इसराएलिमन चो मंजी ले बिजातीमन के अलगातोर
13
हुनी दिने हुनमन, मोसा चो किताप ले लोेगमन के पढ़ुन सुनाला आउर हुता असन लिखलोर रली, कोनी अमोनी आउर मोआबी के, महापरभु चो मंडली ने केबई एउक नी दियास। 2 कसनबलले इसराएलिमन, मिसर देस् ले निकरुन जातो बेरा, हुनमन के रोटी आउर पानी देतो पलटा हुनमन के सरापतो काजे बिलाम के भूती देउन हागदेउन रला। तेबले बले आमचो महापरभु हुन सराप के बर ने पलटलो। 3 लोगमन ए नियम-कानुनमन के सुनते खन इसराएल चो मंजी ले हुन मिसड़ा होलो थरलर के अलग करला।नेहेमियाह बाटले सुदरातोर
4-5 एल्यासीब पुजारी, तोबियाह चो लोग-बाग रये। एईकाजे हुन आमचो महापरभु चो मंदिर चो भंडारी होलो बेरा, हुन, तोबियाह काजे गोटोक बड़े बाकरा तियार करुन दिलो। जोन बाकरा ने आगे, अरन-जतरा चो तीजमन, लोबान आउर नकी-भंडवामन संगाते रला; आउर लेवीमन, गीत-कुरियामन आउर दुआर राखा-करुमन काजे धान-पान, अंगुर-मंद आउर तेल चो दसवांस आउर पुजारीमन काजे देतो भेंट बले संगाते रला। 6 तोबियाह काजे ए सपाय तियार करलो बेरा मय जरूसलेम ने नी रले। कसनबलले बेबीलोन चो अरतछतर राजा चो राजपाट चो एक कोड़ी बारा बरक ने मय राजा लगे जाउन रयें। खिंडिक दिन पाछे मय छुटी मांगले। 7 जिदलदांय मय नेहेमियाह, जरूसलेम ने ईले, तेबे मय एल्यासीब करलो अडरा बुता के जानले। हुन, महापरभु चो मंदिर चो गोटोक बाकरा के तोबियाह काजे देउन दिलोसे। 8 एके जानुन मय खुबे रीस होले, आउर तोबियाह चो सपाय तीजमन के बाहरे पकाले। 9 तेबे मोचो हुकुम दिलो किरता हुन बाकरा के सुद करला आउर मय महापरभु चो मंदिर चो नकी-भंडवामन संगे अरन-जतरा आउर लोबान के हुता फेर ले संगाले।
10 फेर मोके खबर मिरली, लेवीमन चो बाटा हुनमन के नी मिरेसे। एईकाजे मंदिर सेवा करु लेवीमन आउर गीत-कुरियामन आपलो-आपलो बेड़ा-खाड़ा कमाउक गेला। 11 तेबे मय, मुखियामन के कचकाउन पूछले, “लेवीमन आउर गीत-कुरियामन महापरभु चो मंदिर के काय काजे छांडला?” आउर मय हुनमन के रूंडाउन आपलाहान बुतामन के फेर ले सोपुन दिले। 12 तेबे सपाय जहूदा चो लोगमन धान-पान, नवा अंगुर-रस, आउर तेल चो दसवांस भंडार-घर ने आनुक मुरियाला। 13 मय मंदिर भंडार-बाकरामन चो भंडारीपन के सेलेम्याह पुजारी, धरम-पंडित सादोक आउर लेवीमन ले पदायाह के सोपले। हुनमन चो साहरा काजे मतन्याह चो नाती आउर जक्कूर चो बेटा हानान के संगाले। हुनमन पतेयातो लाईक रला आउर हुनमन चो बुता के आपलो संगी लेवी-भाईमन मंजारे दसवांस के बाटतोर रली। 14 ए मोचो महापरभु, मोचो ए नंगत बुतामन के सूरता संगाव। मय आपलो महापरभु चो मंदिर आउर हुता चो सेवा-बुता काजे हरिक ले करलो नंगत बुतामन के नी भूलक।
बिसातो-दिन चो नीति-नियम
