आपलो आउर पुरखामन चो पापमन के मानतोर
9
सातवां मयना चो चवबीसवां दिने इसराएलिमन उपास धरुन रूंडा होला आउर आपलो पाप किरता खिसियाउन मुंडे धुरला रिकाय होउन पोता ओड़ला। 2 तेबे इसराएली थरलर, हुन देस् चो दुसर-दुसर जातमन ले आपन के अलगाला आउर उबा होउन आपलाहान पापमन आउर आपलो पुरखापाटीमन करलो ओधरम बुतामन के मानला। 3 आउर हुनमन उबा होउन गोटोक पाहार आपलो महापरभु जहोवा चो नियम-कानुन चो किताप पढ़ला आउर दुसर पाहार उपास ने रउन आपलाहान पापमन के मानला आउर आपलो महापरभु जहोवा के डंडासरन करला। 4 तेबे जेसुअ, बानी, कदमिएल, सबन्याह, बुन्नी, सेरबयाह, बानी आउर केनानी, लेवीमन चो उबतो पयटी थाने उबा होउन आपलो महापरभु-जहोवा के चिचियाउन गुहारला। 5 फेर लेवीमन ले जेसुअ, कदमीएल, बानी, हसबनयाह, सेरेब्याह, होदियाह, सबनयाह आउर पतहयाह बलला, “उबा होआ, आउर जुग-जुग रतो आपलो महापरभु-जहोवा के धन-धन बला, ‘धन-धन होओ तुचो नाव जोन सपाय ले मयमा-मान आउर बड़े आय’।”6 एजरा बललो, “तुय ची एकला जहोवा आस, तुय ची बादरी के आउर सपाय ले डेंग सरग के आउर हुता चो सपाय तारामन के, मंजपुर आउर हुता चो सपाय के, समदूर आउर हुता चो सपाय के, तुयचे बनालीस आउर हुनमन के तुयचे जीवत संगाउआस। सरग चो सपाय सेनामन तुके ची डंडासरन करुआत। 7 ए जहोवा तुय हुनी महापरभु आस। तुय अबराम के बाछुन कसदेयामन चो ऊर सहर ले निकराउन आनलीस, आउर हुनचो नाव अबराहम संगालीस। 8 तुय हुनके पतेयातो लाईक जानलीस आउर हुनके बायदा करलीस, ‘मय तुचो थरलर के कनानी, हित्ती, एमोरी, परिजी, जबूसी, आउर गिरगासीमन चो देस् देयंदे। आउर तुय, आपलो करलो बायदा के पुरा करलीस। कसनबलले तुय धरमकारी आस’।”
9 “फेर तुय मिसर देस् ने, आमचो पुरखामन चो तकलीस के दखलीस आउर लाल समदूर लगे हुनमन चो गुहार सुनलीस। 10 फिरोन आउर हुनचो कमेयामन के आउर हुनचो देस् चो सपाय के डंड देतो काजे चीनामन आउर अचरित बुतामन दखालीस। कसनबलले तुय जानते रलीस, हुनमन आमचो पुरखामन संगे अडरा बेबार करते रला। तुय आपलो नाव के माहान बनालीस जसन आजी बले आसे। 11 तुय आमचो पुरखामन चो पुरे लाल समदूर के दुय बाटा करलीस आउर हुनमन सुकलो भुंये हिंडुन लाल समदूर के नाहकला। आउर हुनमन के खेदुन नेतो बयरीमन के लाल समदूर चो गड़िया पानी ने पकना असन बुड़ालीस। 12 तुय, दिन बेरा बादरी-खमा, आउर राती बेरा आईग-खमा ने होउन हुनमन के बाट दखालीस। 13 फेर तुय सिनाई डोंगरी ने उतरलीस आउर हुनमन के सरगपुर ले गोटेयालीस। आउर हुनमन के सत सिखियामन, नीति-नियममन, नियम-कानुनमन आउर हुकुममन के दिलीस। 14 हुनमन के पवितर बिसातो दिन चो गियान दिलीस आउर हुनमन काजे आपलो कमेया मोसा बाटले हुकुममन, नीति-नियममन आउर नियम-कानुनमन के दिलीस। 15 हुनमन भूके रलो बेरा, तुय हुनमन काजे सरगपुर ले खादी घसराउन दिलीस, आउर पियास होलो बेरा, बड़े सिलपट ले पानी बोहाउन दिलीस। आउर हुनमन के जोन देस् के देतो बायदा करुन रलीस हुनचो हकदार होतो काजे हुकुम दिलीस।”
