इसराएलिमन, अम्मोनीमन आउर अरामीमन के हरातोर
10
अम्मोनीमन चो राजा नाहास मोरलो पाछे, हुनचो बेटा हानून राजा बनलो। 2 दाउद बललो, “जसन हानून चो बुआ नाहास मोके सत-मया करते रये, उसने ची मय बले हानून के मया करेंदे।” तेबे दाउद आपलो कमेयामन के, हानून चो बुआ मोरलो किरता हुनके भोरसा देतो काजे पठालो। जेबे दाउद चो कमेयामन अम्मोनीमन चो देस ने अमरला 3 तेबे अम्मोनीमन चो राजपालमन आपलो राजा हानून के बलला, “तुके काय लागेसे, दाउद तुचो लगे पठालो कमेयामन, तुचो बुआ चो मान करुक ईलासे? हुनमन ए सहर चो भेद जानुन हुनके नास करुक ईलासे।” 4 एईकाजे हानून, दाउद चो कमेयामन के धरलो, आउर हुनमन चो गोटोक पाट चो डाड़ी खुराउन आउर करांड खाले ले आदो फटई के कटाउन जाउक दिलो। 5 एचो खबर सुनुन दाउद, लोगमन के हुनमन संगे भेंट होउक पठालो, कसनबलले हुनमन खुबे लाज होते रओत। राजा बललो, “तुमचो डाड़ी बाड़तले तुमी जरीहो ने राहा, पाछे बोहड़ुन इआ।”6 अम्मोनीमन जानला, दाउद हुनमन के खुबे रीस होलोसे। एईकाजे अम्मोनीमन, बेत-रहोब आउर सोबा सहरमन चो बीस हजार अरामीमन चो हिंडतो-पाईकमन के आउर माका चो राजा ले एक हजार पाईकमन आउर बारा हजार तोबी पाईकमन के भूती देउन हागदिला। 7 एके सुनुन दाउद, जोआब आउर सपाय सेनामन संगे बीरमन के पठालो। 8 अम्मोनीमन निकरुन सहर चो देवड़ी लगे पाती बांदला। सोबा आउर रहोब चो अरामीमन, तोब आउर माका चो पाईकमन भाटा ने आपलाहान ठान धरला।
9 जेबे जोआब दखलो, हुनचो बिरुद लड़तो काजे सेना पुरे-पाटे पाती बांदलासे, तेबे जोआब इसराएली बीरमन ले बरसक-बरसक बीरमन के बाछुन अरामीमन ले जुद करतो काजे पुरे पाती बंदालो। 10 बाचलो पाईकमन के हुनचो भाई अबीसे चो हाथे सोपुन दिलो, आउर हुन अम्मोनीमन चो पुरे हुनमन के पाती बंदालो। 11 फेर हुन, अबीसे के बललो, “अरामीमन मोके मारुक ईले तुय मोचो साहरा हो, आउर अम्मोनीमन तुके मारुक ईला जाले मय एउन तुचो साहरा होयंदे। 12 तुय ढाढ़ुस कर आउर आमी आपलो लोग आउर महापरभु चो सहरमन काजे जुद करुं; आउर जहोवा के जसन नंगत लागेदे उसने करो।” 13 तेबे जोआब आउर हुनचो संग चो लोग अरामीमन ले जुद करुक गेलोके अरामीमन हुनमन चो पुरे ले पराला। 14 अरामीमन परातोके दखुन अम्मोनीमन बले अबीसे पुरे ले पराउन आपलो सहर भीतरे ओलला। तेबे जोआब, अम्मोनीमन ले लड़ुक छांडुन जरूसलेम ने बोहड़ुन ईलो।
15 जेबे अरामीमन जानला, इसराएलिमन ले हारला, तेबे हुनमन रूंडा होला। 16 फेर हदद-एजेर, दूतमन पठाउन फरात महानंदी चो हुन पाट रतो अरामीमन के हागदिलो; आउर हुनमन हदद-एजेर चो सेना मुखिया सोबक संगे हेलाम ने अमरला। 17 ए खबर सुनुन दाउद, सपाय इसराएली सेना के रूंडा करुन जरदन के नाहकुन हेलाम गेलो। तेबे अरामीमन, दाउद चो बिरुद पाती बांधुन हुनचो ले लड़ई करला। 18 मानतर अरामीमन, इसराएलिमन चो पुरे ले पराला आउर दाउद, अरामीमन ले सात सव रथ चलाउमन आउर चालीस हजार घोड़ा सुवारमन के मारलो, आउर हुनमन चो सेना मुखिया सोबक के खुबे पावली गुने हुन मोरलो। 19 हदद-एजेर चो हक ने रलो सपाय राजामन दखला कि हुनमन के इसराएलिमन हराला, तेबे हुनमन इसराएलिमन संगे मिला-मिसा होला आउर हुनमन चो हक ने होला। एईकाजे अरामीमन, अम्मोनीमन चो साहरा करतो काजे डरला।