जरूसलेम ने बायदा चो डोली
6
दाउद फेर गोटोक हार इसराएल चो बाछलो सपाय तीस हजार बड़े-बड़े बीरमन के रूंडालो। 2 तेबे दाउद आउर हुनचो संग चो सपाय लोग जहूदा परघन चो बाले सहर ने महापरभु चो डोली के आनतो काजे गेला, जेके करूबमन* उपरे बसलो सेनामन चो जहोवा चो बायदा चो डोली बलुआत। 3-4 हुनमन डोंगरी ने रतो अबीनादाब चो घर ले महापरभु चो डोली के निकराउन गोटोक नवा गाड़ा ने चेगाला; आउर अबीनादाब चो दुय झन बेटामन उज्जा आउर अह्हो, महापरभु चो डोली संगालो गाड़ा के चलाउक मुरियाला आउर अह्हो हुनचो पुरे-पुरे हिंडलो। 5 दाउद आउर इसराएल चो सपाय कुटुम-लोग सपाय बरन चो बाजामन आउर किंदरी बाजा, सारंगी, डफली, डमरु आउर झांज बजाते जहोवा पुरे हरिक ले नाचला।6 हुनमन नाकोन नाव चो मनुक चो कोठारे अमरलो बेरा, बयलामन धोकड़ला। तेबे उज्जा आपलो हाथ लमाउन महापरभु चो डोली के थापलो। 7 जहोवा खुबे रीस होलो आउर उज्जा, महापरभु चो डोली बाटे हाथ लमालो किरता हुताय मोरलो। 8 जहोवा, उज्जा के मारलोके दाउद मुरमुरा होलो; एईकाजे हुन ठान चो नाव पेरस-उज्जा संगालो, हुन एबे बले आसे। 9 हुनी दिने दाउद, जहोवा के डरलो आउर बललो, “जहोवा चो बायदा चो डोली के मय कसन नेयंदे?” 10 एईकाजे दाउद, जहोवा चो डोली के आपलो राज-भाड़ा दाउदपुर ने नेउक मन नी करलो; मानतर गत्ती ओबेद-एदोम चो घरे नेउन दिलो। 11 जहोवा चो बायदा चो डोली गत्ती ओबेद-एदोम घरे तीन मयना रली; आउर जहोवा, ओबेद-एदोम आउर हुनचो कुटुम चो बाड़ती करलो।
12 दाउद राजा जानलो कि जहोवा, ओबेद-एदोम आउर हुनचो कुटुम के महापरभु चो डोली किरता बर दिलोसे। तेबे दाउद जाउन महापरभु चो डोली के ओबेद-एदोम चो घर ले हरिक ले दाउदपुर ने नीलो। 13 जिदलदांय जहोवा चो बायदा चो डोली बोउमन छयक डांहका हिंडला, तेबे दाउद गोटोक बयला आउर गोटोक ठोसर बाछा के जतरा चेगालो। 14 दाउद मकमल फटई चो एपोद पींदुन* जहोवा पुरे हरिक ले नाचलो। 15 असन बरन ले दाउद आउर इसराएल चो सपाय कुटुम जय-जय करते आउर तोड़ी फूकते जहोवा चो बायदा चो डोली के आनला।
16 जहोवा चो बायदा चो डोली राज-भाड़ा ने एतो बेरा साउल चो बेटी मीकल खिड़की बाटले दाउद राजा के जहोवा पुरे नाचते-डगातोके दखली आउर हुनके आपलो मने बाकनली।
17 जहोवा चो बायदा चो डोली के तम्बु भीतरे आनला आउर बायदा चो डोली के दाउद चो बनालो ठाने मंडाला; आउर दाउद, जहोवा पुरे होम-जतरामन आउर मिला-मिसा जतरामन चेगालो। 18 होम-जतरा आउर मिला-मिसा जतरा चेगालो पाछे दाउद, सेनामन चो जहोवा चो नाव ले आपलो रयत के बर दिलो। 19 हुन इसराएल चो सपाय रयत के बललोने, सपाय बायले-मनुक के गोटोक-गोटोक रोटी, गोंदाएक भुंजलो मास आउर सुकलो खजूर आउर अंगुर चो गोटोक-गोटोक टिकियामन बाटुन दिलो। तेबे सपाय लोग आपलाहान घरे गेला।
20 दाउद आपलो कुटुम-लोग के बर देतो काजे बोहड़लो। मानतर साउल चो बेटी मीकल, दाउद के भेंट होउक निकरली आउर टेचराउन बलली, “हुं! आजी इसराएल चो राजा आपलो कितलो मान बड़ालो! कोनी भकवा मनुक असन आपलो मुखियामन चो कमेयीनमन पुरे देहें उगाड़ुन लाज नोहलो नाचलो!” 21 दाउद, मीकल के बललो, “जहोवा तुचो बुआ आउर हुनचो सपाय कुटुम चो पलटा ने मोके बाछुन आपलो इसराएल रयत चो मुखिया बनालोसे। मय लोगमन काजे नाई मानतर जहोवा पुरे नाचले। 22 मय एचो ले बले आगर घिनियातो लाईक आउर आपलेई नंजर ने नानी होयंदे; आउर जोन कमेयीनमन चो बारे ने तुय सांगलीसीस हुनमन बले मोचो मान करदे।” 23 साउल चो बेटी मीकल पिला-झीला नी पाउन मोरली।