-चीतर असन रोस ने पराउक सकते रये। 19 तेबे असाहेल, अबनेर के खेदुक मुरियालो; आउर हुन डेबरी नोहले उजा बाटे नी जाउन हुनकेची खेदते नीलो। 20 अबनेर पाटकुती उलटुन दखलो आउर पूछलो, “काय, तुय असाहेल आस?” हुन बललो, “हव, मय हुनी आंय।” 21 अबनेर हुनके बललो, “डेबरी नोहले उजा बाटे जाउन कोनी दुसर जुवान चो हतियार के झीक।” मानतर असाहेल हुनके खेदुक नी छांडलो। 22 अबनेर फेर असाहेल के बललो, “मोके खेदुक छांड, मय तुके काय काजे मारेंदे? असन करले मय तुचो भाई जोआब के कसन भेट होयंदे?” 23 फेर बले हुन खेदुक नी छांडलो; तेबे अबनेर आपलो भाला चो ढेटा संगे हुनचो पेट ने असन भूसलो कि भाला हुनचो पेट के छिंगड़ुन हुन पाट निकरली; आउर हुन हुताय घसरुन मोरलो। जितलो लोग असाहेल घसरुन मोरलो ठाने अमरला, हुनमन सपाय हुता चमकनांय ठेबला।
24 मानतर जोआब आउर अबीसे, अबनेर के खेदते रला; आउर बेर बुड़तो बेरा हुनमन अम्माह नाव चो डोंगरी लगे अमरला जोन गिबोन चो टंग-टंगा भाटा चो बाट ने गीह चो पुरे आसे। 25 बिनयामीनी मनुकमन अबनेर चो पाटेया होउन गोटोक गोहड़ी होला, आउर डोंगरी टीपे पाती बांधुन उबा होला। 26 तेबे अबनेर, जोआब के हागदेउन बललो, “काय तुय नी जानीस, खांडा अमदेया मारते रले, एचो पलटा तुके तकलीस ची मिरेदे? तुय केबतले आपलो लोग के, आपलो भाईमन के खेदुक छांडुन बोहड़तो हुकुम देउआस?” 27 जोआब बललो, “महापरभु चो किरिया तुय असन नी बल्लीस जाले लोगमन बियान होओतले आपलो भाईमन के खेदता।” 28 तेबे जोआब तोड़ी फूकलो; आउर जुद थामली आउर फेर हुनमन इसराएलिमन के नी खेदला।
29 अबनेर आपलो लोग संगे हुनी दिने राती बेरा अराबा बाटले गेलो; आउर हुनमन, जरदन के नाहकुन मुंडे बेरा होओतले हिंडुन महनेम ने अमरला। 30 जोआब, अबनेर के खेदुक छांडुन बोहड़लो; आउर हुन सपाय लोग के रूंडाउन दखलो कि दाउद संग चो लोगमन ले उन्नीस झन मनुक आउर असाहेल बले नीआय। 31 मानतर दाउद संग चो लोगमन, अबनेर संग चो लोगमन ले तीन सव साठ झन बिनयामीनीमन के मोरते मारला। 32 हुनमन असाहेल चो मोड़ी के बेतलहम ने हुनचो बुआ चो मोठ लगे माटी दिला*। तेबे जोआब आपलो संग चो लोग संगे रात भर हिंडुन बड़े बियाने हेबरोन अमरलो।