दाउद, साउल के फेर जीव छांडतोर
26
जीपीमन गिबा ने साउल लगे एउन सांगला, “दाउद, जसीमोन चो पुरे हकीला डोंगरी ने लुकुन रयसे।” 2 तेबे साउल, इसराएल चो तीन हजार बाछलो बीरमन संगे जीप चो बारुसरा भाटा बाटे दाउद के डगराउक गेलो। 3 साउल, जसीमोन चो पुरे हकीला डोंगरी चो बाट रेटे डेरा धरलो। मानतर दाउद बारुसरा भाटा ने ची रलो आउर जेबे हुन सुनलो, साउल हुनके डगराते-डगराते बारुसरा भाटा ने एयसे 4 तेबे दाउद आपलो दूतमन पठाउन पक्का जानलो कि साउल सते अमरलोसे। 5 तेबे दाउद, साउल चो तमु-भाटा लगे गेलो; साउल आउर हुनचो सेना मुखिया अबनेर जोन नेर चो बेटा आय, सोवलोके दखलो। साउल तमु-भाटा ने ची सोउ रये, आउर हुनचो सेना भोंवरक डेरा बनाउन सोउन रओत।6 हित्ती अहीमेलक आउर सरूयाह* चो बेटा जोआब चो भाई अबीसे के दाउद बललो, “मोचो संगे साउल चो तमु-भाटा ने कोन एयदे?” अबीसे बललो, “मय तुचो संगे एयंदे।” 7 तेबे दाउद आउर अबीसे राती ची बेरा सेनामन लगे गेला, आउर दखला, साउल तमु-भाटा ने सोउन रये, आउर हुनचो भाला हुनचो मुंड लगे भुंये गढ़ुन रये। अबनेर आउर बीरमन हुनचो भोंवरक सोउन रला। 8 अबीसे, दाउद के बललो, “महापरभु आजी तुचो बयरी के तुचो हाथे करुन दिलोसे, एईकाजे मय एदांय हुनके असन मारेंदे कि भाला हुनके गोटकी हार ने छिंगड़ुन भुंये गढ़ो, आउर मोके दुसर हार मारुक नी पड़ो।” 9 मानतर दाउद, अबीसे के बललो, “हुनके नी मार, कसनबलले जहोवा अबिसेक करलो मनुक के मारुन कोनी दोख नोहलोर रउक नी सके।” 10 दाउद फेर बललो, “जहोवा चो किरिया जहोवा ची हुनके मारेदे, नोहले हुन आपने मोरेदे, नोहले जुद ने मोरेदे। 11 असन नी होओ, मय जहोवा अबिसेक करलो मनुक उपरे हाथ उठायें, एईकाजे हुनचो मुंड लग चो भाला आउर पानी-तूमा धरुन आमी एता ले जो।” 12 तेबे दाउद, साउल चो मुंड लगले भाला आउर पानी-तूमा के धरुन गेलो, हुनमन के कोनी नी दखला आउर कोनी नी चेतला; कसनबलले हुनमन के जहोवा बाटले झूमा ढाकुन रली। एईकाजे सोउन रओत।
13 दाउद हुनमन ले खुबे लापी जाउन दुसर बाटे डोंगरी चो सिग ने उबलो, हुनमन गोटोक-दुसर ले खुबे लापी रला। 14 दाउद सेनामन के आउर नेर चो बेटा अबनेर के चिचियाउन बललो, “ए अबनेर! काय, तुय नी सुनसीस?” अबनेर बललो, “राजा के हागदेतो बीता तुय कोन आस?” 15 दाउद, अबनेर के बललो, “तुय कसन मनुक आस? इसराएल ने तुचो कटार कोन आसोत? तुय कसन आपलो राजा चो रखेया नी करलीस? तुचो राजा के मारतो काजे गोटोक मनुक तुमचो डेरा ने ओलुन रये। 16 तुय नंगत ले राखा नी करलीस, जहोवा चो किरिया तुय आउर तुचो लोग मोरतो लाईक आहास, कसनबलले तुय जहोवा बाटले अबिसेक होलो आपलो राजा चो रखेया नी करलीस। हुता जाउन दख, राजा चो मुंड लगे रलो भाला आउर पानी-तूमा कहां आसे?”
17 साउल, दाउद चो राग चिताउन बललो, “ए मोचो बेटा दाउद, काय ए तुय बलसीस?” दाउद बललो, “ए मोचो परभु, ए मोचो राजा, हव, मय ची बलेंसे।” 18 दाउद फेर बललो, “मोचो परभु, आपलो कमेया के काय काजे खेदेसे? मय काय नसालेसे? आउर मय काय कसूर करलेसे? 19 एदांय ए मोचो परभु, ए राजा, आपलो कमेया चो गोट सुन, जहोवा तुके मोचो बिरुद उकसालोसे जाले हुन भेंट धरो, मानतर लोगमन उकसालासे जाले हुनमन जहोवा बाटले सराप पाओत! कसनबलले हुनमन, मोके जहोवा चो निज बाटा नी मिरो बलुन ‘जा, दुसर देव-धामीमन चो सेवा कर’, बलला। 20 एईकाजे एदांय मोचो लोउ जहोवा ले लापी रतो लोग चो भुंये नी थिपो; इसराएल चो राजा तो बड़े डोंगरी थाने तितीर चड़ई* के मारुक ईलो असन, गोटोक किलनी के डगराउक ईलोसे।”
21 साउल बललो, “मय पाप करलेसे, ए मोचो बेटा दाउद, बोहड़ुन आव, मोचो जीव आजी तुचो नंजर ने खुबे मोल चो होली, एदांय मय फेर तुचो काई नोकसान नी करेंदे; सुन, मय भकवा असन बुता करले, आउर मोचो ले खुबे बड़े कसूर होलीसे।” 22 दाउद बललो, “ए राजा! ए भाला के चिताव, तुचो कोनी जुवान ए लगे एउन एके नेओ। 23 जहोवा गोटोक-गोटोक के आपलो धारनिक आउर पतेयातो लाईक बुता चो पलटा देयदे; जहोवा आजी तुके मोचो हक ने करुन रये, मानतर मय जहोवा बाटले अबिसेक होलो मनुक उपरे हाथ उठातोर नंगत नी समजले। 24 एईकाजे जसन तुचो जीव आजी मोचो नंजर ने खुबे मोल चो आय, उसने ची मोचो जीव बले जहोवा चो नंजर ने खुबे मोल चो होओ आउर हुन मोके सपाय बिपती ले छंडाओ।” 25 साउल, दाउद के बललो, “ए मोचो बेटा दाउद, तुय धन-धन आस, तुचो बाड़ती होयदे आउर तुचो सपाय बुता पुरा होयदे।” एचो पाछे, दाउद आपलो बाट धरलो आउर साउल बले आपलो थाने बोहड़ुन गेलो।