बयरीमन नेहेमियाह चो बिरुद सोर-सुतर होतोर
6
जिदलदांय सनबलत, तोबियाह, अरबी गेसेम आउर आमचो दुसर बयरीमन ए खबर सुनला कि मय सहर भाड़ा के जतनाउन सारले आउर गोटोक बले डांगरा नी बाचलीसे (हुदलदांय आमी देवड़ी ने कपाट नी लगाउन रउं) 2 तेबे सनबलत आउर गेसेम मोचो लगे ए खबर पठाला, “आव, आमी ओनो भाटा ने कोनी बले गांव ने भेट-घाट होवां।” मानतर हुनमन मोचो नोकसान करुक मन करते रला। 3 एईकाजे मय दूतमन के हुनमन लगे असन बलुन पठाले, “मय तो बड़े भारी बुता करेंसे, मोके बुता ले नी फाबे। मय तुमचो लगे एउन काय काजे मोचो बुता के गमाउआंय?” 4 हुनमन चार हार असनेचे खबर पठाला आउर मय बले हुनमन के उसनेची बलुन पठाले। 5 तेबे सनबलत पांचवां हार ने आपलो कमेया चो हाथे उगाड़ा चिटी देउन मोचो लगे पठालो। 6 हुता असन लिखलोर रये, “जात-जात ने ए खबर उड़लीसे आउर गेसेम बले असने बलेसे, तुय आउर जहूदीमन बिरुद करतो काजे उआट बनायसास; एईकाजे भाड़ा के बनायसाहास। आउर मोके असन खबर बले मिरलीसे कि तुय हुनमन चो राजा बनुक मन करसीस। 7 तुय, जहूदा ने गोटोक राजा आसे बलुन सांगतो काजे अगमजानीमन के जरूसलेम ने बाछलीसीस। ए खबर राजा के बले सांगुआंव। एईकाजे आव, आमी गोटोक सोर होवां।” 8 तेबे मय हुनचो लगे असन खबर पठाले, “जसन तुय बलसीस उसन काई ची नोआय। तुय ए गोट तुचेई मने घड़ुन बलसीस।” 9 आउर मय असन गुहारले, ए महापरभु, तुय आमके चमकट कर। कसनबलले हुनमन सपाय आमके असन बलुन डरातो मन करसोत, “एमन डरुन ओगाय होओत आउर भाड़ा जतनातो बुता ठेबो।”10 फेर मय गोटोक दिने, दलायाह चो बेटा, महेतबेल चो नाती समायाह चो घरे गेले। हुन आपलो घरे ढाकी होउन रये आउर हुन बललो, “आव, आमी महापरभु चो मंदिर भीतरे भेट होवां आउर मंदिर कपाट के ढाकवां। कसनबलले हुनमन तुके मोरते मारतो काजे एयसोत। आजी राती ची हुनमन तुके मारुक एदे।” 11 मानतर मय बलले, “काय, मोचो असन माने के, आपलो जीव बचातो काजे डरुन परातोर नंगत आय? काय, मय मंदिर भीतरे ओलुन आपलो जीव बचायंदे? नाई! मय मंदिर भीतरे नी जायें!” 12 तेबे मय जानले, तोबियाह आउर सनबलत, समायाह के असन बलतो काजे भूती देउन हागदिला। एईकाजे हुन, महापरभु चो गोट आय बलुन मोचो नोकसान करुक मन करते रये। मानतर महापरभु हुनके नी पठाउ रये। 13 हुनमन समायाह के, मोके असन गोट सांगुक तियार करला कि मोके डराउन पाप ने पाड़ो। एचोले मोचो बयरीमन के, मोके बदी देतो आउर इजित धरतो मोहका मिरती। 14 ए मोचो महापरभु, मोके फंद गोटमन सांगुन डरातो काजे तोबियाह आउर सनबलत, नोअधयाह अगमजानिन आउर दुसर अगमजानीमन चो गोट के नी भूलक।
भाड़ा जतनाउन सारतोर
15 एलूल मयना चो एक कोड़ी पांचवां दिने बललोने, दुय कोड़ी बारवां दिने भाड़ा के जतनाउन सरली। 16 एके सुनुन आमचो सपाय बयरीमन, सपाय जात-जात चो लोगमन खुबे डरला आउर लाज पड़ला। कसनबलले हुनमन जानला, ए बुता आमचो महापरभु चो साहरा ले होली। 17 हुन दिनमन ने जहूदा चो नाव-कमालो सियानमन, तोबियाह के खुबे चिटी लिखला आउर हुनचो बाटले बले हुनमन के चिटी मिरली। 18 असन एईकाजे होली, जहूदा चो खुबे लोगमन तोबियाह बाटे होवां बलुन किरिया खाउन रला। कसनबलले हुन आरह चो बेटा सकन्याह चो जुआंय रलो। तोबियाह चो बेटा जहोहानान बले बेरेक्याह चो बेटा मसुललाम चो बेटी के बिया होउन रये, 19 हुनमन मोचो सुनतले, हुनचो नंगत बुतामन के गोटेयाते रला आउर मोचो गोट के बले हुनके सांगते रला। तोबियाह मोके डरातो काजे चिटीमन पठाते रये।