सीबा, दाउद के भेटतोर
16
दाउद टीप ले खिंडिक दूर जाउन ची रये, तेबे मपीबोसेत चो कमेया सीबा दुय सव रोटी, सुकलो अंगुर चो एक सव टिकिया, जेट बेरा चो पाकमन चो एक सव टिकिया आउर गोटोक चामड़ा चो बनालो तूमा भोरते अंगुर-रस के गोटोक जोड़ी तियार करलो गदाहा ने लतुन हुनके भेटलो। 2 राजा, सीबा के पुछलो, “एमन ले तुचो काय बिचार आसे?” सीबा बललो, “गदाहामन तो राजा चो कुटुम लोग चो चेगतो काजे आय। रोटी आउर जेट बेरा चो पाक, जुवानमन चो खातो काजे आय। आउर कोनी बले टंग-टंगा भाटा ने थाकलोने हुन अंगुर-रस पीयेदे।” 3 राजा पुछलो, “फेर तुचो परभु चो बेटा कहां आसे?” सीबा, राजा के बललो, “हुन तो जरूसलेम ने ठेबलो। हुन असन बललो, आजी इसराएल चो कुटुम, मोचो दादा साउल चो राज मोके बोहड़ाउन देयदे।” 4 राजा, सीबा के बललो, “जोन बले मपीबोसेत चो रये हुन सपाय एदांय तुचो आय।” सीबा बललो, “ए मोचो परभु, ए राजा, मोचो उपरे तुचो दया रओ।”सिमी, दाउद के सरापतोर
5 जेबे दाउद राजा, बहूरीम लगे अमरलो तेबे साउल चो कुटुम ले गोटोक मनुक हुताले निकरलो। हुन गेरा चो बेटा सिमी रये, आउर हुन सरापते ईलो। 6 हुन, दाउद राजा आउर हुनचो सपाय कमेयामन उपरे पकना पकाउक मुरियालो। एदांय सपाय लोगमन आउर सपाय बीरमन दाउद चो उजा आउर डेबरी बाटे रला। 7 सिमी असन बलते सरापते गेलो, “लापी हो, ए माने-मारा लापी हो, ए दुसट बीता, एताले निकरुन जा, निकरुन जा। 8 जहोवा तुचोले साउल चो कुटुम चो लोउ चो पलटा धरलोसे, जेचो पलटा तुय राजा बनलिसीस। एदांय जहोवा राज के तुचो बेटा अबसालोम चो हक ने करलोसे। तुय माने-मारा होलो किरता आपने सत्यानास होयसीस।”
9 तेबे सरूयाह चो बेटा अबीसे, राजा के बललो, “मोचो परभु राजा के, ए मोरलो कुकुर सरापेसे? मोके जाउन हुनचो मुंड के काटुक देस।” 10 राजा बललो, “सरूयाह चो बेटामन मोके तुमचोले काय बुता? जहोवा हुनके ‘दाउद के सराप’ बललो किरता हुन सरापेसे जाले, हुन सरापुक देस। कोन हुनके पूछुक सके, तुय असन काय काजे करुआस?” 11 फेर दाउद, अबीसे आउर आपलो सपाय कमेयामन के बललो, “मोचो निंज बेटा मोके मारतो काजे होयसे तो बिनयामीनी कसन असन नी करे? हुनके रउक दियास आउर सरापुक दियास, कसनबलले जहोवा हुनके बललोसे। 12 मोचो उपरे पड़तो ए बिपती के दखुन आजी चो ए सराप चो पलटा जहोवा मोचो भलई करेदे।” 13 दाउद आपलो रयतमन संगे आपलो बाटे जाते रये हुदलीदांय सिमी हुनचो पुरे चो डोंगरी रेटे ले हुनके सरापते आउर हुनचो उपरे पकना-धुरला पकाते गेलो। 14 राजा आउर हुनचो संग चो सपाय लोगमन थाकुन जरदन नंदी खंडे अमरला आउर हुताय बिसाला।
जरूसलेम ने अबसालोम, अहीतोपेल चो सला धरतोर
15 अबसालोम सपाय इसराएलिमन संगे जरूसलेम ने ईलो आउर हुनचो संगे अहीतोपेल बले ईलो। 16 तेबे दाउद चो संगवारी एरेकी हूसे, अबसालोम लगे अमरलो। हूसे, अबसालोम के बललो, “राजा जुग-जुग जीओ, राजा जुग-जुग जीओ!” 17 अबसालोम, हूसे के बललो, “काय, ए तुचो सत-मया आय, जोन तुय आपलो संगवारी ले करुआस? तुय आपलो संगवारी संगे काय काजे नी गेलीस?” 18 हूसे, अबसालोम के बललो, “असन नोआय, जेके जहोवा आउर हुनचो रयत इसराएलिमन बाचदे, मय हुनचेई आय, आउर मय हुनचेई संगे रयंदे। 19 फेर मय कोचो सेवा करुआय? काय, हुनचो बेटा चो सेवा नी करें, जसन मय बुआ चो सेवा करते रयें? एईकाजे मय तुचो सेवा करेंदे।”
20 तेबे अबसालोम, अहीतोपेल के पूछलो, “तुमी आपलो सला दिया, आमके काय करतोर आय?” 21 अहीतोपेल, अबसालोम के बललो, “तुचो बुआ माहाल चो दखा-राखा करतो काजे आपलो राकलो बायलेमन के छांडुन गेलोसे, तुय हुनमन संगे सो। आउर सपाय इसराएलिमन सुनदे अबसालोम आपलो बुआ चो बिरुद होलोसे। तेबे तुचो सपाय संगवारीमन तुचो संगे बरसक रदे।” 22 फेर अबसालोम काजे माहाल चो छत उपरे हुनमन तमु गाड़ला आउर अबसालोम सपाय इसराएलिमन चो दखतले आपलो बुआ चो राकलो बायलेमन लगे गेलो। 23 हुन दिनमन ने, जोन बले सला अहीतोपेल देते रये, हुन महापरभु के पूछुन दिलो सला असन लागते रये। अहीतोपेल जोन-जोन सला सांगते रये, हुन सपाय के दाउद आउर अबसालोम असनेचे मानते रला।