साउल आउर हुनचो बेटामन चो मोरना
31
पलिस्तीमन, इसराएलिमन ले जुद करला। इसराएलिमन पराला आउर खुबे इसराएलिमन गिलबो डोंगरी ने घसर-पड़ होउन मोरला। 2 पलिस्तीमन, साउल आउर हुनचो बेटामन के खेदुन नीला आउर साउल चो बेटामन जोनातान, अबीनादाब, आउर मलकीस के मोरते मारला। 3 पलिस्ती सेना साउल उपरे एउन पड़ला, आउर धनु-कांडेयामन हुनके बींदला गुने साउल के खुबे घावमन होली। 4 तेबे साउल आपलो हतियार धरु बीता के बललो, “आपलो खांडा ले मोके मार, नोहले खतना नोहलो पलिस्तीमन एउन मोके खांडा ले मारदे आउर मोचो हांसी-खेली करदे।” मानतर हुनचो हतियार धरु बीता खुबे डरुन असन नी करलो। तेबे साउल आपलो खांडा के उबाउन हुनचो उपरे घसरलो। 5 साउल मोरलोके दखुन हुनचो हतियार धरु बीता बले आपलो खांडा उपरे आपने घसरुन हुताय मोरलो। 6 असन बरन ले साउल आउर हुनचो तीनो बेटामन, हुनचो हतियार धरु बीता आउर हुनचो संग चो सपाय लोग हुनी दिने मोरला। 7 घाटी चो हुन पाट आउर जरदन नंदी चो हुन पाट रतो इसराएलिमन दखला, साउल आउर हुनचो बेटामन मोरला आउर इसराएली सेना पराला। तेबे हुनमन बले आपलाहान सहरमन के छांडुन पराला। आउर पलिस्तीमन एउन हुता रउक मुरियाला।8 दुसर दिने पलिस्तीमन मोरलो लोग चो धन-माल झीका-उड़मा करुक ईला। हुनमन साउल आउर हुनचो बेटामन चो मोड़ी के गिलबो डोंगरी ने दखला। 9 हुनमन साउल चो मुंड काटुन हतियारमन के झीकला आउर गुलाय पलिस्ती देस् चो लोगमन के आउर हुनमन चो मंदिरमन ने ए हरिक चो खबर सांगतो काजे दूतमन पठाला। 10 हुनमन साउल चो हतियार के असतोरेत देवी चो मंदिर ने संगाला आउर हुनचो धड़ के बेतसान चो भाड़ा ने ओराला। 11 मानतर गिलाद चो जाबेस ने रतो लोग सुनला कि पलिस्तीमन साउल संगे काय-काय करलासोत, 12 तेबे सपाय बीरमन राती ची बेरा जाउन साउल आउर हुनचो बेटामन चो मोड़ी के बेतसान ले जाबेस ने आनुन डसाला। 13 आउर हुनमन चो हाड़ामन के जाबेस चो झाउ रूक खाले गाड़ला आउर सात दिनतले उपास रला।