10
मोहर लगालो चिटी-पतर ने लिखलो लोगमन चो नाव ए आय: हकल्याह चो बेटा राजपाल नेहेमियाह आउर सिदकियाह 2 सरायाह, अजरियाह, जरमियाह 3 पसहूर, अमरियाह, मलकियाह, 4 हतूस, सबन्याह, मललूक, 5 हारीम, मेरेमोत, ओबदयाह, 6 दानिएल, गिन्नतोन, बारूक 7 मसुल्लाम, अबियाह, मियामीन 8 माजयाह, बिलगई आउर समायाह, एमन पुजारीमन आत। 9 लेवीमन एमन आत: आजन्याह चो बेटा जेसुअ, हेनादाद चो पिलामन ले बिन्नूई आउर कदमीएल 10 हुनमन चो संगी भाईमन सबन्याह, होदियाह, कलीता, पलायाह, हानान 11 मीका, रहोब, हसब्याह 12 जक्कूर, सेरब्याह, सबनयाह 13 होदियाह, बानी आउर बनीनू। 14 फेर रयत के बाट दखाउमन, जोनमन मोहर लगाला, एमन आत: परोस, पहत-मोआब, एलाम, जत्तू, बानी 15 बुनी, अजगाद, बेबई 16 अदोनियाह, बिगवई, आदीन 17 आतेर, हिजकियाह, अज्जूर 18 होदियाह, हासूम, बेसई, 19 हारीप, अनातोत, नोबई 20 मगपीआस, मसुललाम, हेजीर 21 मसेजबेल, सादोक, जद्दू, 22 पलत्याह, हानान, अनायाह 23 होसे, हनन्याह, हस्सूब 24 हल्लोहेस, पिलहा, सोबेक, 25 रहूम, हसबना, मासेयाह, 26 अहियाह, हानान, आनान, 27 मललूक, हारीम आउर बानाह।इसराएलिमन, मंदिर चो धियान ने रतोर बायदा
28 बाचलो लोगमन ले पुजारीमन, लेवीमन, देवड़ी राखा-करुमन, गीत-कुरियामन, आट-पाहरेयामन आउर महापरभु चो नियम-कानुन किरता जात-जात चो लोगमन ले आपने के अलगालो लोगमन, आपलो बायलेमन, बेटा-बेटीमन आउर सपाय बुद आउर समज रलो लोगमन, 29 आपलो सपाय जात-भाईमन आउर नाव-कमालो सियानमन संगे मिसुन किरिया खादला, “महापरभु चो कमेया मोसा बाटले दिलो महापरभु चो कानुनमन के आमी मानुंदे आउर आपलो परभु जहोवा चो सपाय हुकुममन, नीति-नियममन आउर नियम-कानुनमन के मानतो काजे चेत ने रउंदे। आमी एके नी मानलोने आमचो उपरे सराप लागो। 30 आमी आपलो बेटीमन के ए देस् चो लोग संगे बिया नी करुंदे आउर आमचो बेटामन काजे बले एता ले लेकीमन नी आनुंदे। 31 ए देस् चो लोग बिसातो दिने अरन नोहले काई बले बिकतो काजे आनलोने आमी बिसातो दिने नोहले पवितर दिने नी घेनुंदे। सात बरक ने हारक आमचो बेड़ा के पड़ेया छांडुंदे आउर आमचो लागा खाउमन के बले खेमा करुंदे।
32 आउर आमी आपलो महापरभु चो मंदिर चो सेवा काजे रोजे बरक रूपा चो सिक्का चो तीन बाटा ले गोटोक बाटा* के देतो बायदा करुंसे। 33 जेचोले भेंट-रोटी, रोजे चेगातो अरन जतरा, रोजे चेगातो होम जतरा, बिसातो दिन, नवा-जोन तिहार, आउर कबूल धरालो समया ने मानतो सपाय तिहारमन, पवितर चेगावा, इसराएलिमन चो पाप-खंडान काजे पाप-जतरा आउर महापरभु चो मंदिर चो सपाय सेवा-बुता काजे होयदे। 34 आमी पुजारीमन, लेवीमन आउर सपाय रयतमन मंजी, चिटी पकाउन ए फासला करलु। जसन नियम-कानुन चो किताप ने लिखलोर आसे, आपलो पुरखापाटी कुटुम हिसाब ले रोजे बरक कबूल धरालो समया ने आपलो महापरभु-जहोवा चो मंदिर चो बेदी ने डसातो काजे दारु आनुंदे। 35 आमी रोजे बरक, आपलो-आपलो भुंय चो पईल उबज के आउर सपाय रूकमन चो पईल फरमन के जहोवा चो मंदिर ने आनुंदे। 36 नियम-कानुन चो किताप ने लिखलो हिसाब ले, महापरभु चो मंदिर ने सेवा करतो पुजारीमन लगे, आपलाहान पईलात बेटा आउर गाय-बयलामन ले पईलात के आउर छेरी-मेंडीमन ले पईलात के आनुंदे। 37 आमी आमचो पईल चटकलो आटा, आउर आमचो चेगातो भेंट, सपाय रूक चो पाक-फर, नवा अंगुर-रस आउर तेल महापरभु चो मंदिर चो भंडार ने पुजारीमन लगे आनुंदे। आमचो भुंय-बाड़ी चो उबज ले दसवां बाटा के लेवीमन के देउंदे। कसनबलले लेवीमन ची आमचो सपाय गांव-पारा ले दसवां बाटा रूंडाउआत। 38 लेवीमन दसवां बाटा रूंडातोदांय, हारून थरलर ले गोटोक पुजारी हुनमन संगे रयदे आउर लेवीमन रूंडालो दसवां बाटा चो दसवां भाग के आमचो महापरभु चो मंदिर चो भंडार-बाकरा ने अमरादे। 39 इसराएलिमन आउर लेवीमन, रूंडालो अरन, नवा अंगुर-रस आउर तेल के भंडार-बाकरा ने अमरादे जोन थाने पवितर ठान चो नकी-भंडवामन संगालोर आसे। हुताय सेवा करु पुजारीमन, देवड़ी राखा-करुमन, गीत-कुरियामन रयसोत। आमी अमदेया आमचो महापरभु चो मंदिर चो धियान ने रउंदे।”