जरूबाबेल संगे बोहड़ुन ईलो पुजारीमन आउर लेवीमन
12
जितलो पुजारीमन आउर लेवीमन सालतीएल चो बेटा जरूबाबेल आउर जेसुअ संगे बेबीलोन ले जरूसलेम ने बोहड़ुन ईलो लोगमन एमन आत: सरायाह, जरमियाह, एजरा, 2 अमरियाह, मल्लूक, हतूस, 3 सकन्याह, रहूम, मेरेमोत, 4 इद्दो, गिन्नतोई, अबियाह, 5 मीयामीन, माधाह, बिलगा, 6 समायाह, जोयारीब, जदायाह, 7 सल्लू, आमोक, हिल्कियाह आउर जदायाह। जेसुअ बड़े-पुजारी चो दिनमन ने, एई पुजारीमन आउर हुनमन चो भाई-बंधमन, मुखियामन रला।8 फेर लेवीमन ले एमन जरूसलेम ने ईला: जेसुअ, बिन्नूई, कदमीएल, सेरेब्याह, जहूदा आउर मतन्याह। मतन्याह आपलो भाई-बंधमन संगे महापरभु चो धन-धन गावतो गीत-कुरियामन चो मुखियामन रला। 9 बकबुक्याह, उन्नो आउर हुनमन चो भाई-बंधमन महापरभु चो सेवा होतोदांय हुनमन चो पुरे उबा रउन पाली धरते* रला। 10 जेसुअ चो बेटा जोयाकीम, हुनचो बेटा एल्यासीब, हुनचो बेटा जोयादा, 11 हुनचो बेटा जोनातान आउर हुनचो बेटा जद्दू रये।
12 जोयाकीम बड़े-पुजारी चो दिनमन ने, ए पुजारीमन आपलाहान कुटुम चो मुखियामन रला। सरायाह चो कुटुम-मुखिया मरायाह; जरमियाह चो कुटुम-मुखिया हनन्याह; 13 एजरा कुटुम-मुखिया मसुल्लाम; अमरियाह कुटुम-मुखिया जहोहानान; 14 मल्लूकी चो कुटुम-मुखिया जोनातान; सबन्याह चो कुटुम-मुखिया जोसेप; 15 हारीम चो कुटुम-मुखिया अदना; मरायोत चो कुटुम-मुखिया हेलकई; 16 इद्दो चो कुटुम-मुखिया जकरियाह; गिन्नतोन चो कुटुम-मुखिया मसुल्लाम; 17 अबियाह चो कुटुम मुखिया जिकरी; मिन्यामीन आउर मोअधाह चो कुटुम-मुखिया पिलतई; 18 बिलगा चो कुटुम मुखिया सम्मूअ; समायाह चो कुटुम-मुखिया जहोनातान; 19 जोयारीब चो कुटुम-मुखिया मतनई; जदायाह चो कुटुम-मुखिया उज्जी; 20 सल्लई चो कुटुम-मुखिया कल्लई; आमोक चो कुटुम-मुखिया एबेर; 21 हिल्कियाह चो कुटुम-मुखिया हसब्याह; आउर जदायाह चो कुटुम-मुखिया नतनेल।
लेवी कुटुम-मुखियामन चो नावमन
22 बड़े पुजारीमन एल्यासीब, जोयादा, जोहानान, आउर जद्दू चो दिनमन ने लेवी बंस चो कुटुम-मुखियामन चो नावमन लिखुन संगाते रला। आउर फारस चो दारा राजा चो राजपाट बेरा बले पुजारीमन चो नावमन किताप ने लिखुन संगाते रला*। 23 एल्यासीब चो बेटा जोहानान चो दिनतले, लेवी कुटुम-मुखियामन चो नावमन आगे घटलो गोटमन चो किताप ने लिखुन रला। 24 लेवी मुखियामन एमन रला: हसब्याह, सेरेब्याह आउर कदमीएल चो बेटा जेसुअ आपलो भाई-बंधमन संगे गीत-कुरियामन चो भाग-भाग बनाला। हुनमन आपलो भाई-बंधमन चो पुरे उबा रउन महापरभु चो कमेया दाउद चो हुकुम हिसाब ले पाली धरुन-धरुन महापरभु चो मयमा आउर धन-धन करते रला। 25 मतन्याह, बकबुक्याह, ओबद्याह, मसुल्लाम, तल्मोन आउर अक्कूब, देवड़ी राखा-करुमन रला, जोनमन देवड़ी लग चो भंडार-बाकरा चो राखा करते रला।
26 जोसादाक चो नाती, जेसुअ चो बेटा जोयाकीम चो दिनमन ने आउर राजपाल नेहेम्याह आउर धरम-पंडित एजरा पुजारी चो दिनमन ने हुनमन असने ची करते रला।
जरूसलेम चो भाड़ा के सोपतोेर
27 जरूसलेम चो भाड़ा के सोपतो काजे सपाय लेवीमन के आपलाहान ठान ले जरूसलेम ने हागदिला। जेचोले हुनमन धन-धन गीत गाउन झांज, सारंगी आउर वीना बजाउन हरिक-उदीम ले भाड़ा के सोपोत। 28 तेबे गीत-कुरियामन चो गोहड़ीमन जरूसलेम चो चारोकुती चो परघनमन ले आउर नतोपतिमन चो गांवमन ले, 29 बेत-गिलगाल सहर ले, गेबा आउर अज्मावेत परघनमन ले रूंडा होला। कसनबलले गीत-कुरियामन जरूसलेम चो चारोकुती बसापत करुन आपलाहान काजे गांवमन बनाला। 30 फेर पुजारीमन आउर लेवीमन आपलाहान के सुद करला। आउर रयत के, देवड़ीमन के आउर भाड़ा के बले सुद करला।
