दाउद, अमालेकीमन चो बिरुद जुद करतोर
30
तीसर दिने, दाउद आपलो लोग संगे सिकलग अमरुन दखलो कि अमालेकीमन बेर-उदिया उजा बाट चो राज आउर सिकलग ले लड़ई करला, लोगमन के मारला आउर सिकलग के डसाला। 2 हुता चो सपाय बायलेमन आउर नानी-बड़े पन चो लोग के बले बांदुन आपलो संगे नीला; हुनमन ले कोकेई मोरते नी मारला, मानतर सपाय संगे आपलो राज जातो बाट-धरला। 3 जेबे दाउद आपलो संग चो लोग संगे हुन सहर ने अमरलो, सहर के आईग डसाउन रओत, आउर हुनमन चो बायले-पिलामन के बांदुन नेउन रओत। 4 तेबे दाउद आउर हुनचो संग चो लोगमन किरकिरुन-किरकिरुन खुबे गागला, फेर हुनमन के गागतो इतलो सकत बले नी रली। 5 दाउद चो दुनो बायले जिजरेली अहीनोअम, आउर करमेलिया नाबाल चो रांडी बायले अबीगेल के बले बांदुन नेउन रओत। 6 दाउद बड़े बिपती ने पड़ुन रये, कसनबलले लोगमन आपलो बेटा-बेटीमन किरता खुबे दुख-तकलीस होउन दाउद के पकना संगे मारतो उआट करते रओत। मानतर दाउद आपलो महापरभु-जहोवा के सूरता करुन खुद के ढाढ़ुस करलो।7 दाउद, अहीमेलेक चो बेटा एबयातर पुजारी के बललो, “एपोद के मोचो लगे आन।” तेबे एबयातर पुजारी, एपोद के दाउद लगे नीलो। 8 दाउद, जहोवा के पूछलो, “काय, मय ए लोग-गोहड़ी के खेदेंदे? काय मय हुनमन के धरुक सकेंदे?” जहोवा, दाउद के बललो, “हुनमन के खेद; कसनबलले तुय पक्का हुनमन के धरसे आउर सपाय के छंडाउन आनसे।” 9 एईकाजे दाउद आउर हुनचो संग चो छय सव लोगमन बसोर बाहार लगे अमरला; आउर थाकलो लोगमन हुताय ठेबला। 10 मानतर दाउद चार सव मनुकमन संगे लोग-गोहड़ी के खेदुक गेलो, दुय सव थाकलो मनुकमन बसोर बाहार चो हुन पाट जाउक नी सकुन हुताय रला।
11 गोटोक मिसरेया मनुक हुनमन के भाटा ने मिरलो, हुनमन हुनके दाउद लगे नेउन रोटी दिला; आउर रोटी खादलो पाछे हुनके पानी खुआला, 12 फेर हुनमन खिंडिक सुकलो अंजीर आउर दुय झोपा सुकलो अंगुर हुनके दिला। ए सपाय खादलोके हुन मनुक तीरतिरा होलो। कसनबलले हुन तीन दिन आउर तीन रात ले काई नी खाउन रये आउर पानी बले नी खाउन रये। 13 तेबे दाउद हुनके पूछलो, “तुय कोचो कमेया आस? तुय कहां चो आस?” हुन बललो, “मय मिसरेया जुवान, गोटोक अमालेकी मनुक चो कमेया आंय। तीन दिन आगे मय बेमार पड़ुन रले आउर मोचो मालिक मोके छांडुन गेलो। 14 आमी करेतीमन चो बेर-उदिया उजा बाटे, आउर जहूदा राज ने आउर कालेब चो बेर-उदिया उजा बाटे लड़ई करलु; आउर सिकलग के डसालु।” 15 दाउद हुनके पूछलो, “काय तुय मोके हुनमन चो लोग-गोहड़ी लगे अमरासे?” हुन बललो, “मोचो ले महापरभु चो किरिया खा कि तुय मोचो जीव नी धरसे आउर मोके मोचो मालिक चो हक ने बले नी करसे, तेबे मय तुके हुन लोग-गोहड़ी लगे अमरायंदे।”
