सकेम ने इसराएलिमन संगे जहोसू करलो सरासरी गोट
24
जहोसू, इसराएल चो सपाय बंस के सकेम सहर ने रूंडालो आउर इसराएल चो धरम-सियानमन, पंडितमन, नियावकरुमन आउर मुखियामन के हागदिलो आउर हुनमन महापरभु पुरे ईला। 2 तेबे जहोसू हुन सपाय लोगमन के बललो, “इसराएल चो जहोवा महापरभु असन बलेसे, आगे जुगे फरात नंदी चो हुन पाट रतो बेरा, तुमचो पुरखामन अबराहम आउर नाहोर चो बुआ तेरह देव-धामीमन चो सेवा-सासन करते रओत। 3 मय तुमचो पुरखा अबराहम के महानंदी चो हुन पाट ले आनुन कनान देस् चो गुलाय बाटे बुलाले, आउर हुनचो थर-लर बड़ाले। मय हुनके इसहाक दिले; 4 फेर मय इसहाक के जाकूब आउर एसाव दिले। मय एसाव के सेईर डोंगरी परघन चो हकदार बनाले, मानतर जाकूब आपलो बेटामन संगे मिसर देस् ने गेलो। 5 फेर मय मोसा आउर हारून के मिसर देस् ने पठाले। आउर मय मिसरीमन चो मंजी मरी पठाले; आउर तुमके हुताले निकराउन आनले। 6 जिदलदांय मय तुमचो पुरखामन के मिसर देस् ले निकराउन आनले, आउर हुनमन समदूर लगे अमरला तेबे मिसरीमन रथ आउर घोड़ा-सुवारमन संगे लाल समदूर* लग ले तुमचो पुरखामन के खेदुन नीला। 7 जिदलदांय हुनमन मोके गुहारला, तेबे मय हुनमन चो आउर मिसरीमन चो मंजारे अंधार करले। आउर मय ची लाल समदूर चो पानी के मिसरीमन उपरे बोहाउन बुड़ाले; जोन बले मय मिसर देस् ने करले हुनके तुमीमन आपलो आंईक ले दखलासाहास, एचो पाछे तुमीमन टंग-टंगा भाटा ने खुबे बरक रलास।8 फेर मय तुमीमन के जरदन नंदी चो हुन पाट बसलो एमोरीमन चो देस् ने आनले आउर हुनमन, तुमचो ले जुद करला। मानतर मय हुनमन के तुमचो हक ने करुन दिले आउर तुमी हुन देस् चो हकदार होलास, आउर तुमचो पुरे ले मय हुनमन के सत्यानास करले। 9 तेबे मोआब चो राजा सिपोर चो बेटा बालाक, इसराएलिमन संगे जुद करलो आउर तुमके सरापतो काजे बोर चो बेटा बिलाम के हागदिलो, 10 मानतर मय बिलाम चो गुहार के नी सुनले, एईकाजे हुन तुमके बर दिलो; असन बरन ले मय तुमके बालाक चो हाथ ले बचाले।
11 जिदलदांय तुमीमन जरदन नंदी नाहकुन जरीहो सहर लगे ईलास, आउर जेबे जरीहो सहर चो लोगमन आउर एमोरी, परिज्जी, कनानी, हित्ती, गिरगासी, हिव्वी आउर जबूसी लोगमन तुमचो संगे जुद करला, तेबे मय हुनमन के तुमचो हक ने करले। 12 मय, बीस बिती टेकारमन चो गोहड़ी पठाउन एमोरीमन चो दुनो राजामन के तुमचो पुरे ले खेदले; ए तुमचो खांडा ले नोहले धनु-कांड ले नी होली। 13 फेर मय तुमके असन देस् दिले, जेचो काजे तुमी काई मसागत नी करलास आउर तुमचो नी बसालो सहरमन ने तुमी बसापत करलासाहास; तुमी नी रोपलो अंगुर-पदरमन आउर जयतून रूकमन चो बले फरमन के तुमी खायसाहास।”
14 “एईकाजे एदांय जहोवा के डरा आउर सत-मन ले हुनचो सेवा-बुता करा। तुमचो पुरखामन महानंदी हुन पाट आउर मिसर देस् ने डंडासरन करलो देव-धामीमन के छांडुन जहोवा के डंडासरन करा। 15 तुमके जहोवा के डंडासरन करतोर नंगत नी लागली जाले, आजी तुमी बाछा, तुमी कोके डंडासरन करुआहास? फरात महानंदी हुन-पाट चो परघन ने, तुमचो पुरखामन डंडासरन करलो देव-धामीमन के नोहले एबे तुमी रतो एमोरीमन चो देस् चो देव-धामीमन के? मानतर मय आउर मोचो कुटुम जहोवाचेई डंडासरन करुआंव।”
