जहोसू 22

बेर-उदिया बाटे चो बंसमन आपलो निज बाटा ने बोहड़तोर

तेबे जहोसू, रूबेनीमन, गादीमन आउर आदो मनस्‍से बंस चो लोगमन के हागदेउन बललो, 2 “जहोवा चो कमेया मोसा जोन हुकुममन तुमके देउन रये, हुन सपाय के तुमी मानलास, आउर मोचो दिलो सपाय हुकुममन के बले तुमी मानलास; 3 आगे ले धरुन एबतले तुमी आपलो भाईमन के नी छांडलास आउर आपलो जहोवा महापरभु चो हुकुम के मन लगाउन मानलास। 4 एदांय जहोवा महापरभु आपलो बचन हिसाब ले तुमचो भाईमन के अस्‍तिर करलोसे, एईकाजे तुमी आपलाहान तमुमन ने, आपलो निज बाटा ने बोहड़ुन जाहा, जेके जहोवा चो कमेया मोसा तुमके जरदन नंदी चो बेर-उदिया बाटे दिलोसे। 5 मानतर ए गोटमन के धियान दियास, जहोवा चो कमेया मोसा दिलो सपाय हुकुम आउर नियम-कानुन के मानुन आपलो जहोवा महापरभु के मया करा। हुनचो बाट ने चला, हुनचो हुकुममन के माना आउर हुनचेई आराधना करा आउर आपलो सपाय मन आउर सपाय जीव ले हुनचो सेवा करा।” 6 तेबे जहोसू हुनमन के बर देउन बिदा करलो आउर हुनमन आपलाहान तमु ने गेला।

7 मोसा, आदो मनस्‍से बंस के बासान ने बाटा देउन रये। आउर बाचलो आदो बंस के जहोसू, जरदन नंदी चो बेर-बुड़ती बाटे हुनमन चो भाई-बंधमन चो मंजारे बाटा देउन रये। हुनमन के तमुमन ने जातो काजे बिदा करतोदांय जहोसू हुनमन के बर दिलो, 8 आउर हुनमन के बललो, “खुबे जनावरमन, सोन-रूप, कांस-लोहा, फटईमन आउर खुबे धन-माल धरुन आपलाहान डेरामन ने बोहड़ुन जाहा आउर बयरीमन ले झीका-उड़मा करलो धन-माल के आपलो भाईमन संगे बाटा।” 9 एईकाजे कनान देस् चो सीलोह सहर चो इसराएलिमन चो मंजी ले रूबेन बंस, गाद बंस आउर आदो मनस्‍से बंस गिलाद ने गेला, जेके जहोवा चो हुकुम हिसाब ले मोसा हुनमन के निज-बाटा होतो काजे देउन रये।

जरदन नंदी कटा बेदी बनातोर

10 जेबे रूबेन बंस, गाद बंस आउर आदो मनस्‍से बंस चो लोग कनान देस् चो जरदन नंदी चो बेर-बुड़ती बाट चो कटा ने अमरला, तेबे हुनमन जरदन नंदी कटा गोटोक बड़े बेदी बनाला। 11 तेबे आदो इसराएलिमन के खबर मिरली रूबेन बंस, गाद बंस आउर आदो मनस्‍से बंस चो लोग कनान देस् चो संद जरदन नंदी कटा, आदो इसराएलिमन चो बाटा ने गोटोक बेदी बनालासे। 12 तेबे आदो इसराएलिमन चो सपाय मंडली हुनमन संगे जुद करतो काजे सीलोह ने रूंडला।

13 तेबे आदो इसराएलिमन, रूबेन बंस, गाद बंस आउर आदो मनस्‍से बंस चो लोगमन लगे, एलीआजर पुजारी चो बेटा पीनहास के गिलाद परघन ने पठाला। 14 आउर हुनचो संगे दसझन मुखियामन बललोने, इसराएल चो गोटोक-गोटोक बंस ले गोटोक-गोटोक कुटुम-मुखिया के पठाला। 15 हुनमन गिलाद परघन ने रूबेन बंस, गाद बंस आउर आदो मनस्‍से बंस लगे जाउन बलुक मुरियाला, 16 “जहोवा चो सपाय मंडली असन बलेसे: ‘आजी तुमी इसराएल चो जहोवा महापरभु ले निमकधुसा करुन जहोवा चो बाटे हिंडुक छांडलास, तुमी गोटोक बेदी बनाउन काय काजे हुनचो बिरुद होयसाहास? 17 सुना, पोर सहर ने आमचो करलो पाप किरता जहोवा चो मंडली उपरे मरी ईली, हुन पाप ले आमी एबतले सुद नी होलुसे। तुमचो नंजर ने काय, ए नानी गोट आय? 18 फेर बले तुमी जहोवा के छांडलास! आजी तुमी जहोवा चो बिरुद बुता करले, काली के हुन, इसराएल चो सपाय मंडली उपरे जंजाल रीस होयदे। 19 मानतर एदांय तुमचो भुंय-बाटा असुद होलीसे जाले जहोवा चो बाटा ने इआ जोन थाने मिला-मिसा तम्‍बु आसे। आउर आमचो मंजारे आपलो भुंय बाटा धरा, मानतर आमचो जहोवा महापरभु चो बेदी के छांडुन दुसर बेदी बनाउन जहोवा चो बिरुद आउर आमचो बिरुद नी होआ। 20 दखा, जेबे जेरह चो बेटा आकान, जहोवा काजे अलगालो तीज के चोरुन निमकधुसा करलो, तेबे काय, हुन मनुक करलो ओधरम किरता मोरना डंड एकलाय हुनके ची मिरली’? काय, जहोवा चो रीस सपाय इसराएल चो मंडली उपरे नी पड़ली?”

