ईसबोसेत के मारतोर
4
अबनेर के हेबरोन ने मारलो खबर साउल चो बेटा ईसबोसेत सुनलोके हुन खुबे डरलो, आउर सपाय इसराएलिमन बले खुबे डरला। 2 झीका-उड़मा करतो पलटनमन चो दुय झन मुखियामन साउल चो बेटा ईसबोसेत चो हक ने रला; एकलो चो नाव बानाह, आउर दुसर चो नाव रेकाब रये, ए दुनो बेरोतेया बिनयामीनी मनुक रिम्मोन चो बेटामन रला (बेरोत सहर बले बिन्यामीन बंस चो भुंय-बाटा आय; 3 बेरोतेयामन, गितेइम ने पराला, आउर एबतले हुताय परदेसिया होउन रयसोत)।4 जोनातान चो गोटोक बेटा खोड़ेया रये, हुन साउल चो नाती रये। जिजरेल ले साउल आउर जोनातान चो मोरलो खबर ईलो बेरा हुन पांच बरक चो रये; हुदलदांय हुनचो दाईमा हुनके उठाउन हरबर ने परातो बेरा, हुन घसरुन खोड़ेया होलो, हुनचो नाव मपीबोसेत रये।
5 गोटोक दिने, बेरोतेया रिम्मोन चो बेटामन, रेकाब आउर बानाह मुंडे बेरा, ईसबोसेत बिसातो बेरा हुनचो घरे ईला। 6-7 गउं नेतो काजे ईलुसे बलुन हुनचो घरे ओलला। हुदलदांय ईसबोसेत आपलो खटेया ने सोउन रये। हुनमन हुनके पेटे भूसुन मोरते मारला; हुनचो टोडरा के काटुन मुंड के धरुन रेकाब आउर हुनचो भाई बानाह गुलाय राती हिंडते-हिंडते अराबा बाटले गेला। 8 हुनमन ईसबोसेत चो मुंड के हेबरोन ने दाउद लगे नेउन बलला, “दख, तुचो बयरी साउल तुचो जीव धरुक खोजते रये, ए हुनचो बेटा ईसबोसेत चो मुंड आय; आजी चो दिने, साउल आउर हुनचो बंस ले जहोवा, आमचो परभु राजा काजे पलटा धरलोसे।”
9 दाउद, बेरोतेया रिम्मोन चो बेटामन, रेकाब आउर हुनचो भाई बानाह के बललो, “मोचो जीव के सपाय बिपती ले छंडाउ जहोवा चो किरिया, 10 जिदलदांय सिकलग ने कोनी मोके सांगलो, ‘दख, साउल मोरलोसे’, आउर हुन बिचारलो कि हुन हरिक चो खबर आनलोसे, तेबे मय हुनके धरुन मारले। मय हुनचो खबर चो एई पलटा दिले। 11 फेर एबे दुसट मनुकमन गोटोक दोख नोहलो मनुक के हुनचेई घरे, आपलो खटेया ने सोवलो बेरा मारला, एदांय पक्का मय हुनचो लोउ चो पलटा तुमचो ले धरेंदे, मय मंजपुर ले तुमके नास करेंदे।” 12 दाउद, पलटनमन के हुकुम दिलो, आउर पलटनमन हुनमन के मारुन हाथ-पांय के गोंदला, आउर हुनमन चो मोड़ीमन के हेबरोन चो मुंडा लगे ओराउन दिला आउर ईसबोसेत चो मुंडी के हेबरोन ने अबनेर चो मोठ लगे माटी दिला।