राजा आउर हामान के एसतेर चो नेवता
5
तीसर दिने एसतेर आपलो पाट* पींदुन राजमाहाल चो देवड़ी भीतरे जाउन राजा बसतो खोली दुआरे उबा होली। राजा, राजमाहाल चो राजगादी ने माहाल भीतरे ओलतो बाट पुरे बसु रये; 2 राजा छयरस, रानी एसतेर के दुआरे उबा होलो के दखुन हरिक होलो, आउर आपलो हाथे रलो सोन चो राजगुबा के हुनचो बाटे लमालो। तेबे एसतेर, लगे जाउन राजगुबा चो टीप के छिंवली। 3 तेबे राजा हुनके पूछलो, “ए एसतेर रानी, तुय काय मन करसीस? तुय काय बले मांगुआस जाले मांग, तुके आधा राज बले मय देयंदे।” 4 एसतेर बलली, “राजा चो मन आसे जाले आजी मय राजा काजे बनालो भोज ने हामान के धरुन एउक होओ।” 5 तेबे राजा एसतेर चो मन-इछा के पुरा करतो काजे हुकुम दिलो, “एसतेर नेवता दिलो भोज ने जातो काजे हामान के तूरते आना।” तेबे राजा आउर हामान, एसतेर तियार करलो भोज ने गेला। 6 भोज ने अंगुर-मंद खातो समया ने राजा, एसतेर के पूछलो, “तुचो काय गुहार आय? हुनके पूरा करेंदे। तुय काय मांगसीस, मांग? तुके आधा राज बले देयंदे।” 7 एसतेर बलली, “मोचो गुहार आउर मोचो मन-इछा एई आय: 8 राजा मोचो ले हरिक आसे आउर मोचो गुहार के सुनुन मोचो मन-इछा असन बर देउक मन करेसे जाले काली के मय तियार करतो भोज ने राजा आउर हामान दुनो इआ, तेबे राजा बललो असन मय मांगेंदे।”मोरदकय के मोरते मारतो उआट
9 हुन दिने हामान खुबे हरिक ने भोज ले निकरलो आउर मोरदकय के राजमाहाल चो देवड़ी लगे दखलो। मानतर मोरदकय आपलो पुरे मान काजे नी उबलोके दखुन खुबे रीस होलो। 10 तेबले बले हामान आपलो रीस के सीतराउन आपलो घरे गेलो; आउर आपलो मीतमन के आउर बायले जेरेस के हागदेउक पठालो। 11 तेबे हामान हुनमन के आपलो धन-माल चो ढोंग, आपलो खुबे बेटामन आउर राजा आपलो सपाय मुखियामन आउर सपाय सेवा-बुता करुमन ले बड़े पन हुनके दिलो चो बारे ने सांगलो। 12 हामान ए गोट के बले सांगलो, “एसतेर रानी बले राजा संगे मोके छांडुन आउर कोकई भोज ने एतो काजे नेवता नी दिली; आउर काली के बले राजा संगे मोके चे नेवतलीसे। 13 फेर बले हुन जहूदी मोरदकय के राजमाहाल चो देवड़ी लगे बसलोके दखलोने ए सपाय फोकाहा असन लागुआय।” 14 हुनचो बायले जेरेस आउर हुनचो सपाय मीतमन बलला, “पचास हाथ डेंग उचकतो-खमा बनाउक बल, आउर मोरदकय के उचकतो काजे बियाने राजा के सांग; पाछे हरिक ले राजा संगे भोज ने जा।” ए सला हामान के नंगत लागली आउर उसने चे गोटोक उचकतो-खमा बनालो।