जरूसलेम चो भाड़ा के जतनातोर
3
तेबे एल्यासीब बड़े-पुजारी आपलो संगी पुजारीमन संगे करांड बांधुन मेंडा-देवड़ी के जतनाला आउर हुनचो कपाटमन के लगाला। आउर हम्मेआ गुबा* ले धरुन हननेल गुबा लग ले भाड़ा के जतनाउन महापरभु के सोपला। 2 हुनचो पाछे चो भाड़ा के, जरीहो सहर चो मनुकमन जतनाला आउर हुनचो पाछे चो भाड़ा के, इमरी चो बेटा जक्कूर जतनालो।3 फेर मछरी-देवड़ी के हस्सना चो बेटामन जतनाला। हुनमन हुनचो पटेरा-चवकट बनाउन कपाटमन लगाला आउर सिकरा-सूरसामन लगाला। 4 हुनमन चो पाछे चो भाड़ा के, हक्कोस चो नाती आउर उरियाह चो बेटा मेरेमोत जतनाला। एचो पाछे चो भाड़ा के मसेजबेल चो नाती आउर बेरेक्याह चो बेटा मसुल्लाम जतनालो। एचो पाछे चो भाड़ा के बाना चो बेटा सादोक जतनालो। 5 एमन ले पाछे चो भाड़ा के तकोअ सहर चो लोगमन जतनाला। मानतर एमन थानो नाव-कमालो सियानमन आपलो महापरभु चो सेवा-बुता के आपलो खांदे नी बोअला।
6 फेर जुना-देवड़ी के पासेह चो बेटा जोयादा आउर बसोदयाह चो बेटा मसुल्लाम जतनाला। हुनमन हुनचो पटेरा-चवकटमन बनाउन कपाटमन लगाला आउर सिकरा-सूरसामन लगाला। 7 हुनचो पाछे चो भाड़ा के गिबोनेया मलत्याह आउर मेरोनोतेया जादोन आउर गिबोन आउर मिसपा चो लोगमन जतनाला, एमन फरात महानंदी चो बेर-बुड़ती बाट चो राजपाल चो हक ने रला। 8 हुनमन चो पाछे चो भाड़ा के हरहयाह चो बेटा उजीएल सोनार जतनालो। हुनचो पाछे चो भाड़ा के बास-तेल बनाउ बीता हनन्याह जतनालो। हुनमन ओसार-भीती अमरतले जरूसलेम के जतनाला। 9 पाछे चो भाड़ा के हूर चो बेटा रफाया जतनालो, हुन जरूसलेम चो आदो परघनमन चो राजपाल रलो। 10 हरूमप चो बेटा जदायाह आपलो घर पुरे चो भाड़ा के जतनालो। एचो पाछे चो भाड़ा के हसबनयाह चो बेटा हत्तूस जतनालो। 11 हारीम चो बेटा मलकिया आउर पहतमोआब चो बेटा हस्सूब दुनो मिसुन हुनचो दुसर भाग चो भाड़ा के जतनाला आउर हुनमन तनदूर-गुबा के बले जतनाला। 12 एचो पाछे चो भाड़ा के जरूसलेम चो बाचलो आदो परघनमन चो राजपाल हल्लोहेस चो बेटा सल्लूम आपलो बेटीमन संगे जतनालो।
13 कड़की-देवड़ी के, जानोह सहर चो लोगमन संगे मिसुन हानून जतनालो। हुनमन हुनचो पटेरा-चवकटमन बनाउन कपाटमन लगाला आउर सिकरा-सूरसामन लगाला। एके छांडुन हुनमन एक हजार हाथ लाम सहर भाड़ा के कचरा कुड़ा-देवड़ी लग ले जतनाला।
14 कचरा कुड़ा-देवड़ी के रकाब चो बेटा मलकिया जतनालो। हुन, बेथकेरेम परघन चो राजपाल रये। हुन हुनचो पटेरा-चवकटमन बनाउन कपाटमन लगालो आउर सिकरा-सूरसामन लगालो।
