एसतेर के रानी बनातोर
2
ए गोटमन चो पाछे, राजा छयरस चो रीस उतरली। तेबे राजा के, वस्ती आउर हुनचो करलो बुता आउर हुनचो बिरुद निकरालो हुकुम सूरता ईली। 2 तेबे राजा चो सेवा करुमन बलला, “राजा काजे सुंदर-सुंदर कुंआरी लेकीमन डगराओत। 3 राजा आपलो राज चो सपाय परघनमन ने मुखियामन के बाछो कि हुनमन सुंदर कुंआरी-लेकीमन डगराउन सूसन राजभाड़ा चो रानी-डेरा ने रूंडा करोत आउर हुनमन के, कुंआरी-लेकीमन चो दखा-रखा करु, राजा थानो ठेरवा हेगे के सोपुन देओत; आउर कुंआरी-लेकीमन के सुद होउन सजारी होतो तीजमन देओत। 4 तेबे हुनमन ले जोन कुंआरी लेकी के राजा मन करेदे, हुनके रानी वस्ती चो पलटा रानी बनाओत।” ए गोट राजा के खुबे नंगत लागली आउर हुन असने चे करलो।5 सूसन राजभाड़ा ने मोरदकय नाव चो गोटोक जहूदी रये, जोन बिनयामीनी कीस चो पुती, सिमी चो नाती आउर जाईर चो बेटा रये। 6 बेबीलोन चो राजा नेबुकदनेसर, जरूसलेम ले जहूदा चो राजा जकोनया संगे जोनमन के कयदी बनाउन नेउ रये, हुनमन संगे मोरदकय चो बोड़ु* कीस बले रये। 7 मोरदकय आपलो काका चो बेटी हदस्सा के पोसलो जेके एसतेर बले बलसोत; हुन लेकी खुबे सुंदर रये, मोरदकय हुनके आपलो बेटी असन पोसलो, कसनबलले हुनचो आया-बुआ मोरु रओत। 8 जिदलदांय राजा चो हुकुम आउर नियम सुनाला आउर खुबे कुंआरी-लेकीमन के सूसन राजभाड़ा ने हेगे के सोपला, तेबे एसतेर के बले राजभाड़ा ने बायले-लेकीमन चो दखा-रखा करु हेगे के सोपुन दिला। 9 एसतेर के दखुन हेगे हरिक होलो आउर हुनचो संगे नंगत बेबार करलो; हुन झटके हुनके सुद होतो तीजमन, हुनचो खादी-पीदी, आउर राजमाहाल ले हुनचो काजे सात झन कमेयीनमन के बाछुन दिलो, आउर हुनके, हुनचो कमेयीनमन संगे रानी-डेरा* ने रतो काजे सबुले नंगत ठान बले दिलो। 10 एसतेर आपलो जात आउर कुटुम-लोग चो बारे ने नी सांगली, कसनबलले मोरदकय हुनके “नी सांग” बलुन हुकुम देउ रये। 11 मोरदकय रोजे दिना रानी-डेरा चो दुआरे ए जानतो काजे बुलते रये कि एसतेर नंगत आसे आउर हुनचो काय होयदे?
12 कुंआरी-लेकीमन काजे बनालो नियम हिसाब ले बारा मयना पाछे गोटोक-गोटोक कुंआरी-लेकी के राजा छयरस लगे जातो समया एते रली, आउर इतलेही समया हुनमन चो रंग-रुप के सजारतो ने लागते रये। छय मयना गंधरस चो तेल ले आउर छय मयना बास तेल ले सजातो ने लागते रये। 13 असन बरन ले कोनी कुंआरी-लेकी राजा लगे जातो बेरा जोन तीज के रानी-डेरा ले राजमाहाल ने नेउक मन करते रये हुन तीज हुनके देते रओत। 14 सांज बेरा हुन, राजा लगे जाते रये आउर बियान पावतो के हुन बोहड़ुन रानी-डेरा चो दुसर घरे जाउन राजा चो राकलो बायलेमन के राखा करु ठेरवा, सासगज चो हक ने रते रये। राजा हुनचो ले हरिक होउन हुनके नाव धरुन नी हागदिलोर फेर राजा लगे नी जाते रये।
15 जेबे मोरदकय चो काका अबीहेल चो बेटी एसतेर के राजा लगे जातो समया अमरली, जेके मोरदकय आपलो बेटी असन पोसुन रये, तेबे राजा थानो ठेरवा हेगे जोन बले तीज हुनके नेतो काजे सांगु रये, हुनचो ले आगर एसतेर काई चे नी मांगली। एसतेर के दखलो सपाय लोग हुनचोले हरिक होला। 16 असन बरन ले एसतेर के, राजमाहाल ने राजा छयरस लगे हुनचो राजपाट चो सातवां बरक चो दसवां मयना तेबेत ने अमराला। 17 राजा छयरस, एसतेर के दुसर सपाय कुंआरी-लेकीमन ले आगर मया आउर दया करलो। एईकाजे हुनचो मुंडे किरोटी पींदालो आउर एसतेर के वस्ती चो पलटा रानी बनालो। 18 तेबे राजा आपलो मुखियामन आउर सेवा-बुता करुमन के बड़े भोज दिलो; आउर एचो नाव “एसतेर चो भोज” संगालो आउर सपाय परघनमन ने छुटी देउन आपलो ठाट-बाट हिसाब ले खुबे भेंट बले बाटलो।
मोरदकय, राजा चो जीव बचातोर
19 जिदलदांय कुंआरी-लेकीमन के दुसर हार रुंडाला, तेबे मोरदकय राजमाहाल चो देवड़ी लगे बसु रये। 20 एसतेर आपलो जात आउर कुटुम-लोग चो बारे ने कोकेई नी सांगु रये, कसनबलले मोरदकय हुनके “नी सांग” बलु रये; आउर एसतेर, हुनचो गोट के उसनेचे धरते रये जसन हुनके पोसतो बेरा मानते रये। 21 हुनी दिनमन ने मोरदकय राजमाहाल चो देवड़ी लगे बसलो बेरा, राजा थानो बाट राखा करु ठेरवामन बिगताना आउर तेरेस, राजा छयरस के रीस होउन मोरते मारतो उआट करला। 22 मानतर मोरदकय ए गोट के सुनलो आउर ए गोट के रानी एसतेर के सांगलो। ए खबर के एसतेर, मोरदकय चो नाव ने राजा के सांगली। 23 जेबे हुनमन चो उआट चो बारे ने परखला, ए गोट सत निकरली आउर बिकतान आउर तेरेस के उचकतो-डेरीमन ने उचकला। ए गोटमन के राजा चो पुरे, घटलो गोटमन* चो किताप ने लिखला।