मोरदके, एसतेर के साहरा मांगतोर
4
जिदलदांय मोरदकय ए सपाय गोटमन चो बारे ने सुनलो तेबे मोरदकय आपलो फटई चीरलो, टाट के पींदुन आपलो उपरे लाकड़ी रिकालो आउर सहर चो मंजी जाउन करलानी ले चिचियाउन-चिचियाउन गागलो*; 2 हुन, राजमाहाल चो देवड़ी लगे ची जाउक सकलो, कसनबलले कोकेई टाट पींदुन राजमाहाल चो देवड़ी भीतरे ओलतोर नी बने। 3 जोन-जोन परघनमन ने राजा चो हुकुम अमरली हुता जहूदीमन खुबे गाग-गगरीही होउक मुरियाला। हुनमन उपास-पियास करुन टाट ओड़ुन लाकड़ी रिकाय होउन भुंये लोंडुन रओत।4 जिदलदांय एसतेर रानी चो कमेयीनमन आउर ठेरवामन, हुनके ए गोट सांगुन दिला, तेबे रानी खुबे मुरमुरा होली; आउर मोरदकय लगे फटई पठाउन असन बलुक बलली, “टाट हिटाउन एके पींद”; मानतर मोरदकय हुनके नी धरलो। 5 तेबे एसतेर चो सेवा काजे, राजा बाछलो हताक ठेरवा के हागदेउन हुकुम दिली, “मोरदकय लगे जाउन दख, काय होली गुने मोरदकय असन होलोसे।” 6 हताक, राजमाहाल चो देवड़ी पुरे रलो सहर चो जोड़ान ने मोरदकय लगे गेलो। 7 मोरदकय हुनके सपाय गोट सांगलो आउर ए गोट बले सांगलो कि जहूदीमन के सत्यानास करतो काजे हामान, राज-भंडार ने दस हजार रूपा चो सिक्कामन देतो बचन दिलोसे। 8 फेर जहूदीमन के सत्यानास करतो काजे जोन हुकुम सूसन ने निकराउ रओत हुनचो गोटोक चिटी मोरदकय, हताक चो हाथे दिलो कि एसतेर के दखाउन हुता चो गोट सांगो। हताक बाटले एसतेर के ए हुकुम बले दिलो कि राजा लगे भीतरे जाउन आपलो लोगमन काजे गुहारो। 9 हताक, एसतेर लगे जाउन मोरदकय चो सांगलो गोट के सुनालो। 10 तेबे एसतेर, हताक के मोरदकय लगे जाउन असन सांगतो हुकुम दिली, 11 “राजा थानो कमेयामन आउर सपाय परघन चो लोग ए गोट जानोत, कोनी मनुक होओ नोहले बायले, हुकुम मिरलोर नोहलोर भीतर खोली ने राजा लगे गेलोने हुनके मोरते मारतो हुकुम आसे; सोजे हुनी चे बाचुक सके जेचो बाटे राजा आपलो राजगुबा लमायदे। मानतर तीस दिन ले राजा मोके नी हागदिलोसे।” 12 हताक, एसतेर चो ए गोट मोरदकय के सांगलो। 13 तेबे मोरदकय, एसतेर लगे असन खबर पठालो, “तुय राजमाहाल ने आंसे बलुन आपलो मने असन नी बिचार कि सपाय जहूदीमन ले मय ची बाचेंदे। 14 कसनबलले एबे तुय ओगाय रले, कसनी बरन ले बले जहूदीमन के छंडावा आउर अस्तिर मिरेदे ची, मानतर तुय आपलो बुआ चो कुटुम संगे नास होसे। कोन जाने जहूदीमन चो छंडावा काजे ची तुके रानी-पन मिरलीसे होती” 15 तेबे एसतेर, मोरदकय लगे ए खबर पठाली, 16 “तुय जाउन सूसन चो जहूदीमन के रुंडाव, आउर तुमी सपाय मिसुन मोचो काजे उपास राहा, तीन रात-मंजन काई खाहा-पीया नी होआ। मय बले आपलो कमेयीनमन संगे उसने उपास करेंदे। पाछे मय, नियम चो उलटा राजा लगे भीतरे जायंदे, भले मोके मोरुक होओ नोहले जीउक होओ।” 17 तेबे एसतेर चो हुकुम असन मोरदकय गेलो आउर उसनेची करलो।