जहोसू चो सिखिया
23
जहोवा, इसराएलिमन के हुनमन चो भोंवरक रतो बयरीमन ले अस्तिर करलो। एचो खुबे दिन पाछे, जेबे जहोसू डोकरा होउन खुबे बरक चो होउन रये। 2 तेबे जहोसू, सपाय इसराएलिमन के आउर हुनमन चो धरम-सियानमन, भंडारीमन, नियावकरुमन आउर मुखियामन के हागदेउन बलुक मुरियालो, “मय तो एबे डोकरा होउन खुबे बरक चो होलेसे; 3 आउर तुमी दखलासाहास, तुमचो महापरभु जहोवा तुमचो काजे ए सपाय जात-जात चो लोगमन संगे काय-काय करलोसे, कसनबलले तुमचो महापरभु, जहोवा तुमचो काजे लड़लोसे। 4 मय जरदन नंदी ले धरुन बेर-बुड़ती बाट चो महासमदूर लग चो जात-जात चो लोगमन के हराले, हुनमन चो भुंय के आउर बाचलो भुंय के बले मय चिटी पकाउन-पकाउन तुमचो बंसमन चो निज बाटा होतो काजे दिले, 5 आउर तुमचो महापरभु जहोवा, तुमचो पुरे ले हुनमन के खेदुन निकरायदे; आउर तुमचो महापरभु चो बायदा हिसाब ले तुमी, हुनमन चो भुंय चो हकदार होआसे।6 एईकाजे तुमी चमकट राहा! जोन बले मोसा चो नियम-कानुन चो किताप ने लिखलोर आसे, हुनचोले ए बाटे-हुन बाटे नी होआ आउर हुनमन के पुरा करतोने मन लगाहा। 7 तुमचो मंजारे रतो जात-जात चो लोगमन संगे नी मिसा, हुनमन चो देव-धामीमन चो नाव नी धरा, हुनमन चो किरिया नी खाहा, हुनमन चो सेवा-सासन नोहले हुनमन के डंडासरन नी करा, 8 मानतर जसन एबतले आपलो जहोवा महापरभु ने चमकट रयसास असने ची राहा।
9 जहोवा खुबे बड़े आउर सकत बिती जात-जात चो लोगमन के तुमचो पुरे ले खेदलोसे, आउर एबतले कोनी तुमचो पुरे उबा रउक नी सकसोत। 10 तुमचो जहोवा महापरभु आपलो बायदा हिसाब ले तुमचो बाटले लड़ेसे, एईकाजे तुमीमन ले गोटोक झन, हजारझन के खेदेदे। 11 एईकाजे आपलो जहोवा महापरभु के संपुरन मन ले मया करा।
12 तुमी कसनी बरन ले बले जहोवा के छांडुन, तुमचो मंजी बाचलो जात-जात चो लोगमन के दखुन तुमी हुनमन चो कुंआरी-लेकीमन के बिया होउन आउर हुनमन तुमचो कुंआरी-लेकीमन के बिया होउन मिसलास जाले, 13 तुमचो जहोवा महापरभु बले ए जात-जात चो लोगमन के तुमचो मंजी ले निकराउक छाड़ेदे। एमन तुमचो काजे जाल आउर फांदा, तुमचो पाट काजे कोड़ा आउर तुमचो आंईक काजे काटा होदे। हुदलदांय ले तुमी तुमचो महापरभु दिलो भुंय ले नास होआसे।
14 दखा, एदांय मोचो जुगे दिन नी बाचलीसे, आउर तुमचो महापरभु जहोवा तुमचो बारे ने सांगलो असन काई गोट नीआय जोन पुरा नी होलीसे। हुन सपाय गोटमन तुमचो पुरे पुरा होली, गोटोक बले नी बाचली। ए गोटमन के तुमी मन आउर जीव ले जानसाहास। 15-16 मानतर जहोवा महापरभु तुमचो संगे करलो बायदा के तुमी नी मानुन, दुसर देव-धामीमन चो सेवा-सासन करुन हुनके डंडासरन करलास जाले जहोवा चो जंजाल रीस तुमचो उपरे पड़ेदे आउर जसन तुमचो महापरभु चो बललो भलई गोटमन पुरा होली, उसनेची बिपती बले तुमचो उपरे पड़ेदे, आउर तुमचो जहोवा महापरभु तुमके दिलो नंगत देस् ले तुमके नास करेदे।”