मंदिर फेर ले बनातोके बिरुद करतोर
4
जिदलदांय जहूदा आउर बिन्यामीन बंस चो बयरीमन सुनला कि कयद ले छंडाय होउन बोहड़लो लोग, इसराएल चो जहोवा महापरभु काजे गोटोक मंदिर बनायसोत, 2 तेबे हुनमन, जरूबाबेल आउर हुनचो कुटुम-मुखियामन लगे एउन बलला, “आमी बले तुमचो असन तुमचो महापरभु के डंडासरन करुंसे, अस्सूर देस् चो राजा एसहरदोन आमके एता आनलो दिन ले आमी महापरभु काजे ची जतरा चेगाउंसे। एईकाजे आमके बले तुमचो संगे मंदिर बनाउक दियास।” 3 मानतर जरूबाबेल, जेसुअ आउर इसराएल चो कुटुम-मुखियामन हुनमन के बलला, “आमचो महापरभु चो मंदिर आमी ची बनाउंदे, तुमचो साहरा नी धरुं, फारस चो कुसरू राजा चो हुकुम हिसाब ने, आमी ची महापरभु जहोवा काजे मंदिर बनाउंदे।”4 तेबे हुन देस् चो लोग, जहूदीमन के डराउन मंदिर बनातो बुता के अटकातो काजे होला। 5 फारस चो कुसरू राजा चो जीवता-जीव भर ले ची नाई, मानतर फारस चो दारा राजा, राज करतो समया ने बले, मंदिर बनाउक नी देतो काजे हुनमन, आपलो मुखियामन के घूस देते रला।
जरूसलेम सहर के बसापत करतोने बिरुद होतोर
6 छयरस राजा चो राज करतो चो मूर दिनमन ने, जहूदा आउर जरूसलेम ने रतो लोगमन चो बिरुद दोख-पतर लिखुन हुनमन राजा लगे पठाला।
7 अरतछतर राजा चो समया ने, बिसलाम, मितरदात, ताबेल आउर हुनमन संग चो लोग फारस चो अरतछतर राजा के चिटी-पतर लिखला। ए चिटी के अरामी भासा ने लिखुन रला। एईकाजे हुनके राजा चो भासा ने पढ़ुन सुनाउक पड़ली। 8 लिखियार सिमसई बाटले राजपाल रहूम, जरूसलेम चो बिरुद अरतछतर राजा काजे गोटोक चिटी लिखालो। 9 (हुन समया, राजपाल रहूम आउर लिखियार सिमसई संगे रलो दुसर लोगमन एमन आत: नियावकरुमन, राजपालमन, मुखियामन, फारसीमन, एरेकीमन, बेबिलोनीमन, सूसन ने रतो एलामीमन। 10 एमन के छांडुन जात-जात चो लोगमन बले रला, जोनमन के नाव कमालो मुखिया ओसनपर, हुनमन चो देसमन ले निकराउन सामरी परघन चो सहरमन ने आउर फरात महानंदी चो बेर-बुड़ती बाटे बसापत करालो। 11 ए सपाय लोगमन मिसुन लिखलो चिटी चो नकल ए आय जोन हुनमन राजा के पठाला):
“ए अरतछतर राजा, फरात महानंदी बेर-बुड़ती बाटे रतो तुचो कमेयामन बाटले तुके जुहार! 12 एदांय राजा ए गोट के जानो कि तुय आमचो लगे पठालो जहूदीमन, जरूसलेम ने अमरलासोत। हुनमन फेर ले, हुन टेकाहामन आउर दुसटमन चो सहर के जतनायसोत। फेर हुनचो पाया के उठायसोत आउर भाड़ा बनाउन सारदे बे। 13 एदांय राजा, ए गोट के बले जानो कि हुन सहर के आउर हुनचो भाड़ा के फेर ले बनालो जाले, लोगमन हुता रउक मुरियादे आउर पट्टी बले नी पठादे जेचो किरता राजा के काई कमई नी होयदे। 14 आमी तो राजमाहाल चो लोन खाउंसे, आउर आमचो राजा चो कोनी इज्जित धरतो के आमी दखुक नी सकुं। एईकाजे आमी राजा के चिटी पठाउन चेत कराउंसे। 15 तुचो पुरखापाटीमन चो समया ने घटलो गोटमन चो किताप ने खोजुन दखलीस जाले तुय जानसे, हुन सहर चो लोगमन लड़ई-झगड़ा करुमन आत। हुनमन राजा आउर हुनचो परघनमन चो अमदेया नोकसान करलासोत। आगे-जुगे बले हुनमन एता चो राजा चो बिरुद लड़ई-झगड़ा होते एयसे, एई किरता हुन सहर के सत्यानास करुन दिला। 16 आमी राजा के सांगुंसे, हुन सहर के फेर जतनाउन हुता चो राज-भाड़ामन बनली जाले फरात महानंदी चो हुन पाट तुचो काई हक नी रयदे।”
17 तेबे राजा असन बलुन चिटी पठालो, “राजपाल रहूम आउर लिखियार सिमसई आउर हुनमन संगे रलो सामरी आउर फरात महानंदी चो बेर-बुड़ती बाटे रतो बाचलो लोग, 18 तुमी ‘अस्तिर ने राहा’! तुमचो भासा ने पठालो चिटी के, मोके मोचेई भासा ने पढ़ुन सुनाला। 19 मय हुकुम देउन डगराउक तियारलोके जानले, आगे-जुग ले हुन सहर चो लोग राजामन चो बिरुद होते रओत आउर हुता लड़ई-झगड़ा होते रउआय। 20 जरूसलेम चो राजामन जोन फरात महानंदी चो हुन पाट चो परघनमन ने राज करते रला, हुनमन पटी धरते रला। 21 एदांय मय हुनमन के बुता ठेबातो काजे हुकुम देयंसे आउर जिदलदांय ले मय हुकुम नी देयें हुदलदांय ले हुन सहर के फेर नी जतनाओत। 22 चेत ने राहा आउर ए गोट के हेला नी समजा, राजा चो मन-इछा के नोकसान करतो अडरा बिचार बाड़ुक नी सको।”
23 अरतछतर राजा चो पठालो चिटी के जिदलदांय राजपाल रहूम आउर लिखियार सिमसई आउर हुनमन चो संगवारीमन के पढ़ुन सुनाला, तेबे हुनमन हरबर होउन जरूसलेम ने जहूदीमन लगे गेला आउर हुनमन चो बुतामन के आपलो बल आउर आपलो पन चो सकत ले ठेबाला। 24 तेबे जरूसलेम ने महापरभु चो मंदिर बनातो बुता ठेबली आउर फारस चो दारा राजा चो राज करतो दुसर बरक होओतले हुन बुता ठेबुन रये।