जहूदीमन के नास करतो काजे हामान चो उआट
3
ए गोटमन चो पाछे राजा छयरस, अगागी हमदाता चो बेटा हामान के बड़े पन दिलो आउर हुनचो संगवारी मुखियामन ले खास बनाउन बड़े पन चो गादी ने बसालो। 2 राजमाहाल चो देवड़ी लगे रतो सपाय कमेयामन के, हामान चो पुरे लोउन हुनके डंडासरन करतो काजे राजा हुकुम देउ रये; मानतर मोरदकय हुनचो मान काजे नी लोंये आउर डंडासरन बले नी करे। 3 तेबे राजमाहाल चो देवड़ी लगे रतो राजा चो कमेयामन मोरदकय के पूछला, “तुय राजा चो हुकुम के काय काजे नी मानसीस?” 4 हुनमन रोजे असने पूछते रओत। मानतर मोरदकय, हुनमन चो गोट के मुरे धियान नी देते रये। कसनबलले मोरदकय हुनमन के सांगुन रये, “मय जहूदी आंय।” तेबे हुनमन असन बिचारुन मोरदकय चो ए गोट, हामान के सांगुन दिला कि हुनचो पुरे ए गोट चलेदे कि नाई। 5 जिदलदांय हामान दखलो मोरदकय हुनचो पुरे नी लोंये आउर हुनके डंडासरन बले नी करे, तेबे हुन खुबे रीस होलो। 6 हामान, एकलाय मोरदकय के मोरते मारतोर खुबे नानी गोट समजलो। एईकाजे हुन, छयरस राजा चो राज ने रतो सपाय जहूदीमन के मोरदकय चो जात चो आत जानुन सत्यानास करतो उआट करलो।7 राजा छयरस चो बारवां बरक ने, पईल मयना नीसान ले धरुन बारवां मयना अदार अमरतले गोटोक-गोटोक दिन आउर गोटोक-गोटोक मयना काजे हामान चो पुरे पूर बललोने, चिटी* पकालो* आउर बारवां मयना चो तेरवां दिन काजे चिटी निकरली। 8 तेबे हामान, राजा छयरस के बललो, “तुचो राज चो सपाय परघनमन ने गोटोक जात चो लोग, सपाय जात चो लोगमन चो मंजी बिगरलासे। हुनमन चो नीती-नियम, दुसर सपाय जातमन चो नीती-नियम ले भिने आय आउर हुनमन राजा चो कानुन के नी मानोत। एईकाजे हुनमन एता रले राजा के काई नफा नी होये। 9 राजा चो मन आसे जाले, हुनमन के नास करतो हुकुम निकराओ। तेबे मय, राजा-भंडार ने संगातो काजे दस हजार रूपा चो सिक्का* राज-भंडारीमन चो हाथे देयंदे।” 10 तेबे राजा आपलो अंडकी ले मोहर-मूंदी निकराउन अगागी हमदाता चो बेटा हामान के दिलो, जोन जहूदीमन चो बयरी रये। 11 राजा, हामान के बललो, “हुन दस हजार रूपा चो सिक्कामन आउर हुन लोग के बले तुचो हक ने देयंसे, तुय हुनमन संगे जसन भावले उसने कर।”
12 तेबे पईल मयना नीसान चो तेरवां दिने राजा थानो लिखियारमन के हागदिला, आउर हामान चो हुकुम हिसाब ने सपाय हक संगातो बीतामन, सपाय जातमन चो मुखियामन, आउर परघन-परघन चो राजपालमन के, आपलो-आपलो परघनमन चो अखरमन ने आउर सपाय परघन चो लोगमन के आपलो-आपलो भासामन ने राजा छयरस चो नाव ने चिटीमन लिखला; आउर हुन चिटीमन ने राजा चो मूंदी चो मोहर (छाप) लगाला। 13 आउर डाकवामन चो हाथे राज चो सपाय परघनमन ने चिटी पठाला कि गोटकी दिने बललोने, बारवां मयना अदार चो तेरवां दिने, जुवान होओ नोहले सियान, बायले होओ नोहले पिला, सपाय जहूदीमन के मोरते मारतोर आय आउर हुनमन चो धन-माल के झीका-उड़मा करतोर आय। 14 राजा चो हुकुम चो ए चिटीमन के सपाय परघनमन चो लोगमन काजे पठाला कि हुन दिन सपाय परघनमन चो लोग जहूदीमन के मोरते मारतो काजे तियार रओत। 15 राजा चो हुकुम ले डाकवामन तूरते निकरुन गेला, ए हुकुम के सूसन राजभाड़ा ने बले सुनाला। राजा आउर हामान तो पीवतो-खातो काजे बसला; मानतर सूसन सहर चो लोग आका-बुका होला।