3
साउल आउर दाउद चो कुटुम चो मंजी खुबे दिन ले लड़ई होते रली; मानतर दाउद जीतते गेलो, आउर साउल चो कुटुम निमल पड़ते गेली।दाउद चो बेटामन
2 हेबरोन ने जनमलो दाउद चो बेटामन: हुनचो पईलात बेटा अमनोन रये, हुनचो आया जिजरेलीन अहीनोअम रये; 3 दाउद चो दुसर बेटा किलाब रये, किलाब चो आया करमेलीया नाबाल चो रांडी बायले अबीगेल रये; तीसर बेटा अबसालोम रये, हुनचो आया गसूर चो राजा तलमय चो बेटी माका रये; 4 चवथा बेटा अदोनियाह रये, हुनचो आया हगीत रये; पांचवां बेटा सपतयाह रये हुनचो आया अबीतल रये; 5 छटवां बेटा जितराम रये हुनचो आया एगला रये। हेबरोन ने जनमलो दाउद चो बेटामन एईमन आत।
अबनेर, दाउद बाटे होतोर
6 साउल आउर दाउद दुनो चो कुटुम मंजी लड़ई होतो बेरा अबनेर, साउल चो कुटुम लोग ले सबुले बरसक बीर बनते रये। 7 साउल काजे रिसपा नाव चो गोटोक राकलो बायले रये, हुन अय्याह चो बेटी रये। ईसबोसेत, अबनेर के पूछलो, “तुय मोचो बुआ चो राकलो बायले लगे काय काजे गेलीस?” 8 ईसबोसेत चो गोटमन किरता अबनेर खुबे रीस होउन बललो, “काय, मय जहूदा चो लुचुर-लुचुर बुलतो कुकुर आंय? मय, तुचो बुआ साउल चो कुटुम आउर हुनचो भाईमन आउर संगवारीमन काजे अमदेया पतेयातो लाईक रयंसे, आउर तुके दाउद चो हक ने होउक नी दिले; फेर तुय मोके हुन बायले संगे काय काजे दोख लगायसीस? 9-10 महापरभु, दाउद संगे करलो किरिया असन मय अबनेर, साउल चो कुटुम ले राजपाट के झिकुन दाउद चो राजगादी के, दान ले धरुन बेरसेबा* लगले बललोने, इसराएल आउर जहूदा उपरे चमकट नी करले जाले महापरभु मोचो संगे उसने ची नोहले हुनचो ले बले आगर करो!” 11 ईसबोसेत, अबनेर के गोट उलटाउक नी सकलो, कसनबलले हुन अबनेर के डरते रये।
12 तेबे अबनेर, हेबरोन ने दाउद लगे दूतमन ले असन बलुन पठालो, “ए देस् कोचो आय? तुय मोचो संगे बायदा कर, मय तुचो साहरा करेंदे आउर सपाय इसराएलिमन चो मन तुचो बाटे करेंदे।” 13 दाउद बललो, “हव, मय तुचो संगे बायदा करेंदे; मानतर मोचो संगे भेट होउक एतो बेरा, तुय साउल चो बेटी मीकल के संगे नी आनलीस जाले तुय मोके भेटुक नी सकसे।” 14 फेर दाउद, साउल चो बेटा ईसबोसेत लगे दूतमन पठाउन ए खबर दिलो, “मोचो बायले मीकल के मोके देस, जेके मय एक सव पलिस्तीमन चो टेपा के पलटा ने देउन आनुन रयें।” 15 तेबे ईसबोसेत, लोगमन के पठाउन मीकल के, हुनचो मनुक लइस चो बेटा पलतीएल थान ले झिकुन आनलो। 16 मानतर हुनचो मनुक बहूरीम लगले, हुनचो पाट-पाट गागते गेलो। तेबे अबनेर हुनके बललो, “बोहड़ुन जा!” तेबे हुन बोहड़ुन गेलो।
17 फेर अबनेर, इसराएल चो धरम-सियानमन लगे असन बललो, “आगे तुमी मन करते रलास कि दाउद तुमचो राजा बनो। 18 एदांय उसने ची करा; कसनबलले जहोवा, दाउद चो बारे ने बललोसे, मय मोचो कमेया दाउद बाटले मोचो इसराएली रयत के, पलिस्तीमन आउर हुनमन चो सपाय बयरीमन ले बचायंदे।” 19 अबनेर, बिनयामीनीमन संगे बले गोटेयालो; पाछे अबनेर, इसराएल आउर बिन्यामीन चो सपाय कुटुम के नंगत लागलो गोट के सांगतो काजे दाउद लगे हेबरोन ने गेलो।
20 अबनेर बीस झन मनुकमन संगे हेबरोन ने ईलोदांय दाउद, अबनेर आउर हुनचो संगे ईलो मनुकमन के भोज करालो। 21 अबनेर, दाउद के बललो, “मय जायंदे आउर मोचो परभु राजा लगे इसराएल चो सपाय लोग के रूंडायंदे कि हुनमन तुचो संगे बायदा करोत आउर तुय आपलो मन इछा ले राज कर।” तेबे दाउद, अबनेर के बिदा करलो आउर हुन अस्तिर ने गेलो।
