28
हुन दिनमन ने पलिस्तीमन, इसराएल ले लड़ई करतो काजे आपलो सेना के रुंडाला, तेबे आकीस, दाउद के बललो, “तुके आपलो लोग संगे मोचो सेना ने जाउक पड़ेदे।” 2 दाउद, आकीस के बललो, “हव, एचो ले तुय जानसे कि तुचो कमेया काय करेदे?” आकीस, दाउद के बललो, “तुके अमदेया काजे मोचो रखेया करु बनायंदे।”साउल आउर टोनहीन
3 समुएल मोरलो, आउर इसराएल चो सपाय लोग हुनचो काजे गागा-बोगा होला आउर हुनके हुनचेई सहर रामा ने माटी दिला। साउल, पंजियारमन आउर जादु-टोना करतो लोग के देस् ले निकराउन रलो। 4 पलिस्तीमन रूंडुन सूनेम ने डेरा पड़ला, साउल आउर सपाय इसराएलिमन रूंडुन गिलबो ने डेरा पड़ला। 5 पलिस्तीमन चो सेना के दखुन साउल डरलो, आउर हुनचो मन खुबे डरुन थरथरली। 6 साउल, जहोवा के पुछलो, मानतर जहोवा हुनके सपना बाटले नोहले ऊरीम-तुमीम बाटले नोहले अगमजानीमन बाटले काई उत्तर नी दिलो। 7 तेबे साउल आपलो कमेयामन के बललो, “मोचो काजे कोनी जादु-टोनाहीन के डगराहा, मय हुनचो लगे जाउन हुनके पुछेंदे।” हुनचो कमेयामन हुनके बलला, “एनदोर ने गोटोक टोनाहीन बायले आसे।”
8 तेबे साउल, आपलो राजा फटई के हिटाउन दुसर असन भेस धरलो आउर आपलो दुय झन मनुकमन संगे राती बेरा हुन टोनहीन लगे गेलो; आउर बललो, “तुय जादु-टोना करुन मय जेचो नाव धरेंदे हुनके जगाउन देस आउर हुनचो ले पूछुन अगमगोट के सांग।” 9 हुन बायले हुनके बलली, “तुय जानीस कि साउल काय करलोसे, हुन, पंजियारमन आउर जादु-टोना करुमन के देस् ले खेदलोसे, फेर काय काजे तुय मोके मोरातो काजे फांदा मंडायसीस?” 10 मानतर साउल, जहोवा चो किरिया खाउन हुनके बललो, “जहोवा चो किरिया ए ओधरम किरता तुके काई डंड नी मिरेदे।” 11 तेबे हुन बायले बलली, “मय तुचो काजे कोके जगाउआंय?” हुन बललो, “समुएल के मोचो काजे जगाउन देस।” 12 हुन बायले समुएल के जगाली आउर हुनके दखुन खुबे जोर ले किरकिरुन साउल के बलली, “तुय काय काजे मोके ठगलीस? तुय तो साउल आस।” 13 राजा हुनके बललो, “नी डर, तुय काय दखसीस?” हुन बायले साउल के बलली, “मय गोटोक भूत के भुंय ले उठतो के दखेंसे।” 14 साउल हुनके पूछलो, “हुन कसन दखा देयसे?” हुन बलली, “गोटोक डोकरा लाम कुड़ता पींदुन एयसे।” तेबे साउल पक्का जानलो कि हुन समुएल आय, एईकाजे हुनके पाटा पड़ुन डंडासरन करलो।
15 समुएल, साउल के पूछलो, “तुय मोके जगाउन काय काजे असकट करसीस?” साउल बललो, “मय खुबे बिपती ने पड़लेसे, कसनबलले पलिस्तीमन मोचो संगे लड़सोत, आउर महापरभु मोके छांडलो, एदांय मोके सपना नोहले अगमजानी बाटले बले काई उत्तर नी देये, एईकाजे मय तुके जगाउक बललेसे, मय काय करुआंय तुय मोके सांग।” 16 समुएल बललो, “जहोवा तुके छांडुन तुचो बयरी होलोसे जाले, तुय मोके काय काजे पूछसीस? 17 जसन जहोवा मोचो बाटले तुके बलुन रये उसने ची हुन करलो, जहोवा तुचो हाथ ले राज के झिकुन तुचो घर-लग चो दाउद के दिलो। 18 तुय जहोवा चो गोट नी मानलीस आउर अमालेकीमन के हुनमन चो खुबे उबढंगरी बुता हिसाब ले डंड नी दिलीस, एईकाजे आजी जहोवा तुचो संगे असन बेबार करलो। 19 फेर जहोवा तुचो संगे सपाय इसराएलिमन के पलिस्तीमन चो हक ने करेदे। तुय आउर तुचो बेटामन काली के मोचो संगे एथा राहासे; आउर इसराएली सेना के बले जहोवा, पलिस्तीमन चो हक ने करेदे।”
20 तेबे साउल तूरते पाटा पड़ुन भुंये घसरलो आउर समुएल चो गोटमन किरता खुबे डरलो, हुन रात-मंजन काई नी खाउन रलो। एईकाजे हुनके खिंडिक बले सकत नी रली। 21 तेबे हुन बायले साउल लगे जाउन हुन खुबे डाहाल-बिकाल होतोके दखुन बलली, “सुन, मय तुचो कमेयीन तुचो गोट मानले, आउर आपलो जीव चो बले फिकिर नी करुन तुचो बललो गोट असन करले। 22 एईकाजे तुय बले आपलो कमेयीन चो गोट मान; तुचो पुरे मय गोंदायक रोटी मंडायंदे हुनके खा, तेबे तुके बाट हिंडतो काजे सकत मिरेदे।” 23 हुन बललो, “मय नी खायें।” तेबले बले हुन बायले आउर हुनचो कमेयामन घन-घन गुहारलोके हुन भुंय ले उठुन खटेया ने बसलो। 24 हुन बायले घरे गोटोक ठोसर बाछा रये, हुन झटके हुनके मारली आउर आटा पिसान चो पाग नोहलो रोटी* बनाउन, 25 साउल आउर हुनचो कमेयामन पुरे मंडाली, तेबे हुनमन खादला आउर राती बेरा ची गेला।