एजरा, इसराएलिमन के नियम-कानुन सुनातोर
8
सपाय इसराएलिमन गोटोक सोर होउन पानी-देवड़ी पुरे चो जोड़ान ने रूंडला। हुनमन धरम-पंडित एजरा के बलला, मोसा चो नियम-कानुन चो किताप के आन, जेके महापरभु इसराएलिमन काजे दिलोसे। 2 तेबे एजरा पुजारी सातवां मयना चो पईल दिने हुन नियम-कानुन चो किताप के मंडली ने आनलो, जोन थाने सुनुन-समजुक सकतो बायले-मनुकमन रला। 3 तेबे हुन, नियम-कानुन चो गोट के बियान ले धरुन आड़ बेरा होओत ले पानी-देवड़ी पुरे चो जोड़ान ने रुंडलो सुनुन-समजुक सकतो बायले-मनुकमन के पढ़ुन सुनाते रये आउर हुनमन नियम-कानुन के धियान ले सुनते रओत। 4 धरम-पंडित एजरा, एई बुता काजे बनालो माचा ने उबुन रये। हुनचो उजा बाटे मत्तियाह, सेमा, अनायाह, उरियाह, हिलकियाह, मसायाह, आउर डेबरी बाटे, पदायाह, मिसाएल, मलकियाह, हासूम, हसबदाना, जकरियाह आउर मसुललाम बले उबा रला। 5 एजरा सपाय ले डेंग ने उबुन रये, एईकाजे हुन सपाय के दखा देते रये। एजरा नियम-कानुन चो किताप के उगाड़तोके दखुन सपाय लोग उबा होला। 6 तेबे एजरा, माहान महापरभु, जहोवा के धन-धन करलो, आउर सपाय आपलो हाथ उपरे उठाउन, “आमीन, आमीन” बलला, आउर भुंये पाटा पड़ुन जहोवा के डंडासरन करला। 7 लेवीमन ले जेसुअ, बानी, सेरब्याह, जामीन, अक्कूब, सबतेय, होदियाह, मासेयाह, कलीता, अजरियाह, जोजाबाद, हानान आउर पलायाह बले, लोगमन के नियम-कानुन समजाते गेला। लोगमन आपलाहान ठानमन ने उबुन रओत। 8 हुनमन महापरभु चो नियम-कानुन चो किताप के पढ़ुन हुनचो अरथ समजाला, आउर लोगमन हुनके नंगत ले समजला।9 राजपाल नेहेमियाह, एजरा पुजारी जोन नियम-कानुन के नंगत ले जानु बीता रये आउर लोगमन के समजाते रलो लेवीमन, सपाय लोग के बलला, “आजी चो दिन तुमचो महापरभु-जहोवा काजे पवितर आय। एईकाजे मुरमुरा नी होआ आउर गागा-रोंआ नी होआ।” कसनबलले लोगमन नियम-कानुन चो गोट के सुनुन गागा-रोंआ होते रला। 10 फेर नेहेमियाह, हुनमन के बललो, “जाहा, नंगत ले नंगत भोज आउर सुवाद बिती अंगुर-रस खाहा, आउर जेचो लगे नीआय हुनमन के बले दियास। कसनबलले आजी चो दिन आमचो महापरभु काजे पवितर आय। तुमी मुरमुरा नी होआ, कसनबलले जहोवा चो हरिक ले तुमी चमकट होआसे।” 11 असन बलुन लेवीमन सपाय के ओगाय कराला, “ओगाय राहा, तुमी मुरमुरा नी राहा। कसनबलले आजी चो दिन पवितर आय।” 12 तेबे सपाय लोग खातो-पीवतो काजे आपलाहान बाटे गेला। खादी नी रलो लोगमन लगे बले खादी-पीदी अमराउन हरिक-उदीम बनाला। कसनबलले हुनमन चो सिखालो गोट के, एमन पक्का समजला।
लाड़ी तिहार
13 दुसर दिने सपाय इसराएली बंस चो मुखियामन, पुजारीमन आउर लेवीमन नियम-कानुन चो गोट के सीखतो काजे एजरा धरम-पंडित लगे रूंडला। 14 पढ़ते-पढ़ते हुनमन के नियम-कानुन चो किताप ने असन लिखलोर मिरली, जहोवा इसराएलिमन के सातवां मयना चो तिहार बेरा लाड़ीमन ने रतो हुकुम मोसा बाटले देउन रये। 15 आपलो सपाय सहरमन ने आउर जरूसलेम ने डारा बुलाहा, “डोंगरी ने जाउन जयतून, रान-जयतून, मेहंदी आउर दुसर रूक-राईमन चो डारा-खंदामन आउर सींद-पलंगामन आनुन लाड़ी बनाओत।” 16 तेबे मंडली चो सपाय लोग जाउन डारा-खंदामन आनला आउर आपलो घर उपरे आउर आपलाहान दुआरमन ने आउर महापरभु चो मंदिर दुआरे आउर पानी-देवड़ी लगे चो जोड़ान ने आउर एपरेम-देवड़ी पुरे चो जोड़ान ने लाड़ीमन बनाला। 17 सपाय लोग जोनमन कयद ले छंडाय होउन एउन रला हुनमन लाड़ी बनाउन हुता रला। नून चो बेटा जहोसू चो बेरा ले धरुन एबतले केबई इसराएलिमन असन नी करुन रला। हुदलीदांय खुबे हरिक-उदीम होली। 18 फेर तिहार चो पईल दिन ले धरुन सरासरी दिनतले एजरा रोजे महापरभु चो नियम-कानुन चो किताप के पढ़ुन-पढ़ुन सुनाते रलो। असन बरन ले हुनमन सात दिनतले तिहार बनाला आउर आठवां दिने नियम हिसाब ले बड़े मंडली बसाला।