दाउद, इसराएल आउर जहूदा चो राजा बनतोर
5
इसराएल चो सपाय बंस चो लोग हेबरोन ने दाउद लगे एउन बलला, “सुन, आमी आउर तुय गोटकी हाड़ा-मास चो आंव। 2 साउल आमचो राजा रलो बेरा बले इसराएल के बाट दखाउ तुय ची रलीस; जहोवा तुके बललो, तुय ची इसराएली रयत चो दखा-राखा करु आउर इसराएल चो राज करु होसे।” 3 तेबे सपाय इसराएली धरम-सियानमन हेबरोन ने राजा लगे ईला आउर दाउद राजा हुनमन संगे हेबरोन ने जहोवा पुरे बायदा करलो, हुनमन दाउद के इसराएल चो राजा होतो काजे अबिसेक करला। 4 दाउद राज करुक मुरियालो बेरा हुन तीस बरक चो रलो, आउर चालीस बरक राज करलो। 5 हुन हेबरोन ने रउन, जहूदा उपरे सात बरक छय मयना राज करलो, आउर एक कोड़ी तेरा बरक जरूसलेम ने सपाय इसराएल आउर जहूदा उपरे राज करलो।6 तेबे राजा आउर हुनचो संग चो लोग जरूसलेम जाउन हुता चो जबूसीमन ले जुद करलो। हुनमन, दाउद एता ओलुक नी सके समजुन हुनके बलला, “तुय एता ओलुक नी सकसे, तुके तो कानामन आउर खोड़ेयामन ची बाहरे ठेबादे।” 7 मानतर दाउद, सियोन नाव चो राज-भाड़ा के धरलो, हुनके दाउदपुर बले बलुआत। 8 हुन दिने दाउद बललो, “जोन बले जबूसीमन के मारुक मन करसोत हुनमन नाहार बाटले चेगा, आउर दाउद घिनियातो कानामन, खोड़ेयामन के मारा।” एईकाजे ए कहका बनली, “कानामन आउर खोड़ेयामन मंदिर ने नी एओत।” 9 दाउद राज-भाड़ा ने रउक मुरियालो आउर हुनचो नाव दाउदपुर संगालो। दाउद, मिल्लो ले धरुन हुन सहर चो भोंवरक जतनालो। 10 असन बरन ले दाउद खुबे नाव कमालो, कसनबलले सेनामन चो जहोवा हुनचो संगे रये।
11 तेबे सोर चो राजा हीराम, दाउद लगे दूतमन पठाला आउर, देवदार रूक चो दारु, कारिगरीमन आउर मिसतरीमन के बले पठालो, हुनमन दाउद काजे गोटोक माहाल बनाला। 12 दाउद जानलो, जहोवा हुनके इसराएल चो राजपाट ने चमकट करलोसे, आउर हुन आपलो इसराएली रयत किरता हुनचो राज चो बाड़ती करलोसे।
13 दाउद, हेबरोन ले जरूसलेम ने एउन हुता चो बायलेमन के बिया होलो, आउर खुबे दुसर बायलेमन के राकलो; आउर दाउद के खुबे आउर बेटा-बेटीमन होला। 14 जरूसलेम ने जनमलो हुनचो पिलामन चो नाव ए आय: सम्मू, सोबाब, नातान, सुलेमान, 15 जिभार, एलीसू, नेपेग, जापी, 16 एलीसामा, एलयादा आउर एलीपेलेत।
दाउद, पलिस्तीमन के जीततोर
17 इसराएल चो राजा होउन दाउद चो अबिसेक होलीसे बलुन सुनलोके सपाय पलिस्तीमन दाउद के डगराउक निकरला; ए गोट सुनुन दाउद आपलो रतो ठान ले राज-भाड़ा ने गेलो। 18 तेबे पलिस्तीमन रपाईम नाव चो घाटी ने एउन गुलाय बाटे बिगरला। 19 तेबे दाउद, जहोवा के पूछलो, “काय मय पलिस्तीमन ले जुद करेंदे? काय तुय हुनमन के मोचो हक ने करसे?” जहोवा, दाउद के बललो, “जुद कर, कसनबलले पलिस्तीमन के मय पक्का तुचो हक ने करेंदे।” 20 तेबे दाउद गेलो, आउर पलिस्तीमन के हुताय हरालो आउर बललो, “जहोवा पूर-पानी ईलो असन एउन मोचो बयरीमन के मोचो पुरे ले मोरालो।” एईकाजे हुन ठान चो नाव बाल-परासीम संगालो। 21 हुता पलिस्तीमन आपलो मूरतमन के छांडला, आउर दाउद आउर हुनचो संग चो लोग हुनमन के बेचुन नीला।
22 दुसर हार फेर पलिस्तीमन जुद करतो काजे रपाईम घाटी ने एउन पाती बांदला। 23 दाउद, जहोवा के पूछलोदांय हुन सांगलो, “तुमी हुनमन पुरे ले जुद नी कर, हुनमन के पाटकुती ले बेड़ आउर मोखा रूकमन बाटले जाउन हुनमन ले जुद कर। 24 जिदलदांय तुमके मोखा रूक उपर ले सेनामन एतो असन सुना देयदे हुदलीदांय तुमी चेत करा। कसनबलले पलिस्तीमन चो सेना के मारतो काजे जहोवा तुमचो पुरे गेलोसे।” 25 जहोवा चो ए हुकुम हिसाब ने दाउद, गिबा ले धरुन गेजेर अमरतले पलिस्तीमन के मारते गेलो।