16 “मानतर आमचो पुरखामन गुमान करुन एरा होला, आउर तुचो हुकुम के नी मानला 17 हुनमन तुचो हुकुम के नी मानुन हुनमन चो मंजी तुचो करलो अचरित बुतामन के भूलकला। आउर एरा होउन आपलो काजे गोटोक मुखिया बनाउन फेर मिसर देस् ने बोहड़ुन कमेया बुता ने रतो काजे मन करला। मानतर तुय खेमा करु, दया करु, धीरजा धरु, सत-मया करु आउर जीव-दुखु महापरभु आस। एईकाजे तुय हुनमन के नी छांडलीस। 18 हुनमन आपलो काजे खुदे गोटोक बाछा चो मूरत बनाउन बलला, ‘एई आमचो महापरभु आय जोन आमके मिसर देस् ले छंडाउन आनलो’ असन बलुन हुनमन तुके खुबे निंदरला। 19 फेर बले तुचो खुबे दया किरता तुय हुनमन के टंग-टंगा भाटा ने नी छांडलीस आउर दिन बेरा हुनमन के बाट दखातो बादरी-खमा आउर राती बेरा बाट दखातो आईग-खमा के नी गुचालीस। 20 हुनमन के समजा-बुजा करतो काजे आपलो नंगत आत्मा दिलीस आउर हुनमन चो खातो काजे मन्ना घसराउक आउर पानी बले देउक नी छांडलीस। 21 तुय दुय कोड़ी बरक हुनमन के टंग-टंगा भाटा ने दखा-राखा करलीस आउर काई उना होउक नी दिलीस। हुनमन चो फटई जुना नी होली आउर पांय नी फुलली। 22 फेर तुय राजमन के आउर जात-जात चो लोगमन के हुनमन चो हक ने करलीस। आउर हुनमन के देस् चो चारो कुती बिगरालीस, तेबे हुनमन हेसबोन चो राजा सीहोन आउर बासान चो राजा ओग के हराउन हुनमन चो देस् के आपलो हक ने करला। 23 आउर तुय, हुनमन चो थरलर के बादरी चो तारामन असन खुबे बड़ालीस आउर हुन देस् ने अमरालीस जेचो बारे ने तुय हुनमन चो पुरखामन के बलुन रलीस, हुता जाउन हुनचो हकदार होआसे। 24 एईकाजे हुनमन चो थरलर हुता जाउन हुन देस् चो हकदार होला आउर तुय, कनानीमन के हुनमन चो हक ने करलीस आउर तुय, हुता चो राजामन आउर हुन देस् चो सपाय लोगमन संगे हुनमन के जसन मने ईली असने करुक दिलीस। 25 हुनमन भाड़ा बिती सहरमन आउर खुबे धान-पान होतो बेड़ा-खाड़ा के धरला। आउर सपाय नंगत ले नंगत तीजमन ले भोरलो घर के, खोड़लो चुंआ के, अंगुर आउर जयतून पदर के, आउर पाक फरतो खुबे रूकमन के आपलो हक ने करला। हुनमन खाउन-खाउन टुम-टुमा होला। आउर तुचो करलो भलई किरता सुख-भोग ने रला।”
