एसतेर
चो कहनी
छयरस राजा चो राजपाट
1
ए गोट राजा छयरस* चो समया चो आय। ए हुनी छयरस आय जोन एक सव सताईस* परघनमन ने बललोने, भारत ले धरुन कूस* देस् अमरतले राज करते रलो। 2 हुन दिनमन ने राजा छयरस, सूसन नाव चो राजभाड़ा ने आपलो राजगादी ने बसुन राज करते रये। 3 हुन आपलो राजपाट चो तीसर बरक ने आपलो सपाय मुखियामन आउर सेवा-बुता करुमन के बड़े भोज दिलो। ए भोज ने, फारस आउर मादय परघनमन चो सेना-मुखियामन आउर सवकारमन आउर राजपालमन बले एउ रला। 4 राजा छयरस, खुबे दिन ले बललोने, एक सव अस्सी* दिन होओतले हुनमन के आपलो राजपाट चो ठाट-बाट, धन-माल आउर मयमा-मान के दखाते रलो। 5 मुखियामन के दिलो भोज सरलो पाछे राजा, सूसन राजभाड़ा ने रुंडलो सपाय नानी-बड़े लोग के राजमाहाल दुआरे, पदर ने सात दिन होओतले भोज खुआलो। 6 पदर ने ओरालोर पड़दामन, पंडरी फटई आउर नीलिया-नीलिया लटकन चो रये आउर हुनके बांगा रंग चो डोरीमन ले रूपा चो खाड़ुमन संगे संगमरमर चो खमामन ने ओरालोर रये। हुता सोन-रूप चो बनालो गादीमन रये। हुन गादीमन के पदर ने लाल, पंडरी, हरदी आउर करेया रंग चो संगमरमर पकना बसालोर थाने मंडाउन रओत। 7 हुन भोज ने, राजा चो ठाट-बाट हिसाब ले बनालोर अंगुर-मंद के बरन-बरन चो सोन चो गिलासमन ने सगामन चो मन भरतले खुआते रला। 8 अंगुर-मंद खातोर तो नियम हिसाब ले रली, मानतर कोकेई बेरपेला नी खुआते रओत। कसनबलले राजा आपलो माहाल चो भंडारीमन के हुकुम देउ रये कि जसन सपाय सगामन के भायसे उसनेची करा। 9 रानी वस्ती बले राजा छयरस चो माहाल ने बायले-लेकीमन के भोज खुआली।10 सातवां दिने राजा छयरस, अंगुर-मंद खाउन हरिक रलो बेरा आपलो सेवा करु सात झन ठेरवामन_ महूमान, बिजता, हरबोना, बिगता, अबगता, जेतेर आउर करकस के हुकुम दिलो 11 कि रानी वस्ती के किरोटी पींदाउन राजा चो पुरे आना; जेचोले राज-राज चो लोगमन आउर मुखियामन हुनचो सुंदर रूप के दखदे, कसनबलले हुन खुबे सुंदरी रये। 12 राजा चो ए हुकुम के ठेरवामन ले सुनुन रानी वस्ती, “नी एयें” बलली। एईकाजे राजा बायबिकाल रीस होलो।
13 (राजा, नीती-नियम जानतो बुद बितामन ले सला धरतो नीती रये। 14 हुनचो लगे फारस आउर मादय परघनमन चो करसना, सेतार, अदमाता, तरसीस, मेरेस, मरसना, आउर ममूकान नाव चो सात झन मुखियामन रला, जोनमन के राजा लगे इयार-जाहार होतो हक रये आउर राज ने एमन के खास-खास पन देउ रओत।) 15 तेबे राजा छयरस, हुन नीती-नियम चो पंडितमन के पूछलो, “मोचो बाटले ठेरवामन चो हाथे पठालो हुकुम के रानी वस्ती नी मानली, तेबे नीती हिसाब ले हुनचो संगे काय करतोर आय?” 16 तेबे राजा आउर मुखियामन चो पुरे ममूकान बललो, “रानी वस्ती, एकलाय राजाचेई नाई, मानतर सपाय मुखियामन आउर हुन सपाय लोगमन चो बले इजित धरलीसे, जोनमन राजा छयरस चो सपाय परघनमन ने रयसोत। 17 कसनबलले रानी हुकुम नी मानतो गोट के गुलाय राज चो बायलेमन गोटेयादे, ‘राजा छयरस, रानी वस्ती के आपलो पुरे आनतो हुकुम दिलो, मानतर हुन नी ईली’, तेबे हुनमन बले आपलाहान मनुक चो गोट नी मानदे। 18 आजी ले फारस आउर मादय राज मुखियामन चो (सवकारिन) बायलेमन, रानी चो ए गोट के सुनला जाले हुनमन बले राजा चो मुखियामन चो गोट नी मानदे; असन बरन ले खुबे रीस आउर लड़ई-झगड़ा उबजेदे। 19 ए गोट राजा के नंगत लागेसे जाले असन हुकुम निकराओ आउर एके फारसीमन आउर मादयमन चो कानुन ने बले लिखोत, जेके केबई पलटुक नी होओ। एदांय ले रानी वस्ती, राजा छयरस चो पुरे केबई नी एओ आउर रानी चो पन कोनी दुसर के देओत जोन रानी वस्ती ले नंगत रओ। 20 राजा चो ए हुकुम गुलाय राज ने सुनाला जाले सपाय बायलेमन आपलाहान मनुकमन चो मान करदे, भले हुन बड़े पन चो होओ नोहले नानी।” 21 ए गोट, राजा आउर मुखियामन के नंगत लागली आउर राजा छयरस, ममूकान चो सला के मानलो। 22 राजा आपलो राज ने बललोने, सपाय परघनमन चो लोगमन के, आपलाहान भासामन चो अखरमन ने चिटीमन पठालो कि सपाय मनुकमन आपलो घरे हक संगाओत आउर आपलाहान भासा गोटेयाओत।