एजरा, जरूसलेम जातोर
7
एचो पाछे, फारस चो अरतछतर राजा चो दिनमन ने, एजरा बेबीलोन ले जरूसलेम बाटे निकरलो। हुन, सरायाह चो बेटा रये। सरायाह, अजरियाह चो बेटा, अजरियाह, हिल्कियाह चो बेटा, 2 हिल्कियाह, सल्लूम चो बेटा, सल्लूम, सादोक चो बेटा, सादोक, अहीतूब चो बेटा, 3 अहीतूब, अमरियाह चो बेटा, अमरियाह, अजरियाह चो बेटा, अजरियाह, मरायोत चो बेटा 4 मरायोत, जरहयाह चो बेटा, जरहयाह, उज्जी चो बेटा, उज्जी, बुक्की चो बेटा 5 बुक्की, अबीसू चो बेटा, अबीसू, पीनहास चो बेटा, पीनहास, एलीआजर चो बेटा, आउर एलीआजर, हारून बड़े-पुजारी चो बेटा रये। 6 एजरा, बेबीलोन ले जरूसलेम गेलो, हुन गोटोक लिखियार रये, आउर इसराएल चो महापरभु, मोसा के दिलो नियम-कानुन चो बारे ने खुबे जानते रये। एजरा मांगलो सपाय तीज के राजा हुनके दिलो। कसनबलले महापरभु जहोवा चो दया, हुनचो उपरे रये।7 आदो इसराएलिमन आउर पुजारीमन, लेवीमन, गीत-कुरियामन, दखा-राखा करुमन, आउर मंदिर चो आट-पाहरेयामन, अरतछतर राजा चो राज करतो सातवां बरक ने जरूसलेम ने गेला। 8 एजरा, अरतछतर राजा चो राज करतो सातवां बरक चो पांचवां मयना ने जरूसलेम ने अमरलो। 9 हुन पईल मयना चो पईल दिने बेबीलोन ले निकरलो आउर हुनचो महापरभु चो दया हुनचो उपरे रलो किरता पांचवां मयना चो पईल दिने हुन जरूसलेम ने अमरलो। 10 कसनबलले एजरा, जहोवा चो नियम-कानुन के जानतो काजे आउर हुनचो हिसाब ने चलतो काजे आउर इसराएलिमन के नियम-कानुन सिखातो काजे आपलो मन बनाउ रये।
एजरा के अरतछतर राजा दिलो चिटी-पतर
11 एजरा पुजारी, जहोवा चो नियम-कानुन आउर इसराएलिमन चो नीति-नियम चो धरम-पंडित आउर लिखियार रये। अरतछतर राजा, हुनके दिलो चिटी-पतर चो नकल ए आय: 12 “मय अरतछतर, राजामन चो राजा, सरग चो महापरभु चो नियम-कानुन के पक्का जानतो एजरा पुजारी काजे लिखेंसे, अस्तिर ने रा! 13 मय ए हुकुम देयंसे, मोचो राज ले जितलो इसराएलिमन आउर हुनमन चो पुजारीमन आउर लेवीमन, तुचो संगे जरूसलेम ने जातोर मन करेसोत हुनमन जाओत। 14 तुय आपलो महापरभु चो नियम-कानुन के नंगत ले जानीस। एईकाजे मय राजा आउर मोचो सात झन सलाकारमन, जहूदा आउर जरूसलेम चो हाल के महापरभु चो नियम हिसाब ले जानतो काजे तुके हुता पठाउंसे। 15 राजा आउर हुनचो राजपालमन, जरूसलेम ने रतो इसराएल चो महापरभु काजे जितलो सोन-रूप आपलो मन ले देयसोत, हुनमन के ने। 16 जोन सोन-रूप तुके बेबीलोन ले मिरेदे हुन सपाय के बले ने। इसराएलिमन आउर पुजारीमन आपलो मन ले जरूसलेम चो महापरभु चो मंदिर काजे देतो धन-धन भेंटमन के बले धरुन जा। 17 हुनी धन ले तुय बाछामन, मेंडामन, मेंडीमन, आउर हुनचो संगे चेगातो काजे अरन-जतरा आउर पीदी-जतरा चो तीजमन के बले घेन। ए सपाय के तुय जरूसलेम ने, तुचो महापरभु चो बेदी ने चेगाव। 18 बाचलो सोन-रूप के आपलो महापरभु चो इछा हिसाब ले जसन तुके आउर तुचो जात-भाईमन के नंगत लागेसे उसने करा। 19 तुके सोपुन दिलो नकी-भंडवा के तुचो महापरभु चो मंदिर चो सेवा काजे जरूसलेम चो महापरभु के सोपुन देस। 20 एचोले आगर महापरभु चो मंदिर काजे आउर काई लागली जाले, तुय राजा चो राज-भंडार ले देस।
21 मय अरतछतर राजा, फरात नंदी चो बेर-बुड़ती बाट चो परघनमन चो राज-भंडारीमन के हुकुम देयंसे, सरग चो महापरभु चो नियम-कानुन चो धरम-पंडित एजरा पुजारी के जोन बले लागेदे तुमी दियास ची। 22 तीन हजार चार सव किलो रूपा, दस हजार किलो इतलो गउं, दुय हजार लिटर अंगुर-रस, दुय हजार लिटर जयतून तेल, आउर जितलो बले लोन लागेदे हुतलो देउक सकास। 23 सरग चो महापरभु दिलो हुकुम हिसाब ले सरग चो महापरभु चो मंदिर काजे जोन करुक सकासे हुनके पुरा मन ले करा। असन करलास जाले राजा आउर हुनचो थरलर उपरे महापरभु चो रीस नी पड़ेदे। 24 फेर आमी तुमके चेत करुंसे, महापरभु चो मंदिर चो पुजारीमन, लेवीमन, गीत कुरियामन, दखा-राखा करुमन, मंदिर चो आट-पाहरेयामन नोहले दुसर कमेयामन ले भेंट आउर सारी नी मांगा नोहले पटी उसील बले नी करा।
25 ए एजरा, तुचो महापरभु दिलो बुद हिसाब ले बड़े नियावकारीमन आउर नियावकरुमन के बाछ। हुनमन फरात महानंदी चो बेर-बुड़ती बाट चो परघनमन ने रतो सपाय लोग चो नियाव करदे, जोनमन तुचो महापरभु चो नियम-कानुन के जानोत। नियम-कानुन के नी जानतो लोग के तुय सिखाव। 26 कोनी बले तुचो महापरभु आउर राजा चो नियम-कानुन के नी मानदे, हुनमन के मोरना डंड नोहले देस् ले निकरातो डंड नोहले हुनमन चो धन-माल के कुड़की करतो डंड नोहले हुनमन के कयदी बनातो डंड मिरो।”
एजरा, महापरभु चो मयमा करतोर
27 धन-धन आय आमचो पुरखामन चो महापरभु जहोवा, जोन जरूसलेम चो जहोवा चो मंदिर के पवितर मानतो काजे राजा चो मन के उकसालो। 28 मोचो महापरभु चो दया मोचो उपरे होली, हुन, राजा आउर हुनचो मुखियामन के मोचो उपरे दया करालो। एचई हिसाब ले मय ढाढ़ुस करले आउर इसराएलिमन चो मुखियामन के मोचो संगे जरूसलेम नेतो काजे रूंडा करले।