देस् चो बाचलो भाग के बाटतोर
18
इसराएलिमन चो सपाय मंडली सीलोह सहर ने रूंडा होउन हुता मिला-मिसा तम्बु गाड़ला। हुन सपाय देस् हुनमन चो हक ने होउन रये, 2 तेबले बले इसराएलिमन चो सात बंस के एबतले भुंय-बाटा नी मिरु रये।3 एईकाजे जहोसू इसराएलिमन के बललो, “तुमचो पुरखामन चो महापरभु दिलो देस् के आपलो हक ने करतो काजे तुमी काय काजे ठग होयसाहास? 4-5 एदांय गोटोक-गोटोक बंस ले तीन-तीन मनुकमन के बाछा आउर मय हुनमन के पठायंदे कि हुनमन देस् चो बाचलो भाग ने बुलोत आउर भुंय के सात बाटा करुन लिखोत आउर सातो बंसमन काजे भुंय-बाटा लिखुन मोचो लगे बोहड़ुन एओत। जहूदी बंस चो लोगमन बेर-उदिया उजा बाटे आउर जूसुफ बंस चो लोगमन बेर-उदिया डेबरी बाटे आपलो बाटामन ने रयसोत। 6 तुमी जाउन बाचलो भुंय के सात बाटा करुन लिखुन आना। तेबे आमचो जहोवा महापरभु पुरे, तुमचो काजे चिटी पकायंदे। 7 लेवीमन के तुमचो मंजी काई बाटा नी मिरेदे, कसनबलले जहोवा दिलो पुजारी पन ची हुनमन चो बाटा आय। गाद, रूबेन आउर आदो मनस्से बंस चो लोग के जहोवा चो कमेया मोसा दिलो बाटा जरदन चो बेर-उदिया बाटे मिरलीसे।”
8 तेबे जहोसू, देस् चो बाचलो भुंय चो बारे ने लिखुक जातो मनुकमन के हुकुम दिलो, “देस् चो बाचलो भुंय ने बुलुन हुनचो बारे ने लिखा, आउर बोहड़ुन मोचो लगे इआ। तेबे मय, एता सीलोह ने जहोवा पुरे तुमचो काजे चिटी पकायंदे।” 9 तेबे हुन मनुकमन गेला आउर हुन देस् चो बाचलो भुंय ने बुलला आउर हुता चो सहरमन के सात बाटा करुन हुनचो बारे ने किताप ने लिखला आउर सीलोह ने जहोसू लगे बोहड़ुन ईला। 10 तेबे जहोसू, जहोवा पुरे सीलोह ने हुनमन काजे चिटी पकालो आउर इसराएलिमन के बंस हिसाब ले देस् चो बाचलो भुंय के बाटुन दिलो।
बिन्यामीन बंस के दिलो भुंय-बाटा
11 बिनयामीन बंस चो चिटी, हुनमन चो कुटुम हिसाब ले निकरली आउर हुनमन चो बाटा जहूदी बंस आउर जूसुफ बंस चो मंजारे होली। 12 हुनमन चो बेर-उदिया डेबरी बाट चो संद जरदन ले मुरियाउन जरीहो बाटले बेर-उदिया बाट चो डोंगरी सिग ने चेगुन बेर-बुड़ती बाटले किंदरुन डोंगरी परघन बाटले बेत-आवेन चो टंग-टंगा भाटा ने अमरली। 13 हुता ले हुन संद बेर-उदिया उजा बाटले लूज ने अमरली (जेके बेतेल बले बलुआत)। फेर लूज चो उतरानी बाटले अतरोत-अदार ने अमरली जोन डोंगरी खाले बेत-होरोन चो बेर-उदिया उजा बाटे आसे। 14 फेर बेर-बुड़ती बाटे चो संद बेत-होरोन चो बेर-उदिया उजा बाटे चो डोंगरी बाटले जहूदी बंस चो सहर किरयत-बाल ने अमरली (जेके किरयत-आरीम बले बलुआत)। 15 फेर बेर-उदिया उजा बाटे चो संद किरयत-आरीम सहर ले मुरियाउन बेर-बुड़ती बाटे नेपतोह नाव चो पानी-पजरा लग ले अमरली; 16 आउर हुता ले डोंगरी खाले अमरली जेचो पुरे बेन-हिन्नोम कड़की आसे जोन रपाईम कड़की चो बेर-उदिया डेबरी बाटे आसे, आउर जबूस डोंगरी चो बेर-उदिया उजा बाट ले एन-रोगेल* लगे अमरली। 17 हुताले बेर-उदिया डेबरी बाटे किंदरुन एन-सेमेस बाटले निकरुन अदुमीम चो चेगानी चो गलीलोत ने गेली। फेर हुता ले रूबेन चो बेटा बोहन चो चीना-पकना लगे उतरली। 18 फेर हुता ले बेर-उदिया डेबरी बाट चो बेत-अराबा पुरे चो डोंगरी बाटले अराबा ने उतरली। 19 हुताले बेर-उदिया डेबरी बाट चो बेत-होगला डोंगरी चो उतरानी ने अमरली; आउर हुताले जरदन चो बेर-उदिया उजा बाट चो लोनचर समदूर ने टेकली। बेर-उदिया उजा बाट चो संद एई होली। 20 बेर-उदिया बाट चो संद जरदन नंदी ची होली। बिनयामीन बंस चो बाटा हुनमन चो कुटुम हिसाब ले चारो कुती चो संद एई होली।
21 बिनयामीन बंस चो कुटुम हिसाब ले हुनमन के एई सहरमन मिरली: जरीहो, बेत-होगला, एमक-कसीस, 22 बेत-अराबा, समारेम, बेतेल, 23 अवीम, पारा, ओपरा, 24 कपरमोनी, ओपनी आउर गेबा। ए बारा सहरमन आउर हुनमन चो गांवमन बले मिरली। 25 गिबोन, रामाह, बेरोत, 26 मिसपे, कपीरा, मोसाह, 27 रेकेम, जिरपेल, तरला, 28 सेला, एलेप, जबूस, (जेके जरूसलेम बले बलुआत) गिबा आउर किरयत। ए चवदा सहरमन आउर हुनमन चो गांवमन बले मिरली। बिनयामीन बंस चो बाटा हुनमन चो कुटुम हिसाब ले एई होली।