दाउद, पलिस्तीमन चो सरन ने जातोर
27
दाउद आपलो मने बिचारलो, “एदांय मय कोनी दिने बले साउल चो हाथ ले मोरेंदे, एईकाजे एदांय पलिस्तीमन लगे गेले, मोचो काजे नंगत होयदे; तेबे साउल इसराएल चो देस् ने फेर मोके डगराउक छांडेदे, असन बरन ले मोचो जीव बाचेदे।” 2 तेबे दाउद आपलो संग चो छय सव मनुकमन संगे गत चो राजा माओक चो बेटा आकीस लगे गेलो। 3 दाउद, आपलो संग चो लोग, आपलो घर-लोग आउर आपलो दुनो बायलेमन बललोने, जिजरेल सहर चो अहीनोअम आउर करमेल सहर चो नाबाल चो रांडी बायले अबीगेल संगे गत सहर ने आकीस लगे रउक मुरियालो। 4 दाउद गत ने परालो बलुन साउल के खबर मिरली, तेबे हुन फेर केबई दाउद के नी डगरालो।5 दाउद, आकीस के बललो, “तुय मोचो उपरे दया करसीस जाले मोके रतो काजे ए देस् चो कोनीचे सहर ने ठान देस। तुचो कमेया, राजमाहाल ने तुचो संगे काय काजे रयदे?” 6 तेबे आकीस हुनके हुनी दिने सिकलग गांव दिलो, एईकाजे सिकलग एबतले जहूदा राजामन चो आय। 7 पलिस्तीमन चो देस् ने दाउद चो रतोर एक बरक चार मयना होली।
8 दाउद आपलो संग चो लोग संगे जाउन गसूरीमन, गिरजीमन आउर अमालेकीमन ले जुद करलो, ए लोगमन आगे जुगे ले हुता बसापत करुन रओत, जोन सूर चो बाट ले मिसर देस् लगले रये। 9 दाउद हुन देस् ने उधापड़े एउन पड़लो आउर बायले-मनुक कोकेई जीव नी छांडलो। हुन, छेरी-मेंडी, गाय-बयला, गदाहा, ऊंट आउर फटई धरुन आकीस लगे बोहड़ुन गेलो। 10 आकीस पूछलो, “आजी तुय कोचो संगे जुद करलीस?” दाउद बललो, “जहूदा चो बेर-उदिया उजा बाटे, जरहमेलीमन चो बेर-उदिया उजा बाटे आउर केनीमन चो बेर-उदिया उजा बाट ने।” 11 दाउद, कोनी बायले-मनुक चो जीव नी छांडलो आउर हुनमन के गत ने नी अमरालो, हुन बिचारलो, दाउद असन-असन करलोसे बलुन हुनमन सांगदे। जिदलदांय ले हुन पलिस्तीमन चो देस् ने रलो, हुदलदांय ले हुनचो जुद नीती उसने ची रली। 12 आकीस, दाउद चो गोट के सतपतेयालो आउर बिचारलो, “एके इसराएली लोगमन आपलो नंजर ने घिनियालासोत, एईकाजे ए अमदेया मोचो कमेया रयदे।”