अहीतोपेल चो सला
17
अहीतोपेल फेर अबसालोम के बललो, “मय बारा हजार मनुकमन के बाछुन आजी ची राती आमी दाउद चो पाट-पाट जाउंदे। 2 जिदलदांय हुन थाकुन डाहाल-बिकाल होयदे, तेबे हुन खुबे डरेदे आउर हुनचो संग चो सपाय लोग परादे। मय राजा के ची मारेंदे। 3 जसन दुली आपलो दुला घरे एउआय उसने मय सपाय लोगमन के तुचो लगे बोहड़ाउन आनेंदे। तुय गोटकी मनुक चो जीव चो घत ने आसीस, सपाय रयतमन तो अस्तिर ने रदे।” 4 ए गोट अबसालोम आउर सपाय इसराएली धरम-सियानमन के नंगत लागली।हूसे चो सला
5 फेर अबसालोम बललो, “एरेकी हूसे के बले हागदेउन आन, आउर हुन काय सांगेदे, आमी हुनके बले सुनुं।” 6 जेबे हूसे, अबसालोम लगे गेलो, तेबे अबसालोम हुनके बललो, “अहीतोपेल असन गोट बललोसे, आमी हुनचो गोट मानुआंव कि नाई, तुय सांग।” 7 हूसे, अबसालोम के बललो, “अहीतोपेल ए हार सांगलो सला नंगत नोआय।” 8 फेर हूसे बललो, “तुय तो जानीस, तुचो बुआ आउर हुनचो लोगमन बीरमन आत। जसन कोनी भालु, पिला के झीकलोदांय रीस होउआय, हुनमन बले उसने चे आत। तुचो बुआ, खुबे जुद करलोसे, हुन आपलो पलटन संगे राती बेरा नी ठेबुआय। 9 ए समया ने बले हुन कोनी खोदरा नोहले दुसर ठाने लुकलोसे होती। आमचो पलटनमन ले कोनी-कोनी जुद ने मोरला जाले, सपाय सुनलो लोग असन बलुक मुरियादे, ‘अबसालोम चो पुइतनाय पलटनमन के मोरते मारला’। 10 तेबे बीजापुलिया-बाग असन ढाढ़ुस करु बीरमन के बले डर काजे भाम चेपायदे। सपाय इसराएलिमन जानोत, तुचो बुआ बलबीता आय आउर हुनचो संगे रतो बितामन नी डरतो बीरमन आत। 11 एई किरता मोचो सला असन आय, दान ले धरुन बेरसेबा लग ले रतो सपाय इसराएलिमन तुचो लगे समदूर रेटे चो बारु असन कुड़ा रओत, आउर तुय खुदे हुनमन संगे जुद करुक जा। 12 आउर कोनी थाने बले दाउद आमके मिरले, जसन ओस भुंये घसरुआय उसनेची आमी बले हुनचो उपरे जाउन पड़ुंदे, तेबे हुन नी बाचेदे आउर हुनचो संग चो कोनी बले नी बाचदे। 13 हुन कोनी भाड़ा बिती सहर ने लुकलोसे जाले, सपाय इसराएलिमन हुनी भाड़ा के बरंईमन बांदुन हुनके झीकुन कड़की/घाटी/दरांहा ने घसराउंदे। आउर हुता चो गोटोक पकना बले नी बाचेदे।” 14 तेबे अबसालोम आउर सपाय इसराएली मनुकमन बलला, “एरेकी हूसे चो सला अहीतोपेल चो सला ले नंगत आसे।” जहोवा, अबसालोम उपरे बिपती पाड़तो काजे अहीतोपेल चो नंगत सला के नसालो।
दाउद के खबर मिरतोके बाचुन निकरतोर