15 पजरा-देवड़ी के कोलहोजे चो बेटा सल्लूम जतनालो। सल्लूम, मिसपा चो राजपाल रये। हुन, हुनचो पटेरा-चवकटमन बनाउन कपाटमन लगालो आउर सिकरा-सूरसामन लगालो। हुन, राजा चो पदर लगे चो सिलोह-कुंड लग चो भाड़ा के दाउदपुर ले धरुन, उतरतो पयटी लगले बनालो। 16 हुनचो पाछे चो भाड़ा के अजबूक चो बेटा नेहेमियाह जतनालो, जोन बेत-सूर चो आदो परघन चो राजपाल रये। हुन, दाउदपुर चो मोड़ा-भाटा पुरे ले, खोड़ालो मुंडा लग ले, आउर बीरमन चो घर लग ले चो भाड़ा के जतनालो।
भाड़ा जतनालो लेवीमन
17 एचो पाछे चो भाड़ा के आपलो लेवी भाई-बंधमन संगे मिसुन बानी चो बेटा रहूम जतनालो; कईला चो आदो परघन चो राजपाल हसब्याह ने आपलो परघन बाटले भाड़ा के जतनालो। 18 एचो पाछे चो भाड़ा के, कईला चो बाचलो परघन चो राजपाल हेनादाद चो बेटा बिन्नूई जतनाला। 19 एचो पाछे चो भाड़ा चो गोटोक भाग के, हतियार संगातो घर चो चेगानी पुरे ले धरुन, भाड़ा चो कोना अमरतले मिसपा चो राजपाल जेसुअ चो बेटा एजेर जतनालो। 20 एचो पाछे, भाड़ा चो दुसर भाग के, हुनी कोना ले धरुन एल्यासीब बड़े पुजारी चो घर चो दुआर लग ले जब्बई चो बेटा बारूक खुबे मसागत ले जतनालो। 21 एचो पाछे, आउर गोटोक भाग के, एल्यासीब घर चो कपाट ले धरुन हुनी घर चो टोक लग ले हक्कोस चो नाती, उरियाह चो बेटा मेरेमोत जतनालो।
भाड़ा जतनालो पुजारीमन
22 हुनचो पाछे चो भाड़ा के, जरूसलेम चो आली-पाली रतो पुजारीमन जतनाला। 23 हुनचो पाछे, बिन्यामीन आउर हस्सूब आपलो घर पुरे चो भाड़ा के जतनाला। एचो ले पाछे, मसेया चो बेटा आउर अनन्याह चो नाती अजरिया आपलो घर लगे चो भाड़ा के जतनाला। 24 तेबे आउर गोटोक भाग के, अजरिया चो घर ले धरुन, भाड़ा चो मोड़ेया लग ले हेनादाद चो बेटा बिन्नूई जतनालो। 25 फेर ऊजय चो बेटा पालाल, हुनी मोडे़या चो पुरे चो भाग आउर राज-माहाल चो दुआर-राखा करु चो डेंग गुबा चो जोड़ान लग ले जतनालो। हुनचो पाछे चो भाड़ा के परोस चो बेटा पदायाह जतनालो। 26 ओपेल ने रतो मंदिर चो आट-पाहरेयामन, पानी-देवड़ी चो बेर-उदिया बाटे आउर हुनचो लग चो डेंग गुमट लग ले जतनाला। 27 एचो पाछे, डेंग गुमट चो पुरे चो ओपेल चो भाड़ा लग ले तकोअ सहर चो लोगमन जतनाला।
भाड़ा जतनातो काजे साहरा करलो दुसर लोगमन
28 फेर घोड़ा-देवड़ी ले धरुन पुजारीमन आपलाहान घर पुरे चो भाड़ामन जतनाला। 29 एचो पाछे, इम्मेर चो बेटा सादोक आपलो घर पुरे चो भाड़ा के जतनालो। एचो पाछे, बेर-उदिया बाट चो देवड़ी के राखा करु सकन्या चो बेटा समाया जतनालो। 30 भाड़ा चो दुसर भाग के सेलेमया चो बेटा हनन्याह आउर सालाप चो छटवां बेटा हानून जतनाला। बेरेक्याह चो बेटा मसुललाम आपलो बाकरा पुरे चो भाड़ा के जतनालो। 31 हुनचो पाछे चो भाड़ा के, मंदिर चो आट-पाहरेयामन आउर बेपारीमन चो रतो ठान लग ले आउर निहारतो-देवड़ी चो पुरे, कोना चो ढाबा लग ले मलकिया सोनार जतनालो। 32 कोना चो ढाबा ले धरुन मेंडा-देवड़ी लग ले सोनारमन आउर बेपारीमन जतनाला।