16 तेबे लोगमन बलला, “जहोवा के छांडुन देव-धामीमन चो डंडासरन आमी केबई नी करुं। 17 कसनबलले आमके आउर आमचो पुरखामन के मिसर देस् चो कमेया बुता ले निकराउन आनलो जहोवा ची आमचो महापरभु आय। हुनचो करलो बड़े-बड़े अचरित बुतामन के आमी दखलु आउर जोन जात-जात चो लोगमन चो मंजी ले आमी जाते रलु हुनमन ले हुन आमचो रखेया करलो। 18 जहोवा ची ए देस् ने रतो एमोरीमन आउर सपाय जात-जात चो लोगमन के आमचो पुरे ले निकरालो। एईकाजे आमी बले जहोवाचेई सेवा-बुता करुआंव, कसनबलले हुनीची आमचो महापरभु आय।”
19 जहोसू हुनमन के बललो, “तुमी जहोवा चो सेवा करुक नी सकास, कसनबलले हुन पवितर महापरभु आय। हुन ईरका होउ महापरभु आय। हुन तुमचो ओधरम आउर पाप खेमा नी करे। 20 तुमी जहोवा के छांडुन देव-धामीमन चो डंडासरन करलास जाले, हुन तुमचो भलई करलो पाछे बले तुमचो नोकसान करेदे आउर तुमके सत्यानास करेदे।” 21 जहोसू के लोगमन बलला, “नाई, आमी जहोवाचेई सेवा-बुता करुआंव।” 22 जहोसू हुनमन के बललो, “तुमी खुदे जहोवा चो सेवा-बुता करुक मन करसाहास, एचो गवई तुमी खुदे आहास।” हुनमन बलला, “हव, आमी एचो गवई आसुं।” 23 जहोसू बललो, “तुमचो थानो देव-धामीमन के गुचाहा आउर इसराएल चो महापरभु जहोवा बाटे आपलाहान मन लगाहा।” 24 हुनमन जहोसू के बलला, “आमी तो आमचो महापरभु जहोवाचेई सेवा-बुता करुंदे आउर हुनचेई गोट मानुंदे।” 25 तेबे हुनी दिने जहोसू, लोगमन संगे बायदा करलो आउर सकेम ने हुनमन काजे नीति-नियम बनालो। 26 जहोसू, महापरभु चो नियम-कानुन चो किताप ने ए सपाय गोटमन लिखलो आउर गोटोक बड़े पकना बाछुन महापरभु चो पवितर ठान लगे बांज रूक खाले उबालो। 27 तेबे जहोसू सपाय लोगमन के बललो, “दखा, ए पकना आमचो मंजी गवई रयदे कसनबलले महापरभु आमके बललो सपाय बचन के ए सुनलीसे। एईकाजे महापरभु के तुमी निंदरलोने एई तुमचो बिरुद गवई होयदे।” 28 फेर जहोसू हुनमन के आपलाहान भुंय-बाटा ने जातो काजे बिदा करलो।
जहोसू आउर एलीआजर चो मोरना
29 जहोवा चो कमेया, नून चो बेटा जहोसू, एक सव दस बरक चो रलोदांय मोरलो। 30 हुनमन, गास डोंगरी चो बेर-उदिया डेबरी बाटे एपरेम चो डोंगरी परघन चो तिमनत-सेराह ने, हुनचेई भुंय-बाटा ने हुनके माटी दिला।
31 जहोसू चो जीवता-जीव भर इसराएलिमन जहोवाचेई सेवा-बुता करते रला। जहोसू मोरलो पाछे, जोन धरम-सियानमन, इसराएल ने महापरभु करलो अचरित बुतामन चो बारे ने जानते रला, हुनमन चो जीवता भर बले इसराएलिमन जहोवाचेई सेवा-बुता करते रला।
32 इसराएलिमन, मिसर देस् ले आनलो जूसुफ चो हाड़ामन के, हमोर चो बेटामन ले एक सव रूपा चो सिक्कामन देउन जाकूब घेनलो भुंय ने पाटला; (हमोर, सकेम चो बुआ रये) एई जूसुफ थर चो निज बाटा होली।
33 हारून चो बेटा एलीआजर बले मोरलो आउर हुनके, हुनचो बेटा पीनहास के एपरेम चो डोंगरी परघन ने दिलो गिबत ने माटी दिला।