फेर ले बेदी बनातोर
3
इसराएलिमन आपलाहान सहर ने रउन सातवां मयना अमरली। तेबे हुनमन गोटोक सोर होउन जरूसलेम ने रूंडला। 2 महापरभु चो भगत मोसा चो नियम-कानुन ने लिखलो हिसाब ले, इसराएल चो महापरभु के होम-जतरा चेगातो काजे जोसादाक चो बेटा जेसुअ आउर हुनचो संगी पुजारीमन, सालतीएल चो बेटा जरूबाबेल आउर हुनचो भाई-बंधमन करांड बांधुन गोटोक बेदी बनाला। 3 हुनमन बेदी के हुनी थाने बनाला जोन थाने हुनचो पाया आगतले रली, कसनबलले हुनमन के हुन लगे रतो लोगमन ले डर रये। हुता हुनमन जहोवा काजे रोजे बियाने आउर सांज बेरा होम-जतरा चेगाते रओत। 4 जसन लिखलोर आसे, उसने हुनमन लाड़ी तिहार मनाला, आउर नियम हिसाब ने रोजे जितलो होम-जतरा चेगातोर रये हुतलेई रोजे चेगाला। 5 एचो पाछे, रोजे चेगातो होम-जतरा, नवा जोन तिहार ने चेगातो जतरा आउर जहोवा पवितर करलो तिहारमन ने कबूल धरालो समया ने चेगातो जतरा आउर जहोवा काजे आपलो मन-इछा ले चेगातो धन-धन भेंट चेगाउक मुरियाला। 6 हुनमन सातवां मयना चो पईल दिन ले जहोवा काजे होम-जतरा चेगाउक मुरियाला। मानतर हुदलदांय जहोवा चो मंदिर चो पाया नी उठाउन रओत।7 फारस चो कुसरू राजा चो हुकुम हिसाब ले हुनमन, कारिगरीकरुमन आउर बढ़ईमन के भूती दिला। देवदार रूकमन के लबानोन ले समदूर बाटले जापा सहरे आनतो काजे सीदोनी आउर सोर देस् चो लोगमन के खादी-पीदी आउर तेल जोड़ुन दिला।
मंदिर के फेर ले बनातोर
8 जहूदीमन जरूसलेम ने ईलो पाछे, दुसर बरक चो दुसर मयना ने सालतीएल चो बेटा जरूबाबेल आउर जोसादाक चो बेटा जेसुअ, हुनमन चो भाई-बंधमन, पुजारीमन आउर लेवीमन आउर कयद ले छंडाय होउन ईलो लोगमन एमन सपाय मिसुन जरूसलेम चो मंदिर बानातो बुता करुक मुरियाला। आउर बीस बरक नोहले हुनचोले आगर बरक चो लेवीमन के जहोवा चो मंदिर चो बुता करुमन चो जुमे होतो काजे बाछला। 9 तेबे जेसुअ आपलो बेटामन आउर भाई-बंधमन संगे, आउर जहूदा चो थरलर कदमीएल आपलो बेटामन संगे, बिनूई आउर होदव्याह, हेनादाद चो बेटामन संगे, आउर लेवीमन आपलो बेटामन आउर भाई-बंधमन संगे महापरभु चो मंदिर ने कारिगिरी करु लोगमन चो जुमे होला।
10 जिदलदांय राज-मिस्तरीमन जहोवा चो मंदिर काजे पाया खोड़ला, तेबे पुजारीमन आपलो पुजारी-फटई पींदला आउर तोड़ी धरुन ईला। हुनमन संगे आसाप बंस चो लेवीमन झांज धरुन ईला। इसराएलिमन चो दाउद राजा बनालो नीती हिसाब ले हुनमन जहोवा चो मयमा करला। 11 फेर हुनमन जहोवा काजे मयमा आउर धन-धन चो गीत गावला:
“परभु नंगत आय!
हुन इसराएलिमन चो उपरे जुग-जुग काजे सत-मया करुआय”।
जेबे जहोवा चो मंदिर काजे पाया उठाला, तेबे सपाय लोग बड़े राग ले चिचियाउन-चिचियाउन जहोवा चो जय-जय करला। 12 जेबे जहोवा चो मंदिर काजे पाया बनाला, तेबे खुबे लोग हरिक काजे चिचियाउन महापरभु चो जय-जय करते रला। मानतर खुबे पुजारीमन आउर लेवी आउर इसराएल बंस चो कुटुम-मुखियामन ले सियानमन, जोनमन महापरभु चो जुना मंदिर के दखुन रला, हुनमन नवा मंदिर चो पाया बनातो के दखुन किरकिरुन गागला। 13 जय-जय करतो आउर गागतो राग गोटकी संगे मिसली। हरिक काजे लोगमन चिचियालो किरता गागतो राग के कोनी चिताउक नी सकला। खुबे लोग बड़े राग ले जय-जय करते रला एईकाजे हुन लापी ले सुना देते रये।