नेहेमियाह
नेहेमियाह, जरूसलेम काजे फिकिर करतोर
1
हकल्याह चो बेटा नेहेमियाह चो जीवना चो गोट: मय, अरतछतर राजा चो राज करतो बीसवां बरक चो किसलेव मयना ने, सूसन नाव चो राज-भाड़ा ने रले, 2 तेबे मोचो भाई-बंद हनानी आउर हुनचो संगे जहूदा ले ईलो आदो लोगमन बले ईला। मय हुनमन के, कयद ले छंडाय होउन बेबिलोन ले ईलो जहूदीमन आउर जरूसलेम चो बारे ने पूछले। 3 हुनमन मोके असन सांगला, “कयद ले छंडाय होउन ईलो जहूदी लोगमन खुबे बिपती ने पड़लासोत, आउर लाज पड़लासोत। कसनबलले जरूसलेम चो भाड़ा टुटलीसे आउर देवड़ीमन जरलीसे।”4 ए गोटमन के सुनते खन मय बसुन गागले आउर खुबे दिनतले सूरता करुन-करुन आपलो भाई-बंद काजे करलाते रयें आउर सरग चो महापरभु पुरे उपास करते रले आउर असन बलुन पारथना करते रयें। 5 “ए सरग चो महापरभु जहोवा, सबुले बड़े आउर डरतो लाईक महापरभु, तुके मया करतो लोग आउर हुकुम मानतो लोगमन काजे तुय आपलो बायदा के पुरा करुआस आउर हुनमन उपरे दया करुआस। 6 एदांय तुय, मोचो बाटे दख आउर आपलो कमेया चो पारथना के कान डेरुन सुन, जेके मय तुचो इसराएली कमेयामन काजे रात-मंजन करेंसे। ए परभु, आमी तुचो बिरुद पाप करलुसे आउर मय, इसराएलिमन चो पाप के मानेंसे। मय आउर मोचो पुरखापाटी करलो पाप के बले मानेंसे। 7 आमी तुचो बिरुद खुबे अडरा करलुसे, कसनबलले तुय आपलो कमेया मोसा बाटले आमके दिलो हुकुममन, नीति-नियममन, आउर नियम-कानुनमन के आमी नी मानलु। 8 एदांय हुन गोट के सूरता कर जेके तुय, आपलो कमेया मोसा के बलुन रलीस, ‘तुमी मोचो पतेयातो लाईक नी रलोने मय तुमके जात-जात चो लोगमन चो मंजी जत-खत करेंदे। 9 मानतर तुमी मोचो बाटे मन बोहड़ालोने आउर मोचो हुकुम के मानुन हुनी हिसाब ले चललोने, तुमी बादरी खाले कोनी कोंटा ने रले बले, मय तुमके हुताले रूंडाउन मोचो नाव ने आराधना करतो काजे बाछलो ठान ने अमरायंदे’। 10 एदांय एमन तुचो कमेयामन आउर तुचेई रयत आत, एमन के तुय आपलो बड़े सकत आउर तुचेई बांहा चो बल ले छंडालिसीस। 11 ए परभु, तुय आपलो कमेया चो गुहार के सुन, आउर जोनमन तुचो नाव के मानेसोत, हुन कमेयामन चो गुहार के बले सुन। आजी तुचो कमेया चो मन-इछा पुरा कर कि राजा मोचो उपरे जीव-दुखो!” मय, राजा चो अंगुर-रस खुआउ बीता रये।