कुसरु राजा चो हुकुम-पतर के डगरातोर
6
तेबे दारा राजा दिलो हुकुम हिसाब ले, हुनमन कुसरु राजा चो हुकुम-पतरमन के बेबीलोन ने संगालो, घटलो गोटमन चो कितापमन चो मंजिगता डगराला। 2 मादे परघन चो एकबतना राज-सहर ने गोटोक गुंडियालो कागत-पतर मिरली, हुन थाने असन लिखलोर रये: 3 “कुसरू राजा आपलो राज करतो चो पईल बरक ने असन हुकुम दिलो, जोन थाने भेंट आनते रओत आउर होम-जतरा चेगाते रओत, हुनी थाने महापरभु चो मंदिर के जरूसलेम ने बनाहा। ए मंदिर, तीन कोड़ी हाथ लाम आउर तीन कोड़ी हाथ ओसार रओ, 4 हुता तीन ओरी बड़े-बड़े पकनामन आउर गोटोक ओरी नवा रूक चो दुलुम रओ; मंदिर के बनातो खरचा राज-भंडार बाटले होओ। 5 नबूकदनेसर राजा, जरूसलेम चो महापरभु चो मंदिर ने रलो सोन-रूप चो नकी-भंडवामन के बेबीलोन ने नेउ रये। हुनमन के जरूसलेम ने महापरभु चो मंदिर ने आपलाहान ठानमन ने संगाउन दियास।”दारा राजा चो हुकुम
6 दारा राजा ए हुकुम दिलो, “एदांय तुय फरात महानंदी चो बेर-बुड़ती बाट चो परघन चो राजपाल ततनई आउर सतबोरजनई आउर तुमचो संगवारीमन, जहूदीमन ले लापी राहा। 7 महापरभु चो मंदिर बनातो बुता के करुक दियास। जहूदी राजपालमन आउर धरम-सियानमन के महापरभु चो मंदिर के हुनचेई ठान ने बनाउक दियास। 8 मानतर मय तुमके एई हुकुम देयंसे: महापरभु चो मंदिर बनातो काजे जहूदी धरम-सियानमन के जितरो बले खरचा लागेदे, हुन सपाय खरचा फरात महानंदी चो बेर-बुड़ती बाट चो परघन चो राज-भंडार ले, हुता पटी उसील करलो धन ले तूरते देओत। कसनबलले हुनमन चो बुता कसने ने बले नी अटको। 9 सरग चो महापरभु के चेगातो बाछामन, मेंडामन, होम-जतरा काजे मेंडीमन आउर जरूसलेम चो पुजारीमन बललो हिसाब ले जितलो गउं, लोन, अंगुर रस, तेल आउर जोन बले लागेदे, हुन सपाय के रोजे पक्का दियास। 10 एईकाजे कि हुनमन सरग चो महापरभु के नंगत बास देतो बिती जतरा चेगाउन राजा आउर हुनचो बेटामन चो नंगत जीवना काजे पारथना करोत। 11 फेर मय असन हुकुम देयंसे, कोनी मनुक मोचो ए हुकुम के नी मानलो जाले, हुनचो घर चो दुलुम निकराउन हुनचो पेट ने भूसेंदे आउर हुनचो घर के भोसड़ायंदे। 12 महापरभु आपलो नाव के हुता माहान करलोसे। कोनी राजा नोहले रयत, मोचो हुकुम के नी मानदे आउर जरूसलेम ने, महापरभु चो मंदिर के सत्यानास करतो काजे होला जाले, हुनमन सत्यानास होओत। मय दारा राजा, ए हुकुम देयंसे, एके उसने ची करतोर आय।” (CC)
मंदिर के बनाउन निबड़ातोर
13 तेबे दारा राजा चो पठालो हुकुम-पतर हिसाब ले, फरात महानंदी चो बेर-बुड़ती बाट चो परघन चो ततनई राजपाल आउर सतबोरजनई आउर हुनचो संगवारीमन, हुनचो हुकुम मानुन उसनेची करला। 14 हगय अगमजानी आउर इद्दो चो बेटा, जकरियाह अगमजानी सांगलो अगमगोटमन हिसाब ले जहूदी धरम-सियानमन महापरभु चो मंदिर के बनाउन निबड़ाला। हुनमन इसराएल चो महापरभु चो हुकुम आउर फारस चो राजामन कुसरू, दारा आउर अरतछतर चो हुकुम हिसाब ले महापरभु चो मंदिर बनाउन निबड़ाला। 15 असन बरन ले दारा राजा चो राज करतो बेरा छटवां बरक ने अदार मयना चो तीसर दिने मंदिर के बनातोर सरली।
16 फेर इसराएलिमन, पुजारीमन, लेवीमन, आउर जितलो लोग कयद ले एउन रला, हुनमन सपाय महापरभु चो मंदिर के सोपतोदांय हरिक-उदीम बनाला। 17 हुन मंदिर के महापरभु काजे सोपलोदांय, हुनमन एक सव बाछामन, दुय सव मेंडामन आउर चार सव मेंडीमन आउर सपाय इसराएलिमन चो पाप चो खंडान काजे इसराएल बंस चो गनती हिसाब ले बारा ठन बोकड़ामन के बले जतरा चेगाला। 18 जसन मोसा चो किताप ने लिखलोर आसे, उसनेची हुनमन जरूसलेम ने महापरभु चो सेवा करतो काजे पुजारीमन आउर लेवीमन के बाछुन आरी-पारी बनाउन दिला।
फसह तिहार बनातोर
19 फेर पईल मयना चो चवदवां दिने कयद ले छंडाय होउन ईलो लोगमन फसह तिहार बनाला। 20 पुजारीमन आउर लेवीमन आपलाहान के सुद करला, एईकाजे हुनमन सपाय सुद रला। हुनमन, कयद ले ईलो लोगमन आउर आपलो पुजारी भाईमन आउर आपलाहान काजे फसह तिहार ने मेंडीमन के जतरा चेगाला। 21 तेबे कयद ले ईलो लोगमन आउर हुनमन संगे मिसलो दुसर जात चो लोगमन, आउर इसराएल चो महापरभु के डंडासरन करतो काजे जात-जात चो लोगमन चो घिन-घिना बुतामन ले आपन के अलगाउन रलो लोगमन, हुनमन सपाय फसह तिहार चो मास खादला। 22 हुनमन पाग नोहलो रोटी चो तिहार सात दिनतले हरिक मन ले मनाते रला। कसनबलले इसराएल चो जहोवा महापरभु हुनमन के हरिक करुन रये आउर अस्सूर देस् चो राजा चो मन के हुनमन बाटे करलो। तेबे इसराएल चो महापरभु जहोवा चो मंदिर बनातोने अस्सूर चो राजा हुनमन के साहरा करलो।