15 हुनी दिनमन ने, जहूदा ने मय खुबे लोग के दखले, हुनमन बिसातो दिने बले अंगुरमन के रस-कुंड ने पेरसोत आउर भारा बांधुन बोअसोत आउर गदाहामन उपरे बोजा लतुन नेयसोत। उसनेची हुनमन अंगुर-रस, अंगुर, अंजीर आउर रकम-रकम चो बोजा के जरूसलेम ने बिसातो दिने बिकतो काजे आनते रला, तेबे जोन दिने अरन बिकते रला, हुनी दिने मय हुनमन के चेतानी दिले। 16 फेर हुता सोर देस् चो लोग मछरी आउर बरन-बरन चो बिकतो तीजमन के आनुन बिसातो दिने जहूदा ने आउर जरूसलेम ने बिकते रला। 17 तेबे मय जहूदा चो नाव-कमालो सियानमन के कचकाउन पूछले, “काय, तुमी ए अडरा बुता करुन बिसातो दिन के असुद नी करसाहास? 18 तुमचो पुरखापाटी असनेचे करते रला गुने, आमचो महापरभु ए सपाय बिपती के आमचो उपरे आउर ए सहर ने पठालो। तेबले बले तुमी बिसातो दिन के असुद करुन महापरभु के इसराएल उपरे खुबे रीस चेगायसाहास।”
19 मय हुकुम दिले, जेबे बिसातो दिन चो आगे चो दिने जरूसलेम चो चारोकुती अंधार होउक मुरियायदे, तेबे जरूसलेम चो भाड़ा-देवड़ीमन के ढाका आउर बिसातो दिन पुरतले हुनमन के नी उगाड़ा। आउर मोचो आदो कमेयामन के भाड़ा-देवड़ीमन के राखा करतो काजे संगाले कि बिसातो दिने काई तीजमन चो बोजा के भीतरे नी आनोत। 20 एईकाजे बेपारीमन आउर बरन-बरन चो तीजमन के बिकुमन दु-एक हार जरूसलेम चो बाहरे राती ठेबुन रला। 21 तेबे मय हुनमन के कचकाउन पूछले, “तुमी सहर-भाड़ा लगे राती बेरा काय काजे ठेबलासास? तुमी फेर ले असने करलोने मय तुमके डंड देयंदे।” एईकाजे हुनमन हुदलीदांय ले फेर बिसातो दिने हुता काई बिकुक नी ईला। 22 तेबे मय लेवीमन के हुकुम दिले, आपलाहान के सुद करुन देवड़ी चो राखा करुक इआ, जेचोले बिसातो दिन पवितर रओ। ए मोचो महापरभु! एके बले मोचो भलई काजे सूरता कर आउर तुचो सत-मया किरता मोचो उपरे जीव दुख।
बिजाती बायले के बिया होतोर नी बने
23 फेर बले हुनी दिनमन ने, मय असन जहूदीमन के दखले जोनमन असदोदीन, अमोनीन आउर मोआबीन बायलेमन के बिया होउन रला। 24 हुनमन चो आदो पिलामन असदोदी भासा बलते रला आउर हुनमन जहूदी भासा बलुक नी सकते रला। मानतर दुसर-दुसर भासा गोटेयाते रला। 25 तेबे मय हुनमन के कचकाले आउर सरापले आउर कोनी-कोनी के मार खुआले आउर कोनी-कोनी चो चूंदी बले झीकले आउर हुनमन के महापरभु चो किरिया खुआले, “आमी आपलो बेटीमन के हुनमन के बिया करुन नी देउंदे आउर आमचो बेटामन काजे बले हुनमन चो बेटीमन के नी आनुंदे। 26 काय, इसराएल चो सुलेमान राजा, असन बायलेमन किरता पाप ने नी पड़ुन रये? खुबे जात-जात ने बले हुनचो असन राजा कोनी नी रला। हुनके महापरभु मया करते रये आउर सपाय इसराएल उपरे राजा बनाउन रये। मानतर हुनके बले दुसर राज चो बायलेमन पाप कराला। 27 तेबे काय, आमी तुमचो गोट धरुन असने अडरा बुता करुंदे? काय, दुसर जात बायले संगे बिया होउन आपलो महापरभु चो बिरुद ने पाप करुंदे?”
28 एल्यासीब बड़े-पुजारी चो बेटा जोयादा चो बेटामन ले गोटोक, होरोन ने रतो सनबललत चो जुआंय रये। एईकाजे मय जोयादा के मोचो लग ले खेदले। 29 ए मोचो महापरभु! सूरता करुन रा, कसनबलले एमन पुजारीपन के असुद करलासे आउर पुजारीमन आउर लेवीमन चो बायदा के टुटालासे।