21 तेबे रूबेन बंस, गाद बंस आउर आदो मनस्‍से बंस चो लोग, इसराएल कुटुम-मुखियामन के बलला: 22 “देव-धामीमन चो परभु, जहोवा! देव-धामीमन चो परभु जहोवा जाने; आउर इसराएल बले जानो! जहोवा ले एरा होउन नोहले निमकधुसा करुन आमी बेदी बनालुसे जाले तुमी आजी आमके जीव नी छांडा। 23 आजी चो दिने जहोवा चो पाट-पाट हिंडुक छांडुन आमी होम-जतरा, अरन-जतरा नोहले मिला-मिसा जतरा चेगावां बलुन बेदी बनालुसे जाले, जहोवा आमचो ले पलटा धरो। 24 मानतर एई डर काजे आमी एके बनालुसे; एतो समया ने तुमचो पिलामन, आमचो पिलामन के असन नी बलोत, ‘तुमके इसराएल चो जहोवा महापरभु ले काय बुता? 25 ए रूबेनीमन आउर गादीमन, जहोवा तुमचो आउर आमचो मंजी चो संद जरदन के बनालोसे; एईकाजे जहोवा ने तुमचो काई बाटा नीआय’ बलुन तुमचो पिलामन आमचो पिलामन ले जहोवा चो डर छंडाउन हुनमन के भूलकादे। 26 एईकाजे आमी बललु, ‘इआ आमी आमचो काजे गोटोक बेदी बनावां, हुन होम-जतरा नोहले चेगावा काजे नाई 27 मानतर आमचो आउर तुमचो मंजी, आउर आमचो पाछे आमचो थर-लर चो मंजी गवई रयदे कि आमी बले होम-जतरा, मिला-मिसा जतरा आउर भेंट-चेगाउन जहोवा चो सेवा करुं। तेबे एतो समया ने तुमचो पिलामन आमचो पिलामन ले असन बलुक नी सकोत, जहोवा ने तुमचो काई बाटा नीआय’। 28 एईकाजे आमी बिचारलु, ‘एतो समया ने हुनमन आमचो ले नोहले आमचो बंस ले असन बलला जाले, आमी हुनमन के असन बलवां, जहोवा काजे बनालो ए बेदी के दखा, जेके आमचो पुरखामन होम-जतरा नोहले भेंट-चेगावा काजे नी बनाओत, मानतर एईकाजे बनालासे कि आमचो आउर तुमचो मंजी गवई रओ’। 29 असन केबई नी होओ, आमी जहोवा चो बिरुद निमकधुसा करुन आजी जहोवा चो पाट-पाट हिंडुक छांडुं, आउर मिला-मिसा तम्‍बु पुरे चो जहोवा महापरभु चो बेदी के छांडुन होम-जतरा, अरन-जतरा नोहले भेंट-चेगातो काजे दुसर बेदी बनाउं!”

30 रूबेन बंस, गाद बंस आउर आदो मनस्‍से बंस चो लोग ए गोट के सुनुन पीनहास पुजारी आउर मंडली मुखियामन आउर इसराएल कुटुम-मुखियामन खुबे हरिक होला। 31 आउर एलीआजर पुजारी चो बेटा पीनहास, रूबेनीमन, गादीमन आउर आदो मनस्‍से बंस चो लोगमन के बललो, “एदांय आमी जानलु, तुमी जहोवा चो बिरुद निमकधुसा नी करलास, आउर जहोवा आमचो मंजारे आसे। एईकाजे तुमी इसराएलिमन के जहोवा चो जंजाल रीस ले बचालास।”

32 तेबे एलीआजर पुजारी चो बेटा पीनहास, मुखियामन संगे गिलाद ले रूबेनीमन आउर गादीमन लग ले कनान देस् ने इसराएलिमन लगे बोहड़ुन ईलो आउर सपाय गोट सांगलो 33 ए खबर सुनुन इसराएलिमन हरिक होला; आउर महापरभु के धन-धन बलला, आउर फेर केबई रूबेनीमन, गादीमन ले लड़तो आउर हुनमन चो देस् के सत्‍यानास करतो गोट नी गोटेयाला। 34 रूबेनीमन आउर गादीमन असन बलते ए बेदी चो नाव गवा^* संगाला, “आमचो मंजी ए गवई आय, जहोवा ची महापरभु आय।”