नातान अगमजानी बाटले दाउद के खबर
7
दाउद राजा आपलो माहाल ने रउक मुरियालो। जहोवा हुनके हुनचो भोंवरक चो सपाय बयरीमन ले अस्तिर करलो। 2 तेबे नातान अगमजानी के राजा बललो, “दख, मय तो देवदार रूक चो बनालो घरे रयंसे। मानतर महापरभु चो डोली, तम्बु ने रयसे।” 3 नातान, राजा के बललो, “जसन तुचो मन आसे उसने ची कर; कसनबलले जहोवा तुचो संगे आसे।”4 हुनी राती बेरा जहोवा चो ए बचन नातान लगे अमरली; 5 जाउन मोचो कमेया दाउद के सांग: जहोवा असन बलेसे, काय तुय मोचो रतो काजे घर बनासे? 6 जोन दिन ले मय इसराएलिमन के मिसर देस् ले निकराउन आनले हुन दिन ले धरुन एबतले मय केबई घरे नी रयें; मानतर तम्बु ने ची इयार-जाहार करेंसे। 7 इसराएलिमन चो मंजी जोन-जोन थाने मय इयार-जाहार होले, काय मय दखा-राखा काजे बाछलो कोनी इसराएली मुखिया के, असन केबई बललेसे, “काय काजे तुमी, मोचो काजे देवदार रूक चो सुंदर घर नी बनालास?” 8 एईकाजे एदांय तुय मोचो कमेया दाउद के असन बल: “सेनामन चो जहोवा असन बलेसे, मय तुके छेरी-मेंडी चरातो भाटा ले इसराएल चो मुखिया बनातो काजे अलगाले। 9 आउर जोन थाने बले तुय इयार-जाहार होलीस हुता मय तुचो संगे रले, आउर तुचो सपाय बयरीमन के तुचो पुरे नास करले; मय तुचो नाव के मंजपुर चो बड़े-बड़े लोगमन चो नाव असन माहान बनायंदे। 10 मय आपलो रयत इसराएल काजे गोटोक ठान बनायंदे आउर हुनमन के आपलेई ठान ने बसापत करेंदे, तेबे हुनमन आपलेई ठाने रउक सकदे; आउर दुसटमन आगे चो असन हुनमन उपरे डाटा-टेवा करुक नी सकदे। 11 जिदलदांय ले मय नियावकारीमन के मोचो रयत इसराएल उपरे राज करुक संगालेसे हुदलदांय ले मय तुमचो सपाय बयरीमन ले तुमके अस्तिर करेंदे। जहोवा तुके असन बले बलेसे, ‘मय तुचो काजे गोटोक घर बनायंदे*। 12 तुचो समया सरले आउर तुय तुचो पुरखामन संगे सोवलीस* जाले, मय तुचेई थर ले ची राजा बनायंदे, आउर मय हुनचो राज के चमकट करेंदे। 13 मोचो नाव चो घर हुनी बनायदे, आउर मय हुनचो राजगादी के अमदेया काजे चमकट करेंदे। 14 मय हुनचो बुआ होयंदे आउर हुन मोचो बेटा होयदे। हुन ओधरम करलो जाले जसन लोग डंड देउआत उसने मय बले हुनके डंड देयंदे। 15 मानतर मोचो सत-मया हुनचो उपर ले नी गुचेदे, जसन मय आपलो मया के साउल चो उपर ले गुचाउन हुनके तुचो ले लापी करले। 16 तुचो कुटुम आउर तुचो राज मोचो पुरे अमदेया चमकट रयदे; तुचो राजगादी अमदेया काजे रयदे’।” 17 ए सपाय गोट आउर सपाय दरसन चो बारे ने नातान, दाउद के समजालो।
दाउद चो पारथना
18 तेबे दाउद राजा, तम्बु भीतरे जाउन जहोवा पुरे बसलो। हुन असन पारथना करलो, “ए जहोवा महापरभु, तुय मोचो ने आउर मोचो कुटुम ने काय गुन दखुन मोके बड़े पन दिलीस? 19 फेर बले ए जहोवा महापरभु, तुचो नंजर ने ए नानी गोट आय; कसनबलले तुय आपलो कमेया चो कुटुम चो बारे ने खुबे दिन काजे बललीस। ए जहोवा महापरभु, ए लोगमन काजे नीती-नियम होओ! 20 दाउद तुके आउर काय बलुक सकेदे? ए जहोवा परभु, तुय तो आपलो कमेया के जानीस! 21 तुचो बचन आउर तुचो मन-इछा असन तुय ए सपाय बड़े बुता करलीस कसनबलले तुचो कमेया जानो। 22 ए जहोवा महापरभु, तुय माहान आस! आमचो सुनलो हिसाब ले तुचो कटार आउर कोनी नीआत, आउर तुके छांडुन आउर कोनी महापरभु नीआत। 23 आउर तुचो रयत इसराएल कटार कोन आसे? मंजपुर ने हुनी ची गोटोक जात आय, जेके तुय आपलो रयत बनातो काजे छंडालिसीस कि एचोले तुचो नाव चो बाड़ती होओ। तुय बड़े-बड़े आउर डरतो लाईक बुतामन करुन आपलो रयत के मिसर देस् ले छंडाउन आनलीस। तुय हुनमन चो पुरे ले जात-जात चो लोगमन आउर देव-धामीमन के खेदलिसीस। 24 तुय आपलो इसराएली रयत के अमदेया काजे आपलो रयत बनालीस; आउर ए जहोवा तुय ची हुनमन चो महापरभु आस। 25 ए जहोवा महापरभु, तुय आपलो कमेया आउर हुनचो कुटुम काजे जोन बचन दिलीसीस, हुनके अमदेया काजे चमकट कर, आउर आपलो बललो असन ची कर। 26 असन बलते तुचो नाव अमदेया काजे माहान होओ, ‘सेनामन चो जहोवा इसराएल चो महापरभु आय’, आउर तुचो कमेया दाउद चो कुटुम तुचो पुरे चमकट रओ। 27 ए सेनामन चो जहोवा, इसराएल चो महापरभु, तुय आपलो कमेया के दरसन ने बललीसीस, ‘मय तुचो काजे घर बनायंदे’; एईकाजे तुचो कमेया तुचो पुरे असने पारथना करतो ढाढ़ुस करेसे। 28 ए जहोवा महापरभु, तुय ची महापरभु आस, तुचो बचन सत आय, आउर तुय आपलो कमेया के भलई करतो बायदा करलिसीस; 29 ए जहोवा महापरभु, तुय बललीसीस, तुचो कमेया चो कुटुम तुचो ले बर पाउन अमदेया चमकट रयदे। एईकाजे एदांय हरिक होउन आपलो कमेया चो कुटुम के अमदेया चमकट रतो बर देस।”