अमनोन चो घिन-घिना बुता
13
दाउद चो बेटा अबसालोम के तामार नाव चो गोटोक सुंदरी बईन रली। अबसालोम चो माउसी माय चो बेटा अमनोन के तामार ले खुबे मया होली। 2 अमनोन आपलो बईन तामार काजे कलपुन भाति बेमार पड़लो। कसनबलले हुनचो बिया नी होउन रये आउर अमनोन, कुंआरी संगे काई करुक नी सकते रये। 3 जोनादाब, अमनोन चो संगवारी रये, जोन दाउद चो भाई सिमा चो बेटा रये। हुन खुबे चलाक रये। 4 हुन अमनोन के बललो, “ए राजा चो बेटा, तुय काय फिकिर करुन रोजे दिना इतलो सुकते जायसीस? काय तुय मोके नी सांगीस?” अमनोन हुनके बललो, “मय तो मोचो भाई अबसालोम चो बईन तामार के खुबे मया करेंसे।” 5 जोनादाब हुनके बललो, “आपलो खटेया ने सोउन बेमार पड़लो असन हो आउर जिदलदांय तुचो बुआ तुके दखुक एयदे, तेबे हुनके बल, ‘मोचो बईन तामार एउन मोचो पुरे मोचो काजे रोटी बनाउन मोके खुआओ, मय हुनचो बनातोके दखुन हुनचो हाथ ले खायंदे’।” 6 अमनोन बेमार पड़लो असन सोवलो आउर जिदलदांय राजा हुनके दखुक ईलो, तेबे अमनोन, राजा के बललो, “मोचो बईन तामार एउन मोचो दखतले रोटी बनाओ आउर मय हुनचो हाथ ले खायंदे।”7 तेबे दाउद आपलो घरे तामार लगे असन बलुन खबर पठालो, “आपलो भाई अमनोन चो घरे जाउन हुनचो काजे रोटी बनाव।” 8 तेबे तामार आपलो भाई अमनोन चो घरे गेली। अमनोन हुताय खटेया ने लोंडुन रये। तेबे हुन गउं पिसान के चटकली आउर हुनचो पुरे रोटी बनाली। 9 फेर हुन थारी ने हुनचो काजे रोटी निसकाली, मानतर हुन नी खाये। तेबे अमनोन बललो, “मोचो लग ले सपाय लोगमन के निकराहा।” तेबे सपाय लोगमन हुनचो लगले निकरला। 10 फेर अमनोन, तामार के बललो, “रोटी के बाकरा भीतरे मोचो लगे आन, तेबे मय तुचो हाथ ले खायंदे।” तेबे तामार आपलो बनालो रोटीमन के धरुन बाकरा भीतरे आपलो भाई अमनोन लगे गेली। 11 जिदलदांय हुन रोटी हुनचो लगे नीली तेबे हुन हुनके धरुन बललो, “ए मोचो बईन आव, मोचो संगे सो।” 12 हुन बलली, “ए मोचो भाई असन अडरा बुता नी कर। इसराएल ने असन घिन-घिना बुता कोनी नी करलासे, तुय मूरक बुता नी कर। 13 फेर मय असन हिनस्ता होउन कहां जायंदे? आउर इसराएलिमन ने तुके मूरकमन संगे गनदे। एदांय तुय राजा ले गोटेयाव, हुन मोके तुचो संगे बिया करतो काजे नाई नी बलेदे।” 14 मानतर अमनोन, हुनचो गोट नी मानलो। हुन, तामार ले आगर बरसक रलो किरता हुनचो संगे घिन-घिना बुता करलो।
15 एचो पाछे अमनोन, तामार के खुबे बईर करुक मुरियालो। आगे जितरो मया करते रये, हुनचोले बले आगर बईर करलो। हुन तामार के बललो, “उठुन एताले जा।” 16 हुन बलली, “असन नाई मोचो भाई, तुय मोचो संगे करलो घिन-घिना बुता ले बले आगर अडरा तुचो मोके निकराउन देतोर होयदे।” मानतर हुन, हुनचो गोट के नी मानलो। 17 फेर हुन आपलो कमेया के हागदेउन बललो, “ए बायले के मोचो पुरे ले दुआरे निकराउन देस, आउर कपाट ने सिकरा लगाउन देस।” 18 तेबे अमनोन चो कमेया, तामार के बाहरे निकरालो आउर कपाट ने सिकरा दिलो। (तामार अस्तीन बिती लाम कुड़ता पींदुन रये। हुन समया ने, राजा चो कुंआरी बेटीमन असनी फटई पींदते रओत।) 19 फेर तामार आपलो मुंडे लाकड़ी रिकाली आउर आपलो पींदलो लाम कुड़ता के चीरली आउर आपलो मुंडे हाथ संगाउन किरकिरुन गागते गेली।
