दाउद जीततोर
8
एचो पाछे दाउद, पलिस्तीमन के जीतुन आपलो हक ने करलो, आउर पलिस्तीमन चो हक ने रलो मेतग-अम्माह के बले दाउद आपलो हक ने करलो।2 फेर हुन, मोआबीमन के हरालो। हुन, मोआबीमन के भुंये लोंडाउन डोरी ने नापलो; आउर दुय डोरी नाप चो सेना के मोरते मारलो, आउर गोटोक डोरी नाप चो सेना के जीवत छांडलो। तेबे मोआबीमन, दाउद चो हक ने होला आउर हुनमन दाउद राजा के पटी पठाउक मुरियाला।
3 रहोब चो बेटा हदद-एजेर सोबा चो राजा रये। हुन, फरात महानंदी लगे आपलो राज के फेर बसापत करुक जातो बेरा दाउद हुनके बले जीतलो। 4 दाउद हुनचो एक हजार सात सव घोड़ा-सुवार आउर एक कोड़ी हजार हिंडतो-पाईकमन के झीकलो; आउर सपाय रथ बीती घोड़ामन चो मांडी-नंद काटलो, मानतर एक सव रथ काजे घोड़ामन अलगाउन संगालो। 5 दमिसक चो अरामीमन, सोबा चो राजा हदद-एजेर के साहरा करुक ईलोके, दाउद हुनमन ले बाईस हजार मनुकमन के मोरते मारलो। 6 दाउद, दमिसक चो अरामीमन चो राखा काजे पलटन गोहड़ीमन के पठालो; असन बरन ले अरामी लोग दाउद चो हक ने होउन पटी पठाउक मुरियाला। जोन-जोन थाने बले दाउद जाते रये, जहोवा हुता हुनके जीताते रये। 7 हदद-एजेर चो कमेयामन लगे रलो सोन चो ढालमन के दाउद, जरूसलेम ने धरुन आनलो। 8 हदद-एजेर चो बेतह आउर बरोतय नाव चो सहरमन ले दाउद राजा खुबे कांस आनलो।
9 जेबे हमात चो राजा तोई सुनलो, दाउद, हदद-एजेर चो सपाय सेना के जीतलो, 10 तेबे तोई आपलो बेटा जोराम के दाउद राजा लगे हुनचो हाल पूछुक आउर बधाई देउक पठालो; कसनबलले दाउद, हदद-एजेर ले लड़ई ने जीतुन रये, आउर हदद-एजेर, तोई चो बिरुद जुद करते रये। जोराम, दाउद लगे सोन-रूप, आउर कांस चो बनालो नकी-भंडवा धरुन ईलो। 11 जसन दाउद राजा, जात-जात चो लोगमन ले जीतुन आनलो सपाय सोन-रूप के जहोवा काजे पवितर करुन सोपते रये उसने ची एमन के बले पवितर करुन संगालो। 12 अरामीमन, मोआबीमन, अम्मोनीमन, पलिस्तीमन आउर अमालेकीमन के जीतुन आनलो सोन-रूप के आउर रहोब चो बेटा सोबा चो राजा हदद-एजेर ले झीका-उड़मा करलो धन-माल के बले पवितर करुन सोपलो।
13 दाउद, लोन चो कड़की ने अठारा हजार अरामीमन के मोरते मारलो आउर हुताले बोहड़ुन ईलोके दाउद चो नाव आउर खुबे उड़ली। 14 हुन, एदोम राज चो सपाय बाटे पलटनमन के राखा पठालो, आउर सपाय एदोमीमन दाउद चो हक ने होला। दाउद जोन-जोन थाने बले गेलो हुन सपाय ठाने जहोवा हुनके जीतालो।
दाउद बनालो मुखियामन
15 दाउद गुलाय इसराएल ने राज करुक मुरियालो आउर आपलो रयत काजे भलई आउर सत-धरम करते रये। 16 सरूयाह चो बेटा जोआब सेना मुखिया रये; घटलो गोटमन के लिखु बीता अहीलूद चो बेटा जहोसापात रये; 17 अहीतूब चो बेटा सादोक आउर एबयातर चो बेटा अहीमेलेक पुजारी रओत; सरायाह, राजा चो लिखियार रये। 18 करेतीमन आउर पलेतीमन चो मुखिया जहोयादा चो बेटा बनायाह रये; आउर दाउद चो बेटामन पुजारीमन रओत।