जहूदीमन आपलो बयरीमन के जीततोर
9
बारवां मयना अदार चो तेरवां दिने राजा चो हुकुम आउर नियम पुरा होतोर रली, आउर जहूदीमन चो बयरीमन हुनमन के हरातो आसा ने रओत। मानतर एचो उलटा जहूदीमन आपलो बयरीमन के हराला। 2 हुन दिने, राजा छयरस चो सपाय परघन चो सहरमन ने रतो जहूदीमन, आपलो जात चो लोग के नास करतो लोग ले लड़ई करतो काजे रूंडा होला। देस्-देस् चो सपाय लोग के हुनमन चो डर चेपाउ रये, एईकाजे हुनमन चो बिरुद कोनी जुद करुक नी सकला। 3 आउर परघनमन चो सपाय मुखियामन, हक संगाउमन, राजपालमन, आउर राजा चो मंतरीमन बले जहूदीमन पाटेया होला। कसनबलले हुनमन मोरदकय के डरते रओत। 4 राजमाहाल ने मोरदकय चो खुबे मान रये, आउर गुलाय परघन ने हुनचो इजित-मान रये; आउर हुनचो मयमा-मान बाड़ते चे रये। 5 जहूदीमन, आपलो बयरीमन के खांडा ले मारुन नास करला आउर आपलो मन भावलो असन हुनमन संगे बेबार करला। 6 जहूदीमन, सूसन राजभाड़ा ने पांच सव लोगमन के मारुन नास करला। 7-10 हुनमन जहूदीमन चो बयरी, हमदाता चो बेटा हामान चो दसो बेटामन: परसनदाता, दलपोन, असपाता, पोराता, अदलिया, अरीदाता, परमसता, अरीसे, अरीदे, आउर वयजाता के मोरते मारला। मानतर हुनमन चो धन-माल के झीका-उड़मा नी करला। 11 हुनी दिने सूसन राजभाड़ा ने मारलो लोग चो गनती राजा के सांगला। 12 तेबे राजा, एसतेर रानी के बललो, “जहूदीमन, सूसन राजभाड़ा ने ची पांच सव लोगमन आउर हामान चो दसो बेटामन के मोरते मारला; आउर राज चो दुसर परघनमन ने काय-काय करला होती! एचो ले आगर तुचो आउर काय गुहार आसे? हुनके पुरा करेंदे। तुय आउर काय मांगसीस? हुन बले तुके देयंदे।” 13 एसतेर बलली, “राजा चो मन आसे जाले सूसन चो जहूदीमन के आजी चो असन काली के बले आपलो बयरीमन के मोरते मारतो छुट देस, आउर हामान चो दसो बेटामन चो मोड़ीमन के डेरीमन ने ओराओत।” 14 राजा बललो, “असने ची करोत।” ए हुकुम के सूसन ने सुनाला आउर हामान चो दसो बेटामन चो मोड़ीमन के खमामन ने ओराला। 15 सूसन चो जहूदीमन, अदार मयना चो चवदवां दिने फेर रूंडा होउन सूसन चो तीन सव मनुकमन के मारला, मानतर हुनमन चो धन-माल के झीका-उड़मा नी करला।16 अदार मयना चो तेरवां दिने, राज चो दुसर परघनमन चो जहूदीमन बले आपलो जीव बचातो काजे रूंडा होला, आउर आपलो बयरीमन ले पचतर हजार मनुकमन के मोरते मारला आउर अस्तिर पावला; मानतर हुनमन चो धन-माल के झीका-उड़मा नी करला। 17-19 तेरवां दिने जहूदीमन असन करला, आउर चवदवां दिने बिसाउन भाति भोज खादला, ए दिन के हुनमन हरिक-उदीम चो दिन मानला। उसने गांवरेया जहूदीमन, अदार मयना चो चवदवां दिने हरिक-उदीम आउर भोज बनाला आउर गोटोक-दुसर घरे खादी-पीदी अमराउन तिहार मानला। मानतर सूसन ने रतो जहूदीमन, अदार मयना चो तेरवां आउर चवदवां दिने रूंडा होला, आउर पंदरवां दिने बिसाउन हुनी दिन के हरिक-उदीम आउर भोज चो दिन मानला।