31 फेर मय जहूदा चो मुखियामन के भाड़ा उपरे चेगुक बलले, आउर महापरभु के धन-धन बलतो काजे हुनमन के दुय भाग करले आउर हुनमन धाड़े-धार गेला। गोटोक भाग भाड़ा उपर ले उजा बाटे कचरा कुड़ा-देवड़ी बाटे गेला। 32 हुनमन चो पाट-पाट होसयाह आउर जहूदा चो आदो मुखियामन, 33 अजरियाह, एजरा, मसुल्लाम, 34 जहूदा, बिन्यामीन, समायाह आउर जरमियाह गेला। 35 हुनमन चो पाट-पाट तोड़ी फूकते-फूकते जुवान पुजारीमन गेला; हुनमन संगे जकरयाह बले रलो। जकरियाह, जोनातान चो बेटा आउर समायाह चो नाती रये। समायाह चो बुआ मतनियाह आउर दादा मिकयाह रये। मिकायाह, जक्कूर चो बेटा आउर आसाप चो नाती रये। 36 जकरियाह चो भाई-बंदमन - समायाह, अजरेल, मिलालय, गिललई, माए, नेतनेल, जहूदा, आउर हनानी रला। एमन महापरभु चो भगत दाउद बललो हिसाब ले बाजा बजाते रला आउर एमन चो पुरे-पुरे धरम-पंडित एजरा जाते रये। 37 एमन पजरा-देवड़ी बाटले दाउदपुर चो पयटीमन चेगुन दाउद चो राज-भाड़ा चो चेगानी बाटले बेर-उदिया बाट चो पानी-देवड़ी लगे अमरला।
38 गीत-कुरियामन चो दुसर भाग धन-धन बलते डेबरी बाटे गेला। मय बाचलो लोग संगे हुनमन चो पाट-पाट गेले। हुनमन भाड़ा उपर ले भाटी-गुमट चो हुन पाट चो ओसार भाड़ा लगे अमरला, 39 हुताले हुनमन एपरेम-देवड़ी, जुना-देवड़ी, मछरी-देवड़ी, हननेल गुबा आउर हम्मेआ गुबा बाटले मेंडा-देवड़ी लगे अमरला आउर राखा-करुमन चो देवड़ी लगे ठेबला। 40 तेबे दुनो भाग चो धन-धन करतो लोग महापरभु चो मंदिर ने उबा होला; मय आउर मोचो संगे रलो आदो मुखियामन बले हुताय उबा होउन रलु। 41 पुजारीमन एल्याकीम, मसेयाह, मिनयामीन, मीकायाह, एल्योएनई, जकरियाह, आउर हनन्याह तोड़ी फूकते उबा रला। 42 हुनमन संगे मासेयाह, समायाह, एलीआजर, उज्जी, जहोहानान, मल्कियाह, एलाम, आउर एजेर बले उबा रला आउर गीत-कुरियामन हुनमन चो मुखिया जिजरियाह चो हिसाब ले गावते रला। 43 हुनी दिने लोगमन खुबे जतरा चेगाला आउर हरिक-उदीम मनाला। कसनबलले महापरभु हुनमन के खुबे हरिक-उदीम करतो मोहका देउन रये। बायलेमन आउर पिलामन बले खुबे हरिक होला। लोगमन चो हरिक-उदीम होतो कोलार जरूसलेम चो खुबे लापी ले सुना देते रये।
जरूसलेम मंदिर ने सेवा-बुता
44 हुनी दिने भंडार-घर चो भंडारीमन के बाछला। भंडार-घरे, मंदिर ने चेगालो भेंट, बेड़ा-खाड़ा चो उबज, पईल फर आउर दसवांस संगाते रला। एके छांडुन लेवीमन आउर पुजारीमन के मिरतो बाटा बले रये, जेके नियम-कानुन हिसाब ले लोगमन ले रुंडाते रला। कसनबलले पुजारीमन आउर लेवीमन चो सेवा-बुता ले जहूदा खुबे हरिक रला। 45 दाउद आउर हुनचो बेटा सुलेमान चो हुकुम हिसाब ले, पुजारीमन आउर लेवीमन महापरभु चो सेवा आउर पवितर करतो सेवा-बुता पुरा करते रला। गीत-कुरियामन आउर दुआर-राखा करुमन बले आपलाहान के सोपलो बुता करते रला। 46 दाउद आउर आसाप चो दिनमन ने, महापरभु चो मंदिर ने गीत-कुरियामन चो मुखिया रते रला आउर महापरभु के जय-जय करतो आउर धन-धन करतो गीतमन गावते रला। 47 जरूबाबेल आउर नेहेमियाह चो दिनमन ने सपाय इसराएली, गीत-कुरियामन आउर देवड़ी राखा-करुमन के नियम हिसाब ले रोजे बाटा देते रला। हुनमन चेगालो भेंटमन ले लेवीमन चो बाटा के अलगाते रला; आउर लेवीमन, आपलो बाटा चो गोटोक भाग के हारून चो थरलर काजे अलगाते रला।