नेहेमियाह 2

नेहेमियाह, जरूसलेम जातोर

अरतछतर राजा, राज करतो बीसवां बरक चो नीसान^* मयना ने घटलो गोट ए आय: राजा चो पुरे अंगुर-रस मंडालोर रये। मय हुन अंगुर-रस राजा के दिले। एचो ले आगे, मय केबई हुनचो पुरे मुरमुरा होउन नी रयें। 2 तेबे राजा मोके पूछलो, “काय काजे तुय मुरमुरा होलिसीस? काय, तुय बेमार तो नीआस? ए तो तुचो मन चो फिकिर आय होती।” तेबे मय खुबे डरले। 3 मय राजा के बलले, “राजा जुग-जुग जीओ! मोचो पुरखामन चो मोठमन रतो सहर उजड़लीसे, आउर हुनचो देवड़ी डसुन सत्‍यानास होलीसे, तेबे मय कसन ने हरिक रउआंय?” 4 राजा मोके पूछलो, “तुय काय मन करसीस?” तेबे मय सरग चो महापरभु ले मने-मने पारथना करुन राजा के बलले, 5 “राजा के मन लागेसे जाले आउर तुचो कमेया ले तुय हरिक आसीस जाले, मोके जहूदा सहरे पठाव, जोन थाने मोचो पुरखामन चो मोठमन आसे। मय जाउन हुनके फेर ले बनायंदे।” 6 (हुदलदांय राजा लगे रानी बले बसुन रली), तेबे राजा मोके पूछलो, “तुके हुता कितलो दिन लागेदे आउर तुय केबे बोहड़ुन एसे?” मय हुनके मोचो बोहड़तो समया सांगले, आउर हुन मोके हरिक ले पठातो काजे तियार होलो। 7 फेर मय राजा के बलले, “राजा चो मन आसे जाले, फरात महानंदी चो बेर-बुड़ती बाट चो परघनमन चो राजपालमन काजे चिटीमन लिखुन देस, तेबे हुनमन मोके आपलो देस् बाटले अस्‍तिर ने जहूदा देस् जाउक देदे। 8 राजा चो रान चो राखा करु आसाप काजे बले चिटी लिखुन देस कि हुन, सहर चो देवड़ी, भाड़ा आउर मोचो घर काजे दुलुम-पाटी बनातो काजे मोके रूक देओ।” मोचो महापरभु चो दया मोचो उपरे होली, एईकाजे राजा मोके हुन चिटीमन लिखुन दिलो।

9 तेबे मय फरात महानंदी चो हुन पाट बेर-बुड़ती बाटे जाउन राजपालमन के राजा चो लिखलो चिटीमन दिले। राजा मोचो संगे सेना चो मुखियामन आउर घोड़ा चेगुमन के बले पठाउन रलो। 10 होरोनेया सनबल्‍लत आउर अमोनी तोबियाह नाव चो राज करुमन सुनला कि इसराएलिमन चो भलई करतो काजे कोनी मनुक ईलोसे। तेबे हुनमन खुबे रीस होला।

नेहेमियाह जरूसलेम ने एउन जाच-परख करतोर

11 मय जरूसलेम सहरे अमरुन तीन दिनतले हुता रले 12 आउर मय राती बेरा उठले आउर मोचो संगे कोनी-कोनी लोग बले रला। जरूसलेम चो भलई काजे महापरभु, मोचो मने दिलो बिचार के मय कोकेई नी सांगुन रये। मोचो चेगलो जनावर के छांडुन आउर दुसर जनावर मोचो लगे नी रओत। 13 मय राती बेरा कड़की-देवड़ी बाटले निकरुन बोड़ा-साप नाव चो पजरा बाटले कचरा कुड़ा-देवड़ी ने अमरले। हुता मय जरूसलेम चो टुटलो भाड़ामन के आउर डसलो देवड़ीमन के जांच-परख करले। 14 तेबे मय पुरे जाउन पजरा-देवड़ी बाटले राजा चो कुंड लगे गेले। मानतर मोचो चेगलो जनावर काजे ओलतो ठान नी रये। 15 एईकाजे मय राती बेरा कड़की रेटे-रेटे ले जाउन भाड़ा के परखले। फेर हुताले किंदरुन भाति कड़की-देवड़ी बाटले बोहड़ुन ईले। 16 राजपालमन नी जानला मय किदलदांय गेले आउर काय-काय करले। एबतले मय हुता चो जहूदीमन, पुजारीमन, नाव-कमालो सियानमन, मुखियामन आउर हुता चो बुता करुमन के बले काई ची नी सांगुन रये।

भाड़ा जतनातो पक्‍का बिचार

17 जेबे मय बोहड़ुन ईले तेबे मय हुनमन के बलले, “तुमी सपाय दखसाहास, आमचो काय हाल होलीसे, जरूसलेम उजड़ुन गेलीसे आउर हुनचो देवड़ीमन बले डसलीसे। एईकाजे इआ, आमी जरूसलेम चो भाड़ा के फेर ले बनाउं कि आमचो इजित नी जाओ।” 18 फेर मय हुनमन के सांगले, महापरभु चो दया मोचो उपरे आसे आउर राजा मोके काय-काय बललोसे। तेबे हुनमन बलला, “हव, आमी हुनमन के बनावां।” आउर हुनमन ए भलई बुता करुक तियार होला। 19 एके सुनुन, होरोनेया सनबल्‍लत आउर अमोनी मुखिया तोबियाह आउर अरबी गेसेम मिसुन आमके हांसी-खेली करला आउर बदी देउन बलला, “तुमी ए काय करसाहास? काय तुमी राजा चो बिरुद ने बुता करसास?” 20 तेबे मय हुनमन के बलले, “सरग चो महापरभु आमचो बुता के पुरा करायदे। एईकाजे आमी हुनचो कमेयामन करांड बांधुन भाड़ा के फेर ले बनाउंदे। मानतर जरूसलेम ने तुमचो काई बाटा, काई हक आउर काई चीना बले नी रयदे।”