पूरीम तिहार चो मूर
20 मोरदकय, ए सपाय घटलो गोटमन के लिखुन राजा छयरस चो सपाय परघनमन ने, लगे आउर लापी रतो सपाय जहूदीमन के चिटीमन पठालो, 21 आउर अदार मयना चो चवदवां आउर पंदरवां दिने, रोजे बरक पूरीम तिहार मानतो हुकुम दिलो। 22 कसनबलले हुनी दिनमन ने जहूदीमन, आपलो बयरीमन के हराउन अस्तिर पावला, आउर एई मयना ने हुनमन चो दुख-तकलीस, हरिक ने आउर हुनमन चो करलानी, हरिक-उदीम ने पलटु रये। एईकाजे हुनमन ए दिनमन ने भोज खाउन हरिक-उदीम होओत आउर गोटोक-दुसर घरे खादी-पीदी अमराओत, आउर गरीब-दुखी के दान देतो दिन मानोत।
23 जसन मोरदकय हुनमन के चिटी ने पूरीम तिहार मानतो काजे लिखु रये, उसने चे जहूदीमन करुक मुरियाला आउर जहूदीमन काजे ए गोटोक पक्का नीती-नियम बनली। 24 कसनबलले जहूदीमन चो बयरी, अगागी हमदाता चो बेटा हामान, सपाय जहूदीमन के सत्यानास करतो उआट करुन रलो आउर जहूदीमन के सत्यानास करतो काजे “पूर” बललोने, चिटी पकाउन रलो। 25 मानतर एसतेर रानी आपलो लोग के बचातो काजे राजा के गुहारली, तेबे राजा असन हुकुम लिखाउन पठालो कि जहूदीमन चो बिरुद हामान चो दुसट उआट हुनचो आउर हुनचो बेटामन उपरे पलटो। एईकाजे हुनके आउर हुनचो बेटामन के उचकतो डेरीमन ने उचकला। 26 जहूदीमन, मोरदकय लिखलो चिटी चो हुकुममन आउर हुनमन उपरे पड़लो गराहां आउर जोन बले हुनमन संगे होउ रये, हुनचो किरता हुन तिहार चो नाव पूर* ले पूरीम संगाला। 27 जहूदीमन आपलाहान काजे, आपलो पिलामन काजे आउर हुनमन संगे मिसलो लोगमन काजे गोटोक नीती-नियम बनाला, जेचोले हुनमन कबूल धरालो दिने, नियम हिसाब ले बरक चो दुय दिन तिहार मानोत। 28 ए तिहार दिनमन के परघन-परघन आउर सहर-सहर चो सपाय पीड़ी चो सपाय कुटुम-लोग सूरता करोत। जहूदीमन चो मंजी ए पूरीम दिनमन केबई नी मेटो, आउर ए दिनमन के हुनमन चो थर-लर अमदेया मानोत। 29 तेबे अबीहेल चो बेटी एसतेर रानी आउर जहूदी मोरदकय, पूरीम चो बारे ने लिखलो मोरदकय चो पईल चिटी के पक्का करतो काजे हक संगे दुसर चिटी लिखला। 30 ए चिटीमन के मोरदकय, राजा छयरस चो एक सव सतायीस परघनमन ने रतो सपाय जहूदीमन के अस्तिर चो बर देउन असन आसा ले पठालो कि 31 जहूदी मोरदकय आउर एसतेर रानी, जहूदीमन के दिलो हुकुम हिसाब ले कबूल धरालो समया ने पूरीम तिहार मनाओत। जसन हुनमन आपलो आउर आपलो पिलामन काजे उपास करते रओत आउर दुख ने रओत उसने हुनमन “पूरीम” चो दिनमन के बले पक्का समया ने मनाओत। 32 आउर एसतेर रानी चो हुकुम ले “पूरीम” के मानतोर नियम बनाला आउर हुनके किताप ने लिखला।