26 “फेर बले हुनमन तुचो बिरुद होला आउर एरा होउन तुचो नियम-कानुनमन के पाट करला। आउर हुनमन के चेत करुन तुचो बाटे बोहड़ाउन आनतो काजे पठालो अगमजानीमन के मोरते मारला आउर तुके खुबे निंदरला। 27 एईकाजे तुय हुनमन के बयरीमन चो हाथे सोपलीस आउर बयरीमन, हुनमन के बिपती ने पाड़ला। जेबे-जेबे हुनमन बिपती ने पड़ला तेबे-तेबे तुके गुहारला। तुय सरग ले हुनमन चो गुहार के सुनते रलीस आउर तुय दया करुन हुनमन के छंडातो लोग पठाते रलीस, आउर हुन छंडातो लोग एउन हुनमन के बयरीमन चो हाथ ले छंडाला। 28 मानतर छंडालो पाछे बले हुनमन अडरा करते रला, एईकाजे तुय फेर हुनमन के बयरीमन चो तलेया ने करते रलीस। जेबे फेर हुनमन तुचो बाटे उलटुन गुहारते रला, तेबे तुय फेर तुचो दया किरता सरग ले हुनमन चो सुनते रलीस आउर घन-घन हुनमन के छंडाते रलीस। 29 तुचो नियम-कानुन चो हक ने रतो काजे तुय हुनमन के चेताते रलीस। तेबले बले हुनमन गुमान करुन तुचो नियम-कानुन के नी मानला। मानतर तुचो नीति-नियममन के जोन मनुक मानेदे हुन जीव रयदे, ए नियम के हुनमन नी मानला। हुनमन एरा होउन पाप करते रला। 30 तुय खुबे बरक ले हुनमन के कटलाते रलीस आउर हुनमन के चेत करातो काजे आपलो आत्मा ले अगमजानीमन के पठाते रलीस। तेबले बले हुनमन, तुचो पठालो अगमजानीमन चो गोट के नी सुनला। एईकाजे तुय हुनमन के जात-जात चो लोगमन चो हक ने करलीस। 31 फेर बले तुय तुचो दया किरता हुनमन चो बंस बुड़ुक नी दिलीस आउर हुनमन के नी छांडलीस। कसनबलले तुय जीव-दुखु आउर दया करु महापरभु आस।”
32 “एदांय ए आमचो महापरभु, मयमा-मान, सबुले सकत आउर डरतो लाईक महापरभु, तुय आपलो बायदा के नी भुलकलीस आउर सत-मया करते रलीस। ए परभु, अस्सूर देस् चो राजामन चो दिन ले धरुन, आजी ले आमचो राजामन, राजपालमन, पुजारीमन, अगमजानीमन आउर पुरखामन उपरे पड़लो बिपती के तुय नी भूलक। 33 आमचो संगे जोन बले होली, सपाय ने तुय धरमकारी आउर सत-पतेयातो लाईक रलीस। मानतर आमी उबढंगरी रलु। 34 आमचो राजामन, आमचो मुखियामन, आमचो पुजारीमन, आउर आमचो पुरखापाटीमन तुचो नियम-कानुनमन के नी मानला आउर तुचो दिलो हुकुममन के आउर चेतानीमन के धियान नी िदला। 35 तुचो दया किरता तुय हुनमन के धन-माल ले भरपुर, खुबे धान-पान होतो बड़े देस् के देउन रलीस। मानतर हुनमन तुचो सेवा नी करला आउर आपलो उबढंगरी बुता के नी छांडला। 36 दख, तुय आमचो पुरखापाटीमन के, नंगत धान-पान आउर पाक-फर खाउन हरिक ने रतो काजे दिलो देस् ने, आजी आमी कमेया बुता ने आसुं। 37 ए देस् चो सपाय धान-पान दुसर देस् चो राजामन खायसोत जोनमन के आमचो पाप चो डंड देतो काजे तुय आमचो उपरे हक दिलीसीस। हुनमन आपलो मने ईलो असन आमचो देहें आउर पसुमन उपरे हक संगायसोत। ए परभु, आमी खुबे डाहाल-बिकाल ने पड़लुसे।”
बायदा करतोर
38 ए सपाय गोटमन किरता आमी बायदा करुंसे आउर लिखुन मोहर लगाउंसे। हुन थाने आमचो मुखियामन, पुजारीमन आउर लेवीमन चो नावमन बले लिखलोर आसे।