राजा, मोरदके चो मान करतोर
6
हुनी राती राजा चो झूमा उड़सली। एईकाजे हुन, घटलो गोटमन चो किताप आनुन पढ़तो हुकुम दिलो आउर हुनमन हुनके पढ़ुन सुनाला। 2 हुता असन लिखलोर रये, राजा थानो दुय झन बाट राखा करु ठेरवामन बिगताना आउर तेरेस, राजा छयरस के मोरते मारतो उआट करते रला, तेबे एचो खबर मोरदकय, राजा के देउ रलो। 3 तेबे राजा पूछलो, “एचो पलटा मोरदकय के काय इजित-मान करला?” राजा चो सेवा करतो कमेयामन हुनके बलला, “हुनचो काजे काई चे नी करला।” 4 राजा पूछलो, “दुआरे कोन आसे?” हुदलीदांय हामान, मोरदकय के आपलो बनालो उचकतो-डेरी ने उचकतो काजे राजा के सांगतो आसा ले राजमाहाल चो दुआरे एउ रये। 5 तेबे राजा चो कमेयामन हुनके बलला, “दुआरे तो हामान उबलोसे।” राजा बललो, “हुनके भीतरे हागदियास।” 6 हामान भीतरे ईलोके राजा हुनके पूछलो, “जोन मनुक के राजा इजित-मान करतो काजे हरिक आसे, हुनचो काजे काय करले होती?” हामान असन बिचारलो, “राजा मोचो ले आगर, फेर आउर कोचो इजित-मान करुआय ता?” 7 एईकाजे हामान, राजा के बललो, “राजा जोन मनुक चो मान करतो काजे हरिक आसे, 8 हुनचो काजे राजा पींदतो पाट, राजा बसतो गोटोक घोड़ा आउर राजा पींदतो राज-मुकुट बले आनोत। 9 फेर राज-पाट के आउर घोड़ा के राजा थानो बड़े राजपाल के सोपुन देओत, आउर जेचो इजित-मान करतोर आय हुनके राज-पाट पींदाउन हुन घोड़ा ने बसाउन सहर चो जोड़ानमन ने असन बलते बुलाओत, ‘राजा जेचो इजित-मान करतो काजे हरिक आसे हुनचो संगे असने चे करेदे’।” 10 राजा, हामान के बललो, “तुचो सांगलो असन तूरते राज-पाट आउर घोड़ा धरुन राजमाहाल देवड़ी लगे बसलो जहूदी मोरदकय लगे जा आउर हुनचो संगे उसने चे कर जसन तुय सांगलीसीस आउर हुता काई चो उना नी होओ।” 11 तेबे हामान, राज-पाट आउर घोड़ा के धरुन मोरदकय लगे गेलो आउर हुनके राज-पाट पींदालो, आउर हुनके घोड़ा ने बसाउन असन बलते गुलाय सहर ने बुलालो, “राजा जेचो इजित-मान करतो काजे हरिक आसे हुनचो संगे असने चे करेदे।”12 पाछे मोरदकय तो राजमाहाल चो देवड़ी लगे बोहड़ुन गेलो, मानतर हामान मुरुसनाय होलो आउर मुंड ढाकी होउन घरे गेलो। 13 हामान आपलो बायले जेरेस आउर आपलो सपाय मीतमन के आपलो संगे होलो सपाय गोटमन के सांगलो, तेबे हुनचो मीतमन आउर हुनचो बायले जेरेस हुनके बलला, “जोन मोरदकय के तुय हिनस्ता करुक मन करसीस हुन जहूदी बंस चो आय जाले, तुय हुनके जीतुक नी सकसे, मानतर तुचेई नोकसान होयदे।” 14 हुनमन गोटेयाते ची रओत आउर राजा थानो ठेरवामन हुता अमरला, आउर हामान के एसतेर चो भोज काजे झटके नीला।