दाउद, मपीबोसेत उपरे दया करतोर
9
दाउद पूछलो, “काय साउल चो कुटुम ने एबतले कोनी बाचलासे, जेके मय जोनातान किरता दया करेंदे?” 2 साउल चो कुटुम ने सीबा नाव चो गोटोक कमेया रलो, हुनके दाउद लगे हागदिला; तेबे राजा हुनके पूछलो, “काय तुय सीबा आस?” हुन बललो, “हव, मय तुचो कमेया आय।” 3 राजा पूछलो, “काय साउल चो कुटुम ने कोनी बाचलासे, जेके मय महापरभु चो दया दखायंदे?” सीबा, राजा के बललो, “हव, जोनातान चो गोटोक बेटा आसे, हुनचो दुनो पांय खोड़ेया आय।” 4 राजा हुनके पूछलो, “हुन कहां आसे?” सीबा, राजा के बललो, “हुन तो लो-दबार सहर ने अम्मीएल चो बेटा माकीर घरे रउआय।” 5 तेबे दाउद राजा, दूत पठाउन हुनके लो-दबार ले अम्मीएल चो बेटा माकीर चो घर ले आनलो। 6 मपीबोसेत, जोनातान चो बेटा आउर साउल चो नाती रये। हुन दाउद लगे एउन पाटा पड़ुन पांय पड़लो। दाउद बललो, “ए मपीबोसेत।” हुन बललो, “तुचो कमेया काजे काय हुकुम आय?” 7 दाउद हुनके बललो, “नी डर, तुचो बुआ जोनातान किरता मय तुचो उपरे दया दखायंदे, आउर तुचो दादा साउल चो सपाय बेड़ा-खाड़ा के तुके बोहड़ाउन देयंदे; आउर तुय रोजे मोचो संगे बसुन खासे।” 8 तेबे मपीबोसेत हुनके पांय पड़ुन बललो, “तुचो कमेया ने तुय काय दखलीस गुने, मय मोरलो कुकुर के धियान देयसीस?”9 तेबे राजा, साउल चो कमेया सीबा के हागदेउन बललो, “जोन बले साउल आउर हुनचो कुटुम चो रये हुनके मय तुचो मालिक चो नाती के दिले। 10 एदांय ले तुय, तुचो बेटामन आउर कमेयामन, हुनचो बेड़ा-खाड़ा के कमाहा। आउर तुचो मालिक चो नाती कुटुम चो खादी-पीदी काजे उबज के आन। मानतर तुचो मालिक चो नाती मपीबोसेत रोजे मोचो संगे बसुन खायदे।” (सीबा चो पंदरा झन बेटामन आउर बीस झन कमेयामन रओत।) 11 सीबा, राजा के बललो, “मोचो परभु राजा, आपलो कमेया के जसन हुकुम देयदे उसनेचे करेंदे।” मपीबोसेत राजा चो गोटोक बेटा असन दाउद संगे बसुन खाते रये। 12 मपीबोसेत के मीका नाव चो गोटोक नानी लेका रये, आउर सीबा घरे रतो सपाय लोग मपीबोसेत चो सेवा करते रओत। 13 मपीबोसेत चो दुनो पांय खोड़ेया रये; हुन, जरूसलेम ने रउन रोजे राजा संगे बसुन खाते रये।