सरन पावतो सहरमन बनातोर
20
जहोवा, जहोसू के बललो, 2 “इसराएलिमन के बल, ‘मय मोसा बाटले तुमके सरन पावतो सहरमन चो बारे ने सांगुन रये, हुनी हिसाब ले सहरमन के बाछा। 3 कोनी बले कोकई धोका ने मोरते मारलो जाले, हुता पराओ। तेबे हुन सहरमन, लोउ चो पलटा धरु ले बाचतो काजे तुमचो सरन पावतो ठान होयदे। 4 हुन माने-मारा मनुक, ए सहरमन ले कोनी थाने बले पराओ आउर सहर चो देवड़ी लगे उबा होउन हुता चो धरम-सियानमन के आपलो बारे ने सांगो। हुनमन आपलो सहर ने रतो काजे हुनके ठान देओत आउर हुन, हुनमन संगे रओ। 5 धोका ने मारलो बीता के, लोउ चो पलटा धरु खेदुन नीले बले हुनचो हाथे हुनके नी सोपोत। कसनबलले हुन आपलो घर लग चो मनुक के बईर नी करुन धोका ने मारलो होती। 6 जिदलदांय ले हुन मंडली पुरे नियाव काजे उबा नी होये, नोहले जिदलदांय ले हुता चो बड़े-पुजारी नी मोरे हुदलदांय ले हुन हुनी सहर ने रओ। एचो पाछे हुन माने-मारा आपलो घरे बोहड़ुन जाओ, जोन सहर ले पराउन एउन रये’।”7 तेबे हुनमन नपताली चो डोंगरी परघन ने गलील चो केदेस सहर के, आउर एपरेम चो डोंगरी परघन ने सकेम सहर के, आउर जहूदा चो डोंगरी परघन ने किरयत-अरबा सहर के (जेके हेबरोन बले बलुआत) सरन ठान बनातो काजे अलगाला। 8 आउर हुनमन, जरदन नंदी बेर-उदिया बाट चो, रूबेन बंस चो बाटा ले जरीहो चो टंग-टंगा भाटा ने बेसेर सहर के, आउर गाद बंस चो बाटा ले गिलाद चो रामोत सहर के, आउर मनस्से बंस चो बाटा ले बासान चो गोलान सहर के, सरन पावतो सहरमन मानला। 9 सपाय इसराएलिमन आउर हुनमन चो मंजी रतो परदेसियामन काजे बनालो सरन पावतो सहरमन एई होली। कोनी बले कोकेई धोका ले मोरते मारलो जाले हुता चो कोनी बले सहर ने पराओ आउर मंडली पुरे हुनचो नियाव होतोले आगे पलटा धरु चो हाथ ले नी मोरो।