अबनेर के जोआब मारतोर
22 हुदलीदांय दाउद चो कमेयामन आउर जोआब गोटोक जुद जीतुन ईला आउर झीका-उड़मा करलो खुबे धन-माल के आनला। मानतर अबनेर, हेबरोन ने दाउद संगे नी रये, कसनबलले दाउद हुनके बिदा करुन रये, आउर अबनेर अस्तिर ने जाउन रये। 23 जिदलदांय जोआब आउर हुनचो संगे सपाय सेना ईला, तेबे लोगमन जोआब के सांगला, “राजा लगे नेर चो बेटा अबनेर एउन रये, आउर राजा हुनके बिदा करलो, आउर हुन अस्तिर ने गेलो।” 24 तेबे जोआब, राजा लगे जाउन बललो, “तुय ए काय करलीस? अबनेर तुचो लगे एउन रये; काय काजे तुय हुनके जाउक दिलीस? 25 तुय नेर चो बेटा अबनेर के जानीस, हुन तुके धोका देउक एउ रये, आउर तुचो इयार-जाहार आउर सपाय बुता के जानुक एउ रये।”
26 जिदलदांय जोआब, दाउद लगले निकरलो, तेबे अबनेर चो पाट-पाट दूतमन पठालो, आउर दूतमन हुनके सीराह नाव चो चुंआ लगले बोहड़ाउन आनला; मानतर दाउद ए गोट के नी जाने। 27 अबनेर, हेबरोन ने बोहड़ुन ईलो, तेबे जोआब हुनचो संगे एकला गोटेयातो काजे हुनके देवड़ी लगे चो बाकरा ने नीलो, आउर हुनके पेटे भूसुन मोरालो। असने हुन, आपलो भाई असाहेल के मारलो पलटा धरलो। 28 पाछे ए गोट के सुनुन दाउद बललो, “नेर चो बेटा अबनेर चो लोउ चो बारे ने, ‘मय आउर मोचो रयत जहोवा चो पुरे अमदेया दोख नोहलोर रउंदे’। 29 जोआब आउर हुनचो बुआ चो सपाय कुटुम उपरे ए दोस चो सराप लागो, जोआब चो थर ने कोनी नोहले कोनी झरनी बीता, कोढ़ बीता, खोड़ेया-माटेया बीता, खांडा ले मोरतो बीता आउर भूके मोरतो बीता अमदेया होते रदे।” 30 जोआब आउर हुनचो भाई अबीसे पलटा धरतो काजे अबनेर के मोरते मारला। कसनबलले अबनेर, गिबोन ने लड़ई होतो बेरा असाहेल के मारुन रये।
अबनेर के माटी देतोर
31 तेबे दाउद, जोआब आउर हुनचो संग चो लोग के बललो, “आपलो फटई चीरा आउर पोता बांधुन अबनेर काजे करलाहा।” आउर राजा अबनेर चो टरंडी पाटे-पाटे हिंडलो। 32 हुनमन अबनेर के हेबरोन ने माटी दिला। राजा, अबनेर चो मोठ लगे खुबे जोर ले गागलो; आउर सपाय लोग बले गागला। 33 राजा, अबनेर काजे ए करलानी गीत गावलो,
“काय, अबनेर के गोटोक भकवा असन मोरतोर रली?
34 कोनी तुचो हाथ के नी बांदला,
आउर तुचो पांय के बले सिकरा नी धराला;
जसन कोनी दुसट चो हाथे पड़ुआय,
उसने तुय बले पड़लीस।”
आउर सपाय लोग हुनचो काजे फेर गागला। 35 सांज होतोके सपाय लोग दाउद के रोटी खुआउक ईला। मानतर दाउद किरिया खाउन बललो, “मय बेर बसतो ले आगे रोटी नोहले काई दुसर तीज खादले जाले महापरभु मोचो संगे अबनेर चो असन नोहले हुनचो ले बले आगर करो।!” 36 सपाय लोग ए गोट उपरे हरिक होला, कसनबलले जोन बले राजा करते रये हुनचो ले सपाय लोग हरिक होते रला। 37 एईकाजे हुन सपाय लोगमन आउर इसराएल चो सपाय लोगमन बले हुन दिने जानला कि नेर चो बेटा अबनेर के राजा नी मोराये। 38 राजा आपलो कमेयामन के बललो, “काय तुमी नी जानास, आजी इसराएल ने गोटोक मुखिया आउर नाव कमालो मनुक मोरलोसे? 39 मय जहोवा चो अबिसेक करलो राजा आंय, फेर बले आजी मय निमल होलेसे; सरूयाह चो बेटामन मोचो ले आगर बरसक आत। जहोवा अडरा बुता करुमन के हुनमन चो अडरा बुता हिसाब ले पलटा देयदे।”