16 मिसरेया मनुक आउर दाउद हुता अमरलोके दखला, पलिस्ती देस् आउर जहूदा देस् ले झीका-उड़मा करुन आनलो धन-माल किरता अमालेकीमन, गुलाय भुंये घोंडरुन-घोंडरुन खाते-पीवते आउर नाचते रओत। 17 दाउद हुनमन के राती चो पईल पाहार ले धरुन दुसर दिन चो सांज होओतले मारते रलो, चार सव जुवानमन जोन ऊंटमन ने चेगुन पराउन रओत हुनमन के छांडुन, गोटोक बले मनुक नी बाचला। 18 दाउद आपलो बायलेमन के आउर जोन बले अमालेकीमन झीकुन नेउन रला, सपाय के छंडालो 19 बललोने, नानी-बड़े पन चो लोग, बेटा-बेटी, झीका उड़मा करलो धन-माल आउर अमालेकीमन झिकुन नीलो सपाय तीजमन के दाउद छंडाउन आनलो। 20 दाउद, अमालेकीमन ले झिकुन आनलो सपाय छेरी-मेंडीमन आउर गाय-बयलामन के, आपलो जनावरमन चो पुरे-पुरे खेदला। एके दखुन हुनचो लोगमन बलला, “ए सपाय के दाउद झीका-उड़मा करुन आनलोसे।”
21 तेबे दाउद, हुन दुय सव मनुकमन लगे गेलो जोनमन थाकुन दाउद चो पाट-पाट बले जाउक नी सकला आउर बसोर बाहार लगे ठेबुन रला, हुनमन दाउद आउर हुनचो संग चो लोग संगे मिला-मिसा होउक गेला, दाउद हुनमन लगे अमरुन हुनमन चो हाल पूछलो। 22 दाउद संगे रलो सपाय एरामन आउर उबढंगरी लोगमन बलला, “एमन आमचो संगे नी जाउ रओत, एईकाजे आमचो छंडाउन आनलो धन-माल ले आमी हुनमन के काई नी देउं, सोजे आपलाहान बायले-पिलामन के धरुन जाओत।” 23 मानतर दाउद बललो, “ए मोचो भाईमन, आमके जहोवा दिलो धन-माल संगे तुमी असन करुक नी सकास, हुन आमचो रखेया करलो आउर आमचो बिरुद लड़ई करलो लोग-गोहड़ी के आमचो हक ने करलो। 24 एचो बारे ने तुमचो कोन सुनेदे? लड़ई ने जाउन रलो लोग चो जितरो बाटा आय, हुतलेई ची बाटा आमचो तीजमन के राखा करलो लोगमन चो बले होयदे, दुनो चो बाटा जोंहरेया होयदे।” 25 दाउद इसराएलिमन काजे असन नीति-नियम बनालो, आउर एबतले हुनी नीति-नियम आसे।
26 सिकलग ने अमरुन दाउद, झीका-उड़मा करलो धन-माल ले खिंडिक-खिंडिक आपलो संगवारीमन आउर जहूदी धरम-सियानमन लगे असन खबर देउन पठालो, “जहोवा चो बयरीमन ले झीका-उड़मा करलो धन-माल ले तुमचो काजे भेंट।” 27 बललोने बेतेल, बेर-उदिया उजा बाट रामोत, जतीर, 28 अरोएर, सिपमोत, एसतमो, 29 राकाल, जरहमेलीमन चो सहर, केनीमन चो सहर, 30 होरमा, बोरासान, अताक, 31 हेबरोन आउर जितलो ठान ने दाउद आपलो लोग संगे बुलते रये, हुता चो सपाय सियानमन लगे खिंडिक-खिंडिक धन-माल पठालो।