एजरा संगे जरूसलेम ने बोहड़ुन ईलो लोग
8
अरतछतर राजा चो राजपाट बेरा, बेबीलोन ले मोचो संगे जरूसलेम ने बोहड़ुन ईलो लोगमन चो कुटुम-मुखियामन एमन आत: 2 पीनहास चो थरलर ले गेरसोम, ईतामार चो थरलर ले दानिएल, दाउद चो थरलर ले हत्तूस, 3 जोन सकन्याह चो थरलर ले रये। परोस चो थरलर ले जकरियाह आउर हुनचो संगे एक सव दुय कोड़ी दस झन रला। हुनमन चो नावमन आपलाहान बंस चो कागत-पतर ने लिखलोर रये। 4 पहत-मोआब चो थरलर ले जरहयाह चो बेटा एल्यहोनई आउर हुनचो संगे दुय सव मनुकमन रला। 5 सत्तू चो थरलर ले जहजीएल चो बेटा सकन्याह आउर हुनचो संगे तीन सव मनुकमन रला। 6 आदीन थरलर ले जोनातान चो बेटा एबेद आउर हुनचो संगे पचास झन मनुकमन रला। 7 एलाम चो थरलर ले अतल्याह चो बेटा जसायाह आउर हुनचो संगे तीन कोड़ी दस मनुकमन रला। 8 सपत्याह चो थरलर ले मीकाएल चो बेटा जबद्याह आउर हुनचो संगे चार कोड़ी मनुकमन रला। 9 जोआब चो थरलर ले जहीएल चो बेटा ओबद्याह आउर हुनचो संगे दुय सव अठारा मनुकमन रला। 10 बानी थरलर ले सलोमीत चो बेटा जोसिप्याह आउर हुनचो संगे एक सव तीन कोड़ी मनुकमन रला। 11 बेबई थरलर ले हुनचो बेटा जकरियाह आउर हुनचो संगे एक कोड़ी आठ मनुकमन रला। 12 अजगाद थरलर ले हक्कातान चो बेटा जोहानान आउर हुनचो संगे एक सव दस मनुकमन रला। 13 अदोनीकाम चो थरलर ले पाछे ईलो लोगमन एमन आत: एलीपेलेत, जीएल, आउर समायाह। हुनमन संगे तीन कोड़ी मनुकमन रला। 14 बिग्वई थरलर ले ऊतई आउर जक्कूर रला आउर हुनमन संगे तीन कोड़ी दस मनुकमन रला।लेवीमन मंदिर चो सेवा-बुता करतोर
15 एमन सपाय के मय अहवा सहर बाटे बोहतो नंदी लगे रूंडा करले आउर आमी हुता तीन दिनतले तमु गाड़ुन रलु। मय हुता खुबे लोगमन आउर पुजारीमन के दखले मानतर लेवी थरलर चो कोकेई नी दखले। 16 फेर मय एलीएजर, अरीएल, समायाह, एलनतान, जारीब, एलनातान, नातान, जकरियाह आउर मसुल्लाम, ए सपाय मुखियामन के आउर नंगत सलाकरुमन जोयारीब आउर एलनातन के हागदिले। 17 आउर मय हुनमन के कासिप्या सहर चो मुखिया इद्दो लगे पठाले। मय हुनमन के समजाले, कासिप्या सहर ने रतो इद्दो आउर हुनचो भाई-बंधमन जोन मंदिर चो बुता करते रला, हुनमन ले गुहार करा कि हुनमन महापरभु चो मंदिर चो बुता करतो काजे आट-पाहरेयामन के पठाओत। 18 आमचो महापरभु चो दया आमचो उपरे रली, एईकाजे हुनमन, इसराएल चो बेटा लेवी चो बेटा महली चो थरलर ले गोटोक खुबे बुद बीता सेरेब्याह, आउर हुनचो बेटामन आउर भाई-बंधमन संगे अठारा मनुकमन के आनला। 19 आउर हसब्याह के, आउर हुनचो संगे मरारी थरलर ले जसायाह के आउर हुनचो भाई-बंधमन के आउर हुनमन चो बेटामन संगे एक कोड़ी मनुकमन के आनला। 20 एमन के छांडुन मंदिर चो बुता करतो काजे दुय सव एक कोड़ी आट-पाहरेयामन के बले आनला, जोनमन के दाउद आउर हुनचो मुखियामन, लेवीमन चो सेवा-बुता करतो काजे अलगाउन रला। एमन सपाय चो नाव लिखलोर रये।
एजरा, लोगमन के उपास आउर पारथना करतो काजे सांगतोर
