बिजातीमन संगे बिया होतोर
9
ए बुतामन सरलो पाछे, जहूदी मुखियामन मोचो लगे एउन बलला, “इसराएलिमन, पुजारीमन, लेवीमन, ए बाटे रतो लोगमन चो नीति-नियम ले आपनमन के नी अलगालासोत। मानतर कनानीमन, हित्तीमन, परिज्जीमन, जबूसीमन, एमोरीमन, मोआबीमन, मिसरीमन आउर अमोनीमन असन हुनीमन बले घिन-घिना बुतामन करसोत। 2 कसनबलले हुता चो बेटीमन के आपन बिया होयसोत आउर आपलो बेटामन काजे बले बिया करेसोत। असन बरन ले पवितर बंस चो लोग ए बाट चो लोगमन संगे मिसलासोत आउर धरम-सियानमन आउर मुखियामन बले महापरभु चो बिरुद निमकधुसा करतोने पुरे होलासोत।” 3 ए गोट के सुनुन, मय एजरा खुबे दुखी होउन आपलो फटई आउर ओंगछी के चीरले आउर आपलो चूंदी आउर दाड़ी के झीकी होउन भक्याउन बसले। 4 तेबे इसराएल चो महापरभु चो गोट सुनलो सपाय लोगमन कयद ले ईलो लोगमन चो घिन-घिना बुता किरता डरला, आउर हुनमन मोचो लगे रूंडा होला। मय सांज बेरा चो जतरा चेगातो समया होओतले भक्याउन बसुन ची रले।एजरा चो पारथना
5 मानतर सांज बेरा चो जतरा चेगातो समया होतोके मय उपास ले उठले, मोचो फटई आउर ओंगछी चीरी होउन रये। मय मांडी कुटा देउन महापरभु जहोवा चो बाटे आपलो हाथ उठाउन बलले, 6 “ए मोचो महापरभु, मोके तुचो बाटे दखतो काजे लाज लागेसे, कसनबलले आमचो ओधरम आमचो मुंड-भर होलीसे, आउर आमचो दोख बादरी के टेकतो असन होलीसे।
7 आमचो पुरखामन चो दिन ले धरुन एबतले आमी खुबे पाप करलुसे। आमी आपलो ओधरम बुतामन किरता आपलो राजामन आउर पुजारीमन संगे देस्-देस् चो राजामन चो हक ने होउन रलु। हुनमन आमके खांडा ले मारला, कयद करुन नीला, झीका-उड़मा करला। असन आमी खुबे लाज पड़ुन रलु, जसन आमी आजी आंसु। 8 मानतर महापरभु आमचो उपरे खिंडिक समया काजे दया करलोसे। हुन, आमचो ले आदो लोग के बचालो आउर आमके ए पवितर ठान ने रतो काजे साहरा करलोसे। ए महापरभु, तुय आमके आस दखालीस आउर आमके कमेया बुता ले छंडाउन अस्तिर करलीस। 9 आमी कमेया तो आव तेबले बले आमचो कमेया जीवना ने बले महापरभु आमके नी छांडलो। मानतर महापरभु चो मंदिर बनातो काजे आउर भोसड़लो ठानमन के जतनातो काजे आमके जीव संगालो आउर आमके जहूदा आउर जरूसलेम ने सरन मिरतो काजे फारस चो राजामन चो मन के आमचो बाटे करुन आमचो उपरे दया करलो।
10 ए आमचो महापरभु, एदांय आमी काय बलुआंव? आमी तुचो हुकुममन के नी मानलु, 11 तुय आपलो कमेया अगमजानी बाटले असन सांगुन रलीस, ‘जोन देस् चो हकदार तुमी होआसे, हुन असुद देस् आय। हुता रतो लोगमन घिन-घिना बुता करुन हुन देस् चो गोटोक संद ले धरुन दुसर संद ले असुद करलासोत। 12 एईकाजे तुय आपलो बेटीमन के हुनमन चो बेटामन संगे आउर हुनमन चो बेटीमन के आपलो बेटामन संगे बिया नी कराव आउर हुनमन चो सुख-भोग नोहले अस्तिर रतो के केबई मन नी कर। तेबे तुमी बल बितामन बनासे, आउर हुन देस् चो नंगत-नंगत तीजमन के खाउक सकासे, आउर हुन देस् तुमचो पाछे, तुमचो थरलर चो हक ने अमदेया काजे रयदे’। 13 आमचो पाप आउर ओधरम किरता आमचो उपरे बिपती ईली। मानतर ए आमचो महापरभु, तुय आमचो ओधरम हिसाब ले आमके खुबे डंड नी दिलीस आउर आमचो ले आदो लोग के आपलो सेवा करतो काजे बचाउन संगालीस। 14 एदांय आमी फेर तुचो हुकुममन के नी मानुन, ए घिन-घिना बुता करतो लोगमन संगे नाता जोड़लु जाले, तुय आमके रीस होउन आमचो जीव नी धरसे कि आमचो काई चीना-बाना बले नी रयदे। काय, कोनी बले इसराएली तुचो डंड ले बाचुक सकदे? 15 ए इसराएल चो महापरभु जहोवा, तुय सत-नियाव करु आस! आमी बाचलो इसराएली लोग आजी बले जीव आंसु। दख, आमचो पाप किरता, आमी दोखी होलुंसे आउर तुचो पुरे उबा होउक नी सकुं।”