महापरभु चो मंदिर के फेर बनातोर
5
एदांय अगमजानी हगय आउर इद्दो चो बेटा अगमजानी जकरियाह, इसराएल चो महापरभु चो नाव ले जहूदा आउर जरूसलेम ने रतो जहूदीमन के अगमगोटमन सांगुक मुरियाला। 2 फेर सालतीएल चो बेटा जरूबाबेल आउर जोसादाक चो बेटा जेसुअ, करांड बांधुन जरूसलेम ने महापरभु चो मंदिर के फेर बनाउक मुरियाला; आउर महापरभु चो अगमजानीमन हुनमन संगे रउन हुनमन के साहरा करते रला।3 हुदलीदांय फरात महानंदी चो बेर-बुड़ती बाट चो परघन चो राजपाल ततनई, सतबोरजनई आउर हुनमन संग चो लोगमन, हुनमन लगे जाउन बलुक मुरियाला, “तुमके ए मंदिर बनातो हुकुम कोन दिलोसे?” 4 हुनमन मंदिर जतनातो लोग के असन बले पूछला “ए मंदिर बनाउमन चो नावमन काय-काय आय?” 5 मानतर महापरभु चो नंजर जहूदी धरम-सियानमन उपरे रली। एईकाजे हुनमन, ए गोट चो खबर दारा राजा लगे पठाउन हुनचोले हुकुम निकरतले एमन चो बुता के नी ठेबाला।
6 फरात महानंदी चो बेर-बुड़ती बाट चो राजपाल ततनई आउर सतबोरजनई आउर हुनमन संगे रलो लोगमन, दारा राजा लगे पठालो चिटी चो नकल ए आय। 7 “दारा राजा सपाय बाटले अस्तिर ने रओ! 8 राजा ए गोट के जानो, आमी जहूदा परघन ने माहान महापरभु चो मंदिर ने जाउन रलु जेके बड़े-बड़े पकनामन ले बनायसोत आउर हुता चो भिती उपरे दुलुममन लगायसोत; आउर ए बुता के हुनमन झटके-झटके बनाउन पुरा करेसोत। 9 आमी हुन सियानमन के असन पूछलु, ‘ए मंदिर बनातो काजे तुमके कोन हुकुम दिलोसे’? 10 आउर आमी तुके सांगतो काजे हुनमन चो नावमन के बले पूछलु। एईकाजे कि हुनमन चो मुखियामन चो नावमन आमी लिखुक सकुं। 11 हुनमन आमके असन बलला, ‘आमी तो सरग आउर मंजपुर चो महापरभु चो कमेया आंव, जोन मंदिर के आमी एबे जतनाउंसे हुनके खुबे बरक आगे इसराएल चो गोटोक माहान राजा बनाउन रये। 12 मानतर आमचो पुरखामन सरग चो महापरभु के रीस चेगाला, तेबे हुन हुनमन के बेबीलोन चो कसदी राजा नबूकदनेसर चो हाथे करुन दिलो। हुन राजा ए मंदिर के सत्यानास करलो आउर लोगमन के बेबिलोन ने नीलो। 13 मानतर बेबिलोन चो कुसरू राजा आपलो पईल बरक ने महापरभु चो मंदिर बनातो हुकुम दिलो। 14 महापरभु चो मंदिर चो सोन-रूप चो नकी-भंडवामन जेके नबूकदनेसर राजा जरूसलेम चो मंदिर ले निकराउन बेबीलोन चो मंदिर ने संगाउन रलो। हुनमन के कुसरू राजा हुताय ले निकराउन आपलो राजपाल सेसबस्सर के सोपुन दिलो। 15 राजा हुनके बललो, “ए नकी-भंडवामन के ने आउर जरूसलेम चो मंदिर ने संगाउन देस आउर जोन ठान ने महापरभु चो मंदिर रये हुनी ठान ने मंदिर बनाहा।” 16 तेबे सेसबस्सर ईलो आउर जरूसलेम ने महापरभु चो मंदिर बनातो काजे पाया खोड़लो, हुदलदांय ले महापरभु चो मंदिर के बनायसोत मानतर आजी ले बनाउन नी सारलासोत’। 17 एदांय राजा चो मन आसे जाले ए गोट के, बेबीलोन चो राजा चो घटलो गोटमन चो किताप ने डगराउन दखो। काय, कुसरू राजा सते जरूसलेम ने महापरभु चो मंदिर बनातो हुकुम देउन रये? पाछे राजा ए गोट चो बारे ने आमके आपलो बिचार सांगो।”