हामान के मोरना चो डंड देतोर
7
राजा आउर हामान, एसतेर रानी चो भोज ने ईला। 2 दुसर दिने बले अंगुर-मंद खातो बेरा राजा फेर एसतेर के पूछलो, “ए एसतेर रानी! तुचो काय गुहार आय? हुनके पूरा करेंदे। तुय काय मांगसीस जाले मांग। मय तुके आधा राज बले देयंदे।” 3 एसतेर रानी बलली, “ए राजा, तुय मोचो ले हरिक आसीस आउर मोचो मांगतो गोट के मानसीस जाले मोचो जीव आउर मोचो लोग चो जीव के बचाव। 4 कसनबलले मोके आउर मोचो लोग के मोरते मारुन नास करतो काजे बिकलासोत। आमके सोजे कमेया-कमेयीन होतो काजे बिकले, मय ओगाय रते; आउर ए गोट राजा के सांगतो लाईक बले नी होती।” 5 तेबे राजा छयरस, एसतेर रानी के पूछलो, “असन बिचार करु बीता कोन आय आउर हुन कहां आसे?” 6 एसतेर बलली, “आमचो बिरुद करु बयरी एई दुसट हामान आय।” तेबे हामान, राजा-रानी के खुबे डरुन थरथरलो। 7 तेबे राजा जंजाल रीस होउन अंगुर-मंद खातो थान ले उठुन राजमाहाल चो पदर ने गेलो। एके दखुन हामान बिचारलो, राजा मोके डंड देतो पक्का बिचार करलो होती। एईकाजे हुन एसतेर रानी के आपलो जीव बचातो काजे गुहारुक मुरियालो। 8 हुदलीदांय राजा, राजमाहाल चो पदर ले अंगुर-मंद खातो थाने बोहड़ुन ईलो आउर हामान के एसतेर बसलो गादी ने लोंहलोके दखलो; तेबे राजा बललो, “काय हुन, मोचो माहाल ने मोचेई पुरे रानी के बेरपेला करतो काजे होयसे?” राजा चो टोंड ले ए गोट निकरते खन सेवकमन हामान चो थमना के ढाकला। 9 तेबे राजा थाने रतो ठेरवामन ले हरबोना नाव चो ठेरवा, राजा के बललो, “राजा चो जीव बचाउ मोरदकय के उचकतो काजे हामान थाने, पचास हाथ डेंग उचकतो-खमा बनालासे।” तेबे राजा बललो, “हुनके हुताय उचका।” 10 तेबे मोरदकय के उचकतो काजे हामान बनालो उचकतो-खमा ने ची हामान के उचकला। तेबे राजा चो रीस सीतरली।