21 फेर मय, अहवा नंदी कटा सपाय के महापरभु चो पुरे खुदे नानी होउन उपास रतो काजे सांगले कि महापरभु आमके, आमचो पिला-झीलामन के आउर धन-माल काजे नंगत बाट दखाओ। 22 मय बाटे-बाटे बयरीमन ले बाचतो काजे पाईकमन आउर घोड़ा-सुवारमन, राजा के मांगतो काजे लाज होले। कसनबलले आमी राजा के बलुन रलु, आमचो महापरभु आपलो सपाय रयतमन उपरे भलई करुआय। मानतर हुनके छांडतो लोग के हुन जंजाल रीस होउआय। 23 एईकाजे आमी उपास करुन आपलो महापरभु ले सरसरा बाट दखातो काजे गुहारलु आउर हुन आमचो गोट के सुनलो।
मंदिर काजे भेंट देतोर
24 फेर मय, बारा झन मुखिया पुजारीमन: सेरेब्याह, हसब्याह, आउर हुनमन चो दस झन भाई-बंधमन के अलगाले। 25 आउर मय हुनमन के, राजा, हुनचो सलाकरुमन, सवकारमन आउर हुता रलो सपाय इसराएलिमन, महापरभु चो मंदिर काजे दिलो सोन-रूप, नकी-भंडवा आउर भेंटमन के तोहलुन देउन दिले। 26 मय हुनमन के बाईस हजार किलो रूपा, तीन हजार पांच सव किलो रूपा चो नकी-भंडवामन, 27 तीन हजार पांच सव किलो सोन, हजार सोन चो सिक्का इतलो मोल चो बीस ठन सोन चो बटकामन, आउर सोन असन चमकतो बीती कांस चो खुबे मोल चो दुय ठन परात के तोहलुन दिले। 28 मय हुनमन के बलले, “तुमी तो जहोवा काजे पवितर आहास, आउर ए नकी-भंडवामन बले पवितर आय, आउर ए सोन-रूप तुमचो पुरखामन चो महापरभु काजे हरिक होउन आपलो मन ले दिलो धन-धन भेंट आय। 29 एईकाजे चेत ने राहा! तुमी एमन के पुजारीमन चो मुखियामन, लेवीमन आउर इसराएली कुटुम मुखियामन चो पुरे तोहलुन जरूसलेम ने जहोवा चो मंदिर चो भंडार ने देओतले एमन चो राखा करते राहा।” 30 तेबे पुजारीमन आउर लेवीमन, तोहलुन दिलो सोन-रूप आउर नकी-भंडवामन के जरूसलेम ने महापरभु चो मंदिर ने नीला।
जरूसलेम बाटे जातोर
31 पईल मयना चो बारवां दिने आमी अहवा नंदी खंड ले जरूसलेम बाटे निकरलु, आमचो महापरभु चो दया आमचो उपरे रलो किरता हुन आमके बयरीमन आउर बाट-टाकु खंगारमन चो हाथ ले बचालो। 32 फेर आमी जरूसलेम ने अमरुन, हुता तीन दिन रलु। 33 चवथा दिने सोन-रूप आउर नकी-भंडवा के आमचो महापरभु चो मंदिर पुरे तोहलुन उरियाह चो बेटा मेरेमोत पुजारी चो हाथे देउन दिलु। मेरेमोत पुजारी संगे पीनहास चो बेटा एलीआजर रलो। लेवी बंस चो जेसुअ चो बेटा जोजाबाद आउर बिन्नूई चो बेटा नोअद्याह बले रला। 34 हुनमन सपाय तीजमन के गनला आउर तोहल्ला, आउर सपाय चो तोहल्लो हिसाब के लिखला।
35 कयद ले ईलो इसराएली लोगमन आपलो महापरभु काजे असन होम-जतरा चेगाला, इसराएल चो बारा बंसमन काजे बारा ठन बाछा, चार कोड़ी सोला मेंडामन, आउर तीन कोड़ी सतरा ठन मेंडीमन, आउर पाप-जतरा काजे बारा ठन बोकड़ामन के चेगाला। ए सपाय जहोवा काजे चेगालो होम-जतरा रये। 36 फेर हुनमन राजा चो चिटी-पतर के फरात नंदी चो बेर-बुड़ती बाटे चो परघनमन ने रतो बड़े मुखिया आउर राजपालमन लगे अमराला। असने एजरा आउर हुनचो संग चो लोग, इसराएलिमन आउर महापरभु चो मंदिर चो बुता करतोने साहरा करला।