15 तेबे हूसे, सादोक आउर एबयातर पुजारीमन के बललो, “अहीतोपेल तो अबसालोम आउर इसराएल चो सियानमन के असन-असन सला दिलोसे, आउर मय असन-असन सला दिलेसे। 16 एईकाजे एदांय तूरते दाउद लगे खबर पठाव, ‘आजी राती टंग-टंगा भाटा चो नंदी-घाट लगे नी ठेब, हुन पाट नाहकुन ची रा, नोहले राजा आउर जितलो लोग हुनचो संगे आसोत, सपाय सत्यानास होदे’।” 17 जोनातान आउर अहीमास, एन-रोगेल लगे टाकते रला आउर गोटोक कमेयीन जाउन हुनमन के खबर देते रये आउर हुनमन जाउन दाउद राजा के खबर देते रला। कसनबलले हुनमन के सहरे जातो बेरा कोनी दखतो डर रये। 18 मानतर गोटोक लेका हुनमन के दखुन अबसालोम के सांगलो, हुनमन दुनो तूरते पराला आउर बहूरीम ने रतो मनुक घरे गेला। हुनचो घर दुआरे गोटोक चुंआ रये, हुनमन हुताय उतरला। 19 तेबे हुनचो बायले चुंआ के गोटोक कामरा ले ढाकली आउर हुनचो उपरे अरन के बिखरुन दिली, जेचोले कोकेई हुनमन चो बारे ने जान नी पड़ली। 20 जेबे अबसालोम चो कमेयामन हुन घर चो बायले लगे जाउन पूछला, “अहीमास आउर जोनातान कहां आसोत?” तेबे बायले बलली, “हुनमन तो नंदी चो हुन पाट गेला।” तेबे अबसालोम चो कमेयामन हुनमन के डगराउन मिराउक नी सकला। तेबे हुनमन जरूसलेम ने बोहड़ला।
21 हुनमन गेलो पाछे एमन चुंआ ले निकरला आउर दाउद राजा लगे जाउन हुनके खबर दिला। हुनमन दाउद के बलला, “तुमी तूरते नंदी चो हुन पाट जाहा। कसनबलले अहीतोपेल तुमचो नोकसान काजे असन-असन उआट करलोसे।” 22 तेबे दाउद आपलो सपाय मनुकमन संगे जरदन नंदी नाहकलो। बियान पाउ-पाउ गोटोक बले मनुक हुता नी रला, सपाय जरदन नंदी के नाहकला।
23 जेबे अहीतोपेल दखलो, हुनमन हुनचो सला के नी मानला तेबे हुन आपलो गदाहा ने चेगलो आउर आपलो सहर ने जाउन आपलो घरे गेलो। हुन आपलो घर-कुटुम के जोन-जोन हुकुम देतोर रये दिलो आउर आपने उचकी होउन मोरलो। हुनके हुनचो बुआ चो मोठ लगे माटी दिला।
24 तेबे दाउद, महनेम सहर ने अमरलो, आउर अबसालोम सपाय इसराएली मनुकमन संगे जरदन नंदी के नाहकला। 25 अबसालोम, अमासा के जोआब चो पलटा आपलो सेना-मुखिया बनालो, अमासा गोटोक इसमाएली मनुक जितरा चो बेटा रये। अमासा चो आया अबीगल, जोआब चो आया सरूयाह चो बईन आउर नाहस चो बेटी रये। 26 फेर इसराएलिमन आउर अबसालोम, गिलाद देस् ने डेरा पड़ला।
27 जिदलदांय दाउद, महनेम सहर ने ईलो, तेबे अम्मोनीमन चो रब्बा सहर ने रतो नाहास चो बेटा सोबी, लो-दबार सहर ने रतो अम्मीएल चो बेटा माकीर आउर रोगलीम सहर चो गिलाद ने रतो बरजिलय बले ईला। 28-29 हुनमन बलला, “पलटनमन, टंग-टंगा भाटा ने बुलुन-बुलुन खुबे थाकलासे आउर भूके-पीयासे आसोत।” एईकाजे दाउद आउर हुनचो संग चो लोगमन काजे खटेयामन, थारी-बटकामन, हांडी-कुंडरीमन आउर हुनमन के खुआतो काजे, गउं, जोंदरी, मयदा, सेमी बीचामन, मुसरी दार, भूंजलो अरन, ओंडार-तेल, दही, छेरी-मेंडीमन आउर गाय-गोरस ले बनालो पनीर आनला।