पलिस्तीमन, दाउद के नी पतेयातोर
29
पलिस्तीमन आपलो सपाय सेना के अपेक चो भाटा ने रुंडाला आउर इसराएलिमन, जिजरेल चो पानी-पजरा लगे डेरा पड़ला। 2 तेबे पलिस्ती मुखियामन आपलाहान सव-सव आउर हजार-हजार सेना संगे गेला, आउर सेना चो पाट-पाट आकीस संगे दाउद आउर हुनचो संग चो लोग बले गेला, 3 तेबे पलिस्ती सेना-मुखियामन पूछला, “हुन इबरानीमन चो एता काय काम आसे?” आकीस पलिस्ती सेना-मुखियामन के बललो, “काय, ए इसराएल चो राजा साउल चो कमेया दाउद नोआय, ए कितलो बरक ले मोचो संगे रयसे आउर हुनचो ईलो दिन ले धरुन एबतले मय हुनचोने काई कसूर नी पावलेसे।” 4 मानतर पलिस्ती सेना-मुखियामन हुनके रीस होला आउर आकीस के बलला, “तुय हुन मनुक के पठाव, हुनके दिलो ठान ने बोहड़ुन जाओ; हुन आमचो संगे लड़ई ने नी एओ, नोहले हुन लड़ई ने आमचो बिरुद करेदे। हुन कसन बरन ले आपलो राजा के हरिक करेदे? काय आमचो लोगमन चो मुंड काटुन हरिक नी करेदे? 5 काय ए हुनी दाउद नोआय जेचो बारे ने लोगमन नाचुन-गाउन गोटोक दुसर ले बलते रओत,‘साउल तो हजार लोग के मारलो,
मानतर दाउद दस हजार लोग के मारलोसे’?”
6 तेबे आकीस, दाउद के हागदेउन बललो, “जहोवा चो किरिया तुय सोज मनुक आस, आउर सेना ने तुय मोचो संगे इयार-जाहार होले, मोके नंगत लागुआय। कसनबलले तुय मोचो लगे ईलो बेरा ले धरुन एबतले मय तुचो ने काई कसूर नी पावलेसे। फेर बले मुखियामन तुके मन नी करसोत। 7 एईकाजे तुय अस्तिर ने बोहड़ुन जा, नोहले पलिस्ती सेना-मुखियामन मुर-मुरा होदे।” 8 दाउद, आकीस के बललो, “मानतर मय काय करलेसे? तुचो लगे ईलो दिन ले धरुन एबतले मोचो ने असन काय कसूर पावलीस कि मय आपलो परभु राजा चो बयरीमन ले लड़ुक नी सकें?” 9 आकीस, दाउद के बललो, “हव, मय जाने तुय मोचो नंजर ने महापरभु चो दूत असन दोख नोहलो आसीस; फेर बले पलिस्ती सेना-मुखियामन बलला, ‘हुन आमचो संगे लड़ई ने नी एओ।’ 10 एदांय तुय आउर तुचो संग चो लोगमन अंधार-अंधार उठुन उजर होते खन जा।” 11 एईकाजे दाउद आपलो संग चो लोग संगे बियाने उठुन पलिस्तीमन चो देस् ने बोहड़ुन गेलो। मानतर पलिस्तीमन जिजरेल बाटे गेला।