20 हुनचो भाई अबसालोम हुनके पुछलो, “काय तुचो भाई अमनोन तुचो संगे रलो? ए मोचो बईन एदांय ओगाय रा। हुन तुचो भाई आय, ए गोट के तुचो मन ने धरुन नी रा।” एईकाजे तामार, छांडरी बायले असन आपलो भाई अबसालोम घरे रली। 21 जिदलदांय ए गोटमन के दाउद राजा सुनलो तेबे हुन जंजाल रीस होलो। 22 मानतर अबसालोम, अमनोन के अडरा नोहले नंगत काईची गोट नी बललो। मानतर अमनोन आपलो बईन तामार संगे करलो अडरा बुता किरता अबसालोम अमनोन के घिनियाते रये।
अबसालोम, अमनोन ले पलटा धरतोर
23 दुय बरक पाछे अबसालोम, एपरेम लगे बाल-हासोर ने आपलो मेंडीमन चो रोंआ के कतरालो आउर हुन सपाय राजकुमारमन के नेवता दिलो। 24 अबसालोम, राजा लगे जाउन बललो, “मय असन गुहार करेंसे, तुचो कमेया मेंडामन चो रोंआ के कतरायसे। एईकाजे राजा आउर हुनचो सपाय कमेयामन आपलो कमेया संगे जाओत।” 25 राजा, अबसालोम के बललो, “ए मोचो बेटा, आमी सपाय नी एउं नोहले तुके खुबे डंड होयदे।” तेबे अबसालोम हुनके खुबे गुहारलो मानतर हुन जातो काजे नाई बललो, तेबले बले हुनके बर दिलो। 26 तेबे अबसालोम बललो, “तुय नी एईस जाले, मोचो भाई अमनोन के आमचो संगे पठाव।” राजा हुनके पुछलो, “हुन तुचो संगे काय काजे जायदे?” 27 मानतर अबसालोम हुनके घन-घन बललो किरता हुन अमनोन आउर राजा चो सपाय बेटामन के हुनचो संगे जाउक दिलो। 28 फेर अबसालोम आपलो कमेयामन के हुकुम दिलो, “चेत ने राहा आउर जिदलदांय अमनोन अंगुर-मंद पीउन मातेदे, तेबे मय तुमके बलेंदे, ‘अमनोन के मारा’, तेबे नी डरा आउर हुनके मोरते मारा। काय, ए हुकुम देउ बीता मय नोआंय?” 29 तेबे अबसालोम चो कमेयामन हुनचो हुकुम हिसाब ले अमनोन संगे करला। सपाय राजा चो बेटामन उठला आउर आपलो-आपलो गदहामन ने चेगुन पराला।
30 हुनमन बाटे ची रला, आउर दाउद के ए खबर मिरली कि अबसालोम, राजा चो सपाय बेटामन के मोरते मारलो आउर हुनमन ले कोनी बले नी बाचला। 31 तेबे दाउद राजा उठलो आउर आपलो फटई के चीरुन भुंये लोंडलो आउर हुनचो सपाय कमेयामन बले आपलो-आपलो फटई के चीरुन हुनचो लगे उबा रला। 32 तेबे दाउद चो भाई सिमा चो बेटा जोनादाब बललो, “मोचो परभु, असन नी समजो कि हुनमन राजा चो सपाय बेटामन के मारला, सोजे अमनोन के ची मोरते मारला। अमनोन, अबसालोम चो बईन तामार संगे घिन-घिना बुता करलो दिन ले अबसालोम, अमनोन के मोरते मारतो मन बनाउ रये। 33 एईकाजे एदांय मोचो परभु राजा, राजा चो सपाय बेटामन मोरला बलुन मुरमुरा नी होओ, एकलाय अमनोन के ची मारलासे।”
34 फेर अबसालोम परालो। हुदलदांय राखाकरु बीता, खुबे लोगमन के बड़े डोंगरी रेटे चो हीरोनईम बाट ने हिंडते एतोके दखलो। आउर हुन जाउन राजा के बललो। 35 तेबे जोनादाब, राजा के बललो, “दख, राजा चो बेटामन ईलासोत, जसन तुचो कमेया बलु रये, उसनेची होली।” 36 हुन सांगुन सरते खन राजा चो बेटामन ईला, आउर किरकिरुन-किरकिरुन गागुक मुरियाला। राजा बले आपलो सपाय कमेयामन संगे सुयकुन-सुयकुन